5
Na pepa tavijongona beto na lami
1 Beto qa batia ara sa kai pepa tavijongona sa taaru pa lima kale matuana isa sa toqo pana totoqona bangara. Karu kalena na pepa tavijongona isa sa sa pugele vaikalea na kukuti beto sa tavamaurunia ka vitu tita maulu.
2 Beto qa batia ara sa kai mateana neqina jola sa vevela viviva vei pira, <<I sei sa na padana ko mina poraka revangaria sira na tita maurudi aipira ko mina revatia sa na pepa tavijongona,>> sau.
3 Ba kepore sa kai tinoni pa noka, pa peso babi pa kauru peso sa pada bi revatia ko bi tiro dogoria.
4 Ko qa lukana viviva sara, ura kepore sa kai tinoni bi tabata, isa sa garo ko bi revatia ko bi tiro dogoria sa na pepa tavijongona isa.
5 Poni sa paranga lamesiu sa kame ira na tinoni mamata, <<Muke lukana. Dogoro! Na laione pana bubutu tai Jiuda, na tuti lamena ti Devita. Isa sa na tinoni sa tei vakilasia tu nona kana, ko isa sa padana mina poraka revangaria sa ka vitu tita maulu, ko mina revatia sa na pepa tavijongona ina,>> sau.
6 Beto qa dogoro lao qau sa qa batia sa kai lami, sa kole turu pana vaikorapaina na totoqona bangara beto ka made manugu, beto qai vailivutainia ira na tinoni mamata sisa. Ba na lami sa sa doro vei pu tei tavamate mai tu. Na lami isa sa kolea ka vitu kekeuna, beto ka vitu tugu na matana, isa ira ka vitu Gagalana na Tamasa qai tagarunu lao pa doruna na kasia abana.
7 Sa lao sa na lami isa ko sa tekua sa na pepa tavijongona sa taaru pa kale lima matuana isa sa toqo pana totoqona bangara api.
8 Ko totonai sa aru tekua na lami sa na pepa tavijongona, sa qai todongo sira ka made manugu beto ko ira ka rabete made tinoni mamata pa moena na lami. Qai okoto aru mike hapu beto na baolo qolo. Na baolo ira sa qai pugeleria na vuvuvusu vavakukuvu umanga jongadi ira na vavara tadira na tinoni tana Tamasa.
9 Ko qai kerania ira sa kai kera koregana, pira qarigu:
<<Na padamu sao ko muna aru tekua
sa na pepa tavijongona
beto muna poraka revangaria ao
sira na tita maulu,
ura qu tavamate perangana sao,
ko pana orungumu ao
sa qai tapajuku mule vania na Tamasa
sira na tinoni pa okoto bubutu beto na okoto paranga,
beto pa okoto minete tinoni beto na puku tinoni.
10 Qu tei roiti veiniria tu kai bubutu iama ao sira,
ko mai nabulunia na oda Tamasa,
beto ko mai bangara pa peso,>> qarigu.
11 Beto qa dogoro lao mule qau sara, poni qa nongoria sa na ovoveledi na soku tina mateana qaike boka taanye. Qai turu vailivutainia sa na totoqona bangara, ira ka made manugu, beto ira ka rabete made tinoni mamata.
12 Ko qai kera vaululu viviva vei pira sira:
<<Sa pada ko mina tavalavata sa na lami,
isa sa tavamate mai perangana!
Ura tana sa na neqi, na isisongo,
na gigalai, na viva, na vinalavata, na vinatarasae,
beto na paranga jongana!>> qarigu.
13 Beto pa liguna isa qa nongoria ara sa na ovoveledi doru vinapodaka pa noka, pa peso, pa kauru peso, pa kolo, beto ko dorudi qai kole pa doru eqa, sa qai kera vei pira:
<<Tana sa toqo pana totoqona bangara beto tana lami
mai lao sa na paranga jongana,
na vinalavata, na vinatarasae,
beto na neqi kamua na kamua!>> qarigu.
14 Poni qai oe lao sira ka made manugu, <<Agua!>> qarigu. Beto qai todongo sira ka rabete made tinoni mamata, ko qai vatarasaea sisa.