6
1-2 Kheh te cheaq te lehq, Khreq ve awg lawn awg kawd maq thad a nig sir lar che teq pa haq teh lar haz lehq, ir lag peh lawq lag tug awg ghuhd med awr kae veg. Suh vehr che kanx teq pa haq duhd phuhz che ted ceng lehd ma koz, Ghig sa haq yonr che ted ceng lehd ma koz, baz tiz sar awg lawn mar vid che ted ceng lehd ma koz, laq kuhr tar vid che ted ceng lehd ma koz, suh che chaw teq pa kawq teq tuag che ted ceng lehd ma koz, co co taer taer awg pun suhx jehg che ted ceng lehd ma koz, che teq pa haq awg cuhz penr lehax tad kawq kawx chehd-oq.
3 Ghig sa a khawag pehar che ver, che teq pa haq a nig teh lar haz lehq awg ghuhd med awr kae veg.
4 Awg lawn ghod ver, awg ghiz haq te pawz gha mawg peg che, muhd nuh maq ve laq sawnr haq gha lehq ngawx peg che he lehq Daq che kehg che Awg ha phu haq gha peg che chaw teq pa awr lehr,
5 Ghig sa ve daq jad che tawd khuhd haq lehd ma koz, awg khaz nuhr lag tug teq co haq ve kand pax haq lehd ma koz, gha lehq ngawx peg che liz,
6 i hehd yonr che haq chid bag lar haz ver, vend bax haq te pawz kawq duhd phuhz tug te maq gha. Awg lawn ghod ver, i hehd liz Ghig sa ve Yad phu haq laq kan thag huh kawq thaq vehr lehq, yawd haq su mehz khuhd suhr yaq taw tug te vid che yaog.
7 Mig gig awr lehr, laex pawz lag che muhd yeg ghig haq gha chuhq lehq, mig cad che phad teq pa awg pun awg bon cawg che ghawd phaq muhg nuha he lehq awg sir awg no haq cawag vid tug te ver, mig gig u ve awr lehr, Ghig sa naq vid che awg bon haq gha che yaog.
8 Kheh ma khuhd, mig gig u ve a chud he lehq muhq teq pa lehax yeg tuhaz che ver, awg bon mad cawg cheaq te lehq, khen che haq gha khanr vehr tez che yaog. Awg leh med gaeg ver, a mig tox ke vehr tug yaog.
9 Haq che chaw teq paog, ngag che kheh koz che liz, u ve haq keh daq jad che awg ceng, thaer khuhq che haq caz daq che teq pa nig hehd gha tug yaog lehd ngag awg cehg mag yonr chehd che yaog.
10 Awg lawn ghod ver, Ghig sa awr lehr, ma thed ma cawd che Ghig sa phehq che ma hez. Khreq yad teq pa haq ga vid lar peg che awg khuhn he lehq a meha liz kawq cax ga chehd che awg khuhn Ghig sa awg pun nig hehd haq pehnd che he lehq te lar che kanx teq pa haq, Ghig sa lend tug ma hez.
11 Duhd law lar che ted ceng phehaq vid tug awg pun, nig hehd awg gha lia awg leh med kha gag che ve heh te lehq hax ceh nux te tug haq ngag he gad jad che yaog.
12 Kheh te lehq, a yed mad yug taq te chehd. Kheh ma khuhd, yonr che he lehq yeg khanr che haq te lehq, Ghig sa koz lar che awg ceng teq pa haq gha lar che chaw teq pa heh te lehq, nig hehd liz teo.
13 Awg lawn ghod ver, Ghig sa awr lehr Ar brar hanr haq kar tiq te vid che te yand, yawd haq keh ir che te ghad haq cud lehq khanr tug mad cawg cheaq te lehq, Ghig sa yawd khad yawad awg ton haq cud lehq khanr lar che yaog.
14 Yawd khanr lar che awr lehr, “Ngag nawg haq awg cehg mag bon naq vid tug yaog. Ngag nawg ve awg ceng awg khad awg cehg mag mad-ag vid tug yaog,” lehd koz lehq khanr che yaog.
15 Kheh te lehq, Ar brar hanr yeg khanr lehq law chehd cheaq te lehq, Ghig sa yawd haq kar tiq te vid lar che heh yawd gha che yaog.
16 Chaw yad teq pa awr lehr, a sug yawd awg ton haq keh ir che te ghad haq cud lehq khanr che awg lid cawg che yaog. Khanr che ted ceng haq te che te yand, i hehd tawd ghawg daq che awg gha lia haq te peg vid che yaog.
17 Ghig sa liz, yawd duhd chez lar che ted ceng maq pa vix che awg lawn, kar tiq sax caz gha lar che chaw teq pa haq lex lehq kha nehax mar vid gad che te yand, yawd awg ton khanr che ted ceng haq te che yaog.
18 Kar tiq te vid che ted ceng he lehq khanr che ted ceng, che nid ceng haq te lehq a nig pong kig lo phaw gehag che chaw teq pa awr lehr, a nig mehz khuhd suhr huh cawg lar che duhd law lar che ted ceng haq yeg chawa yug cid lar tug, a nig haq awg ghad pehar che yaog. Maq pa vix che nid ceng awg khuhn, Ghig sa awr lehr her ka maq gha.
19-20 Duhd law che che ve awr lehr, a nig ved ni ma awg pun yeg lehq ma jiz veh vix tug son kuhq luhq heh te lehq, bon yehg nux khuhn pha thed lar che nid mag ted mag awg khuhn phawd awr lo kae lehq daq kehg jad che chehd kig lo gha gehg che Yer suq yaog. Mar lar khiq sar dehq paw khod nux te che awg khad heh te lehq Yer suq awr lehr, co co taer taer paw khod nux phehq vehr lehq, a nig awg pun yawd u huh awg kawd gehe lar peg che yaog.