17
Sa Dogoro Goto na Tinina i Jisu
(Maka 9.2-13; Luke 9.28-36)
1 Ego sa jola gu ka vonomo rane, sa sa tonia i Jisu si Pita beto ira Jekopi i Jone kao tamatasi, ko qai sagere sae pa kai kubo ululuna ko qai kole suvere mekadi ketakoi.
2 Ko tonai qai doro laoa si Jisu sa sa dogoro goto sa na tinina. Na isumatana sa sa tolanga vei na tapo, goto na ona poko sa sa keka vavalaka.
3 Beto api! Qai bola votu kamuria sira Mosese i Elaija ko qai kole paparangia si Jisu.
4 Poni sa paranga si Pita, pira saunia i Jisu, <<Bangara, sa vavagua jola sa taqe suvere gita lani! Vei muna vajonganai ao, sa ara ma roitinia kue aqaqo; ko kame tamu, kame ti Mosese, beto kame tai Elaija,>> sau sisa.
5 Ko sa korapa tugu paparanga vei inara i Pita, sa sa lame kai lei keala ko sa amu vapaeria sira doru. Beto qai nongoria sa kai ovovele pa leona na lei pira sau, <<Api sa na Tuqu qa roroqua beto qa qera vivitiginia ara. Mu nongoria sisa!>> sau.
6 Totonai qai nongoria ira kue sepele sa na ovovele poni sa qai matagutu vivitigi, ko qai gona toqo pa peso ko qai todongo.
7 Poni sa lao si Jisu ko sa uliria sira kue, beto pira sauniria, <<Turu, muke matagutu!>> sau sisa.
8 Ko tonai mai enga qarigu sa sa kepore mule sa kai tinoni bai batia goto i Jisu gu mekana.
9 Tonai qai korapa mule gore na kokodi pa kubo, sa sa naquria i Jisu sira kue, pira sauniria, <<Munake vavakatonia tana kai tinoni sa na dodogoro vei qu batia agou, koi vei tu mina tavaturu mule pa mate sa na Tuna na Tinoni,>> sauniria.
10 Qai nanasia ira na sepele si Jisu, pira qarigu, <<Ai sa vei ko qai paranga sira qai vaivagigalainia na Vavanau kode i Elaija tu sa mina mule lame momoe mai tonai mina oqoro kamu na Mesaea?>> qarigunia.
11 Poni sa oeria i Jisu sira, pira sau, <<E, i Elaija sa mina lame momoe tugu ko mina vatana vatuvisi momoeria sa doru sakasava.
12 Ba ma pojanigou agou: sa tei mule lame momoe tu si Elaija, ba qaike doro gigalia ira na tinoni sisa, ko qai ngangangulu veinia isa qai nyogua veinia. Ko na Tuna na Tinoni ba kode mai ngangangulu veinia mutugu ira na tinoni,>> sau si Jisu.
13 Ego ko ketakoi sa qai gigila vakabere vatalea ira na sepele sa i Jone Paputaiso gu sa saunia isa.
I Jisu sa Salania kai Marene sa kolea na Tomate Ikikerena
(Maka 9.14-29; Luke 9.37-43)
14 Ego totonai qai gabala mule kamu tadira na minete tinoni sira, sa sa lao gona toqo sori tutungu pa moena i Jisu sa kai tinoni,
15 ko sa paranga, <<Bangara, mu roroqu tokania na tuqu marene! Sa vavainia na mo kirenge ko sa vavaaru vikerenia ko kaki totoso sa vavukele laoa tugu pa niku beto pa kolo.
16 Qa tei toni laonia tugu tadira na mua sepele ba qaike boka salania,>> sau sisa.
17 Poni sa oea i Jisu, pira saunia, <<Koi, agou na sasae tinoni quke vasosoto beto quke gigilai na tuvisi! Ai tu mina koi vei sovai vei sa mana kole suvere tavitigou na jujunonigou ara sagou? Mu toni lamenia taqu sa na marene ina!>> sau si Jisu.
18 Beto sa iju palea i Jisu sa na tomate ikikerena sa kole tana marene, ko sa votu riu tana, ko sa tasalana tugu na totoso isa sisa.
19 Beto sa tonai qai suvere mekadi tu sa qai lame ti Jisu sira na sepele ko qai nanasa, <<Ai sa vei ko qeke boka iju votunia agei sa na tomate ina?>> qarigu.
20 Poni sa pira sauniria i Jisu, <<Ura koko vei sa ikete jola na miu rarange! Ura ma poja sosotonigou ara sagou: vei bu isongia iapeki rarange bi podeke iketena vei kai kiko masitadi, sa vei bu paranga veinia gu pira sa na kubo api, <Mu rijo lao pa poni!> bugu, sa kode mina lao tugu. Kepore sa kai sava mina tapatagou.
21 (Na tomate ikikerena veveina ina, sa sake tasalana goboro, goto pa vavara beto pa tatabu teteku gu sa kode mina boka taiju pale,)>> sau sisa.
I Jisu sa Vavakatonia Mule na Veveina na ona Mate
(Maka 9.30-32; Luke 9.43-45)
22 Totonai qai vaikamu pa Qalili sira doru sepele, sa pira sauniria i Jisu, <<Na Tuna na Tinoni sa kode mina tavalao pa limadi ira na tinoni.
23 Ko mina tavamate sisa, ba pa vinaue rane sa mina toa mule pa mate sisa,>> sauniria. Ko qai mamata vivitigi sira na sepele.
Na Tabarana na Takisi Ruma Zelepade
24 Totonai sa kamu si Jisu beto ko ira na sepele pa Kepaniami, sa qai lao tai Pita sira na tinoni teteku takisi ruma zelepade ko qai nanasia, <<Ai sa vei sa tabaria tugu na miu tinoni vaivagigalai sa na takisi ruma zelepade?>> qarigu.
25 <<E,>> sau si Pita. Isa tugu sa tome pa leo ruma i Pita sa sa paranga si Jisu, <<Saimone, na sa sa qu roroqua ao? I sei sa tatabaria sa na takisi tadira na babangara pa kasia abana api? Ira na tudia sosoto na bangara, ba ira tu na tinoni gotodi?>> sau si Jisu.
26 Poni pira sau si Pita, <<Ira tu na tinoni gotodi,>> saunia.
<<Koi, e, jongana,>> sau si Jisu. <<Ko na ginuana isa kisa ira na tudia sosoto na bangara ko maike tabaria sa na takisi.
27 Ba sake jongana tana vatagigiriria na tinoni, ko ao mu riu tu pa kolo ko mu ipania na tali. Muna kao vapodakia ao sisa na igana muna vagani momoea ko tonai muna asanga vamamangai, kode muna batia sa kai poata siliva na padana na takisi ruma zelepade tadagita karu. Muna tekua, ko muna lao vaniria na takisi tadagita karu,>> sau sisa.