13
Karu manugu made nenedi pirudi
1 Beto qa batia mutugu sa kai manugu made nenena piruna sa podaka votu lame pa ivere, ka manogaputa keuna, beto ka vitu na batuna. Qai solapa pana kekeuna sa ka manogaputa tarapae bangara, beto sa okoto takuti pana okoto batuna sa kai isongo sa ajai sa na Tamasa.
2 Ko na manugu qa batia sa sa dogoro vei na leopadi, na nenena sa vei na nene bea, goto na mangana sa vei na mangana na laione. Ko na ratovo sa vania na manugu piruna api sa na ona neqi, na ona totoqona bangara beto na ona neqi binangara.
3 Kai batuna sa doro vei sa vavainia kai paleka vaivamatena, ba sa tei tasalana tu ko sa tei mavo tu sa na paleka. Ko qai gabara beto sira doru tinoni pa kasia gusu, ko qai tutia sa na manugu piruna isa.
4 Ko doru tinoni sa qai vatarasaea sa na ratovo, ura isa tugu sa vania nona neqi sa na manugu piruna. Beto qai vatarasaea tugu vei sa na manugu piruna isa, pira qarigu, <<Kepore sa kame bi neqi viva vei na manugu piruna! Beto ko kepore sa kame mina pada rajai ko mina vakilasia isa!>> qarigu.
5 Sa taiania tugu na manugu piruna isa sa na boboka pana paranga ko sa paranga vavalavatai beto sa vamoroania na Tamasa. Beto sa tavamalumu sisa ko sa boka varoitia nona neqi ka madengavulu karu popu.
6 Sa podalai paranga sisa ko sa poja vivikeria sa na Tamasa, sa poja vivikeria sa na isongona na Tamasa, na ia sa suveria na Tamasa, beto ko vei tugu ira doru qai suvere pa noka.
7 Beto sa tavamalumunia tugu isa sa mina rajaria na vakilasaria sa na tinoni tana Tamasa. Beto sa taiania tugu isa sa na neqi ko mina bangaraniria ira doru bubutu, na minete tinoni, na tinoni okokotodia parangana beto na pupuku tinoni.
8 Ko mai vatarasaea doru tinoni sisa, ira na tinoni tonai tu sa oqoro taroiti na kasia gusu sa sake takuti na isongodi pana buka sa kolea na isongodi ira qai tekua na toa. Na buka isa sa tana na lami sa tavamate mai perangana.
9 Na tinoni sa pore talingina sa mi vainongoro!
10 Isa mina tatoni raputu variu,
sa mina taraputu lao tugu ketakoi.
Isa sa tavamatenia na benete vaipera,
sa mina mate tugu pana benete vaipera.
Ko sa vei sa mai turu vangaju sira na tinoni tana Tamasa.
11 Beto qa batia mutugu sa kai goto manugu made nenena piruna sa votu sale vei pa leo peso. Karu kekeuna qai vei na kekeuna na lami, goto na ovovelena sa vei na ovovelena na ratovo.
12 Doru neqi tana na manugu piruna momoe sa sa varoitiria isa pa moena na manugu momoe. Ko sa vagabararia sira doru tinoni pa peso ko qai vatarasaea sisa na manugu momoe. Isa sa na manugu sa vavainia mai na paleka vaivamatena perangana ba sa tei tasalana tu sa na palekana.
13 Na manugu vinarua sa roiti vavoturia mule sa na roiti lalavata vaivagabaradi, ko na iku tu pa noka ba sa valageria pa peso pana moedi ira na tinoni.
14 Ko pana roiti vaivagabarana sa tavamalumunia isa sa roitinia pa moena na manugu momoe sa sa toni vapiruria na manugu vinarua sira na tinoni. Sa garunuria tugu sira qai suvere pa peso ko mai gurai tugu kai beku, na kirena ko na valavatana na manugu momoe sa tavapaleka pana benete vaipera ba sake mate.
15 Sa tavamalumu sa na manugu vinarua ko sa singo lao vania na toa sa na beku kirena na manugu momoe, ko na beku isa sa boka paranga beto sa vamateria tugu sira doru qaike vatarasaea na beku isa.
16 Ko na manugu sa paranga jujukuria sira doru tinoni, ikete na lavata, isisongodi na golabadi, na tinoni taruvatadi na pinausu, ko mai tavakole betoniria na vinagigila pa lima kale matuadi babi pana readi sau.
17 Ko kepore sa kai tinoni mina boka vaiona sakasa babi vavainiria nona sakasa vei minake isongia isa sa na vinagigila api, na isongona na manugu ikikerena babi na nabana na isongona isa.
18 Ko na gigalai tomena tu mina boka revangia sapi. Isa sa isongia na gigalai sa mi roiti votunia sa na nabana na manugu isa, ura na nabana kai tinoni sisa. Ko na nabana isa sa 666.