3
Yer suq Mod ser haq keh awg mig awg phond cawg che
1 Kheh te cheaq te lehq, muhd nuh maq lo kug yug che awg bon haq a nig geh teq geha gha che, daq che kehg che a vix a nax teq paog, Yer suq haq duhd ngawx-oq. Yawd awr lehr, a nig yonr chehd che cuh yad he lehq paw khod nux phehq che yaog.
2 Mod ser awr lehr, Ghig sa ve yehg ted yehg awg khuhn kar tiq yeg lehq na yug vix che heh, Yer suq liz yawd haq lez teh lar vid sehr phad haq kar tiq yeg lehq na yug vix che yaog.
3 Yehg te sehr phad awr lehr, yehg haq keh awg mig awg phond cawg che heh, Yer suq liz Mod ser haq keh awg mig awg phond cawg kenr che yaog lehz Ghig sa sawnr lar che yaog.
4 Awg lawn ghod ver, yehg awg mag gha lia awr lehr, te sehr phad cawg che yaog. Kheh ma khuhd, awg ceng gha lia haq te sehr phad awr lehr Ghig sa yaog.
5 Mod ser awr lehr, awg khaz nuhr kha koz mar tug teq pa haq sax khiz khanr tug awg pun, Ghig sa ve yehg ted yehg maq ve awg gha lia awg khuhn, awg ceg ve kanx haq te che awg khuhn yawd kar tiq yeg lehq na yug vix che yaog.
6 Kheh ma khuhd Khreq awr lehr, Ghig sa ve yehg awg khod-aq yad par phehq che awg khuhn kar tiq yeg lehq na yug vix che yaog. A nig liz, ni ma tag che ted ceng haq lehd ma koz, duhd law che awg khuhn ni ma ir tug cawg che ted ceng haq lehd ma koz, awg leh med kha gag yeg chawa yug cid lar ver, a nig awr lehr yehg u ve ted yehg phehq che yaog.
Ghig sa ve chaw teq pa awg pun ghad jehd kig cawg che
7 Kheh te cheaq te lehq, Daq che kehg che Awg ha phu koz lar che heh,
“Yaq ni Ghig sa ved tawd khuhd haq nig hehd gha kad ver,
8 heh pir khuhn lo ngag haq lawnd ngawx lehq ngag ved tawd khuhd haq a cehax liz maq na yug che
awg ni teq ni heh te lehq, nig hehd ve ni ma taq heh vid.
9 Uhd chi khuhq kha gag u huh ngag te che kanx teq pa haq i hehd gha mawg liz,
nig hehd ve a pux a pi teq pa ngag haq kawq lawnd ngawx cand ngawx chehd ser che yaog.
10 Kheh te lehq, chaw u ve teq co haq ngag nez nag lehq koz che,
‘I hehd ve ni ma awg khuhn khar thad liz te yaq chehd lehq,
ngag ved yaq kaw teq pa haq i hehd maq sir,’ lehz ngag koz che yaog.
11 Kheh te lehq, ‘I hehd awr lehr
ngag ved ghad jehd kig awg khuhn maq gha gehe,’ lehz
nez nag che awg khuhn ngag khanr lar che yaog,”
lehz daq che kehg che Awg ha phu koz che yaog.
12 A vix a nax teq paog, nig hehd awg khuhn haeg che he lehq maq yonr vix che ni ma maq gha cawg tug sa tiq teo. Che kheh te che ni ma awr lehr, nig hehd teq pa teq chehd che Ghig sa haq phaz daq vid vix che yaog.
13 Vend bax her ka yug beg yug che ted ceng haq te lehq nig hehd awg khuhn te ghad-eg liz ni ma maq gha heh vehr tug, yaq ni lehd koz gha che awg yand awg khuhn, ni gha lia nig hehd te ghad he lehq te ghad awg ghad pid daoq.
14 Awg kawd maq thad liz a nig ni ma yeg che heh, awg leh med kha gag ni ma kha nehax yeg chehd che ver, a nig Khreq haq caz daq che chaw phehq che yaog.
15 Liq phu khuhn koz lar che heh,
“Yaq ni yawd ved awg khuhd haq nig hehd gha kad che ver,
ngag ved tawd khuhd haq a cehax liz maq na yug che
awg ni teq ni heh te lehq, nig hehd ve ni ma taq heh vid.”
16 Gha kad peg che liz Ghig sa ve tawd khuhd haq a cehax liz maq na yug che chaw teq pa awr lehr, a suawg le. Ed jid tuq muhd mig awg khuhn Mod ser sir veha tuhaz che chaw awg gha lia yaog ma hez hawg la.
17 Uhd chi khuhq kha gag Ghig sa a sug haq nez nag cheawg le. Vend bax te lehq, heh pir khuhn lo par kuhd suh vehr che chaw teq pa haq ma hez hawg la.
18 Nig hehd awr lehr, ngag ved ghad jehd kig awg khuhn maq gha gehe lehd koz, a sug haq yawd khanr cheawg le. Maq na yug che chaw teq pa haq yawd khanr che ma hez hawg la.
19 Kheh te lehq, i hehd maq yonr che haq te lehq maq gha gehe che haq a nig gha mawg gha sir che yaog.