26
Yer suq haq dawz vehr tug awg hox teq pa jehg daq che
1 Awg lawn u ve teq pa haq Yer suq saw koz lar haz peg lehq, yawd ved awg laq ghuhd teq pa haq yawd koz vid che,
2 “Che khaz nuhr niq ni gaeg ver Par sar khar pawehd gag tug haq nig hehd liz sir chehd che yaog. Chaw yad ve Yad phu haq laq kan thag huh thaq vehr tug chid aq vid che haq yawd gha khanr tug yaog,” lehd koz vid che yaog.
3 Kheh te lehq, paw khod nux teq pa he lehq Yud daq chaw teq pa ve awg hox chaw mawd teq pa vawr, Kar yar phaq meh che paw khod nux ve chehd kig lo jehg daq lehq,
4 Yer suq haq khawd-ehg kheh te pheh yug lehq dawz vehr gha tug, i hehd awg khad ca lehq khuhd jehg daq che yaog.
5 Kheh ma khuhd i hehd koz daq che, “Muhd mig yad teq pa maq gha kaod suq saq tug pawehd te chehd che awg yand che ve khuhn taq te ser,” lehd koz daq che yaog.
Yad mid te ghad Yer suq ve a kor haq nag mad huhx gehz vid che
6 Yer suq Ber tar niq khaz khuhn khir tuq phehq jaw che phad Sid monr ve yehg khuhn chehd chehd thad huh,
7 yad mid te ghad yawd chehd lo lag lehq, awg phuhd khaz jad che nag mad huhx ke lar che a kaw phua ted mag yug veha lag lehq, Yer suq teh cuh pad huh awr mi cad chehd che haq yawd ved a kor thag huh nag mad juhd puhr vid che yaog.
8 Yawd che kheh te che haq awg laq ghuhd teq pa gha mawg che te yand, i hehd teq pa nez nag jad lehq koz che, “A thoq te lehq teq chaweh awg bon mad cawg kig huh che ve haq yehd bag vehr cheawg le.
9 Nag mad huhx che ve haq yug ve lehq, awg phuhd pehz khaz mehz ca huhd lehq har yad ghuhd yad teq pa haq pehg vid gha che yaog,” lehd koz vid che yaog.
10 Yer suq awg lawn che ve haq gha kad che te yand, i hehd haq koz vid che, “A thoq te lehq yad mid che ve haq te soq saq vid cheawg le. Yawd ngag haq daq che awg ceng tea che yaog.
11 Har yad ghuhd yad teq pa vawr, nig hehd geh khar thad liz chehd che yaog. Kheh ma khuhd ngag vawr, nig hehd geh khar thad liz ma chehd chehd hawg.
12 Nag mad huhx che ve ngag ved awg ton haq nger puhr che awr lehr, ngag awg ton haq tur ax tug awg pun yawd ghu lar che yaog.
13 Ngag nig hehd haq awg cehg mag koz ax laq, ha lehg che bon khuhd che ve mig gig khod-aq lo khar lo ca mar vid-eg liz, yad mid che ve haq duhd nuhd vid tug awg pun yawd te lar che kanx che ve haq koz mar vid tug yaog,” lehd koz che yaog.
Yer suq haq chid aq vid tug Yud daq te che
14 Awg yand u ve haq, awg laq ghuhd teq chi ni ghad awg khuhn chehd che, Yud daq Id sar kar rir oq meh che te ghad paw khod nux teq pa geh kae lehq,
15 “Yer suq ve awg ton nig hehd haq chid aq ax ver, ngag haq khawd-ehg ma pehar lawg le,” lehd koz vid che yaog. Kheh te lehq i hehd teq pa yawd haq phu sehz chi thehq pid che yaog.
16 Awg yand u ve haq tanr lehq, Yer suq ve awg ton su haq chid aq vid tug, awg yand daq che haq lehax Yud daq ca chehd che yaog.
Yer suq yawd ved awg laq ghuhd teq pa geh Par sar khar pawehd cad che
17 Khaor mod awg khuhn did maq ke che pawehd awg kawd maq ve teq ni haq, awg laq ghuhd teq pa Yer suq chehd lo lag lehq koz che, “Nawg awg pun Par sar khar pawehd cad tug, khar lo ted kag ngag hehd haq ca ghu cuha vid gad lehq le,” lehd koz na ngawx che yaog.
18 Yer suq kawq koz vid che, “Med khuhn lo gehe lehq haw khaz var u ve te ghad chehd lo kae lehq, ‘Sar lar koz che, “ngag ved awg yand gag vehr tez-og. Nawg ved yehg khuhn ngag ved awg laq ghuhd teq pa geh teq geha Par sar khar pawehd haq ngag cad tug yaog,” ced,’ lehz yawd haq koz vid-eq,” lehd awg laq ghuhd teq pa haq koz vid che yaog.
19 Kheh te lehq, Yer suq koz vid che heh awg laq ghuhd teq pa kae lehq, Par sar khar pawehd cad tug awg pun ca ghu che yaog.
20 Muhd phiq muhd sux naz vehr huh, Yer suq awg laq ghuhd teq chi ni ghad geh teh cuh pad huh awr mi cad chehd che yaog.
21 I hehd teq pa awr phoz cad chehd-ag huh, Yer suq koz vid che, “Ngag nig hehd haq awg cehg mag koz ax laq, nig hehd awg khuhn ve chaw te ghad ngag haq kawq phuhz lehq su haq chid aq vid tug yaog.”
22 I hehd teq pa duhd har jad che khuhn, “Jawd mawd-og, ngag la,” lehd koz lehq te ghad peg te ghad yawd haq kawq na ngawx che yaog.
23 Yer suq kawq koz che, “Ngag geh teq geha a khehd ted mag khuhn lehax cad chehd che chaw te ghad, ngag haq su ved laq khuhn chid aq vid tug yaog.
24 Chaw yad ve Yad phu awr lehr, yawd ved awg lawn Liq phu khuhn buhq lar peg che heh te lehq yawd gha kae tug yaog. Kheh ma khuhd, chaw yad ve Yad phu haq chid aq vid che chaw te ghad awr lehr, gha duhd har jad tug yaog. Chaw u ve maq pawag che heh ver, yawd awg pun lex lehq daq jad che yaog,” lehd koz vid che yaog.
25 Yawd haq kawq phuhz var Yud daq koz che, “Jawd mawd-og, ngag awr la,” lehd koz na ngawx che te yand, “Yaog, nawg yaog,” lehz Yer suq yawd haq kawq koz vid che yaog.
Jawd mawd Yer suq ve pawehd cad che
26 I hehd teq pa phoz cad chehd huh, Yer suq khaor mod haq yug lehq bon haq chid muh che yaog. Kheh te peg lehq yawd khaor mod haq yug lehq khehq lehq awg laq guhd teq pa haq yawd pid lehq koz che, “Yug lehq cad-oq. Che ve awr lehr ngag ved awg ton yaog,” lehd koz vid che yaog.
27 Kawz khehd haq liz yawd yug lehq bon haq chid muh peg lehq, i hehd teq pa haq pid lehq koz che, “Nig hehd awg gha lia che ve haq dawr-oq.
28 Awg lawn ghod ver, che ve awr lehr kar tiq sax caz haq caz daq che ngag ved awg suhr yaog. Chaw kha peh vad-ag vend bax gha pong tug awg pun ngag ved awg suhr nger puhr che yaog.
29 Ngag nig hehd teq pa haq koz ax laq, Awr pa ve muhd mig awg khuhn lo nig hehd geh teq geha a pehx med ghig awg suhx haq ngag gha dawg tug awg ni kha gag, ngag a pehx med ghig haq mad kawq dawg-og,” lehz i hehd haq koz vid che yaog.
Per troq Yer suq haq chid bag tug awg lawn Yer suq koz vid che
30 Kheh te peg lehq, i hehd teq pa Ghig sa haq liq khuhd ka chid muh lar haz lehq tuhez lehq Sar lonr khehaq lo kae che yaog.
31 Awg yand u ve khuhn Yer suq i hehd haq koz vid che, “Yaq pehax nig hehd awg gha lia ngag haq saw chid bag lar haz lehq phaw veh tug yaog. Awg lawn ghod ver, ‘Yawg huhx var haq ngag dawz vehr lehq, yawg teq pa ted mag ted kag lo phaw veh tug yaog,’ lehz Liq phu khuhn buhq lar che yaog.
32 Kheh ma khuhd, ngag kawq teq tuag ver, nig hehd haq keh awg kawd Gar liq lehd muhd mig lo ngag kae tug yaog,” lehd koz vid che yaog.
33 Per troq koz che, “Su awg gha lia nawg haq saw chid bag lar haz lehq phaw veh liz, ngag awr lehr u kheh maq ca te hawg,” lehz yawd haq koz vid che yaog.
34 Yer suq Per troq haq koz vid che, “Ngag nawg haq awg cehg mag koz ax laq, yaq pehax ghaz mad buhg ser huh, nawg ngag haq maq sir daq lehz sehr pawz koz tug yaog,” lehd koz vid che yaog.
35 Per troq koz che, “Ngag nawg geh gha suh liz, ngag nawg haq maq ca chid bag lar haz hawg,” lehd koz vid che yaog. Kheh te lehq awg laq ghuhd teq pa liz u kheh saw koz vehr che yaog.
Yer suq Ger ser mar niq kho khuhn bon ca laweg che
36 Kheh te peg lehq Yer suq awr lehr, yawd ved awg laq ghuhd teq pa geh kae lehq, Ger ser mar niq lehd koz che ted kag lo gaeg che yaog. Yawd koz che, “Ngag ox lo bon ca laweg chehd-ag huh, nig hehd chuhr huh mir lar-oq,” lehz awg laq ghuhd teq pa haq koz vid che yaog.
37 Kheh te peg lehq, Per troq he lehq Yer ber dehd ve awg yad par ni ghad haq yawd sir ve kae che yaog. Awg yand u ve khuhn yawd ved ni ma khuhn duhd har lehq phehq bawg jad che yaog.
38 I hehd haq koz vid che, “Ngag ved ni ma duhd har jad che suhag lehd tea. Chuhr huh chehd lehq ngag geh teq geha law lar-oq.”
39 Kheh te lar haz lehq, yawd awg nuz awr a cehax kawq kae lar lehq, yawd ved mehz khuhd miaq lo boz cuhx lar lehq koz che, “Ngar paog, kawz che ve ngag haq pong gha ver, pong ax laoq. Kheh ma khuhd, ngag ved a lor cawd che heh tad phehq vid. Nawg ved a lor cawd che heh phehq vid-oq,” lehd koz bon lawg che yaog.
40 Awg laq ghuhd teq pa geh yawd kawaq lehq, i hehd yuhq mir ka chehd lawz che haq gha mawg che te yand, Per troq haq koz vid che, “Teq nar rir nehax liz nig hehd ngag haq law lar maq gha cheawg la.
41 Nig hehd ber che lawd che awg khad khuhn maq gha kae tug bon lawg lehq law lar-oq. Nig hehd thed cawd che haq te gad che ni ma cawg liz, awg suhr awg sar phawd awr awg ghad nud che yaog,” lehd koz che yaog.
42 Yawd ni pawz te pawz kawq kae lehq, “Ngar paog, kawz che ve haq ngag mad dawg lehq mad pong gha che ver, nawg a lor cawd che heh phehaq vid-oq,” lehd koz bon kawq lawg che yaog.
43 Kheh te lehq, yawd te pawz kawq kawaq liz, i hehd yuhq mir geq jad che mehz phaw ma ghad cheaq te lehq yuhq mir ka chehd che haq yawd gha mawg che yaog.
44 Kheh te lehq, yawd i hehd haq teh lar haz lehq sehr pawz te pawz liz, yawd lawg jaw che heh te lehq, bon ca kawq laweg che yaog.
45 Awg yand u ve haq, awg laq ghuhd teq pa geh yawd te pawz kaw kawaq lehq koz vid che, “Nig hehd teq pa yuhq mir ka lehq awg ghad jehd chehd ser cheawg la. Chaw yad ve Yad phu haq, vend bax yad ve laq khuhn chid aq vid tug awg yand gag vehr che yaog.
46 Tu lor. Kae veg. Ngawx lor. Ngag haq kawq phuhz lehq chid aq vid che phad lag gag vehor,” lehd koz vid che yaog.
Yer suq haq pheh yug che
47 Yer suq tawd yaw chehd che mad peg tand, cuh yad teq chi ni ghad awg khuhn chehd che Yud daq meh che te ghad lag lehq, a teh puhd lehq suhz tag taz che chaw awg mor nux liz yawd geh ga lag che yaog. Chaw mor nux u ve teq pa awr lehr, paw khod nux teq pa he lehq Yud daq chaw teq pa ve awg hox chaw mawd teq pa cuh peha lar che chaw teq pa yaog.
48 Yawd haq chid aq vid che chaw te ghad awr lehr, i hehd haq awg hez che kheh te tug yaog lehd koz che yoag. “Ngag bux vid che phad awr lehr, yawd yaog. Yawd haq yug pheh lor,” lehz koz che yaog.
49 Kheh te lehq, Yud daq Yer suq chehd lo thed-eg ghad gehag lehq, “Jawd mawd-og, awg bon ir vid-oq,” lehd koz lehq, yawd haq bux vid che yaog.
50 Yer suq yawd haq koz vid che, “Awg chawd-og, nawg duhd lar che heh har naq teoq,” lehz yawd haq koz vid che yaog.
Kheh te lehq, i hehd teq pa gehag lehq Yer suq haq yug cid lar lehq pheh vehr che yaog.
51 Awg yand u ve khuhn, Yer suq geh chehd chehd che chaw te ghad, yawd ved a teh ghawg tuhaz lehq paw khod nux vig lar che awg ceg var te ghad ve nar puh chuh chez vehr che yaog.
52 Kheh te lehq Yer suq yawd haq koz vid che, “Nawg ved a teh haq awg phi khuhn kawq khuhq keoq. Awg lawn ghod ver, a teh haq kha yehd che chaw vawr, a teh haq te lehq suh tug yaog.
53 Muhd nuh maq cuh yad teq chi niq mor haq keh mad che liz ngag haq lag ga vid tug a meha ngag Awr pa geh lawg maq gha hawg lehz nawg duhd cheawg la.
54 Kheh ma khuhd, ngag u kheh te lawg ver, che kheh gha phehaq tug yaog lehd koz lehq Liq phu khuhn buhq lar che teq pa heh khawd-ehg kheh te ca phehq lag gha tuawg le,” lehd koz che yaog.
55 Awg yand u ve khuhn Yer suq chaw awg mor nux haq koz vid che, “Nig hehd teq pa vawr chaw khuhd haq ca phehag che heh te lehq a teh puhd lehq suhz tag taz veha lehq ngag haq ca phehag cheawg la. Ni gha lia bon yehg nux khuhn ngag mi lar lehq mar vid chehd huh liz, nig hehd ngag haq maq ca phehag.
56 Kheh ma khuhd, che kheh phehaq tug awr lehr, Ghig sa ve cuh kar var teq pa ve liq khuhn buhq lar che heh saw phehaq tug awg pun yaog,” lehd koz che yaog.
Awg yand u ve haq, awg laq ghuhd awg gha lia yawd haq saw chid bag lar haz lehq phaw veh che yaog.
Yud daq chaw ve Jehg daq var awg mor Yer suq haq suhx jehg che
57 Yer suq haq yug pheh ve che chaw teq pa awr lehr, paw khod nux Kar yar phaq ve yehg lo yug ve kae che yaog. U huh, liq buhq var he lehq awg hox chaw mawd teq pa phawng daq chehd che yaog.
58 Per troq awr lehr, paw khod nux ve sax nanx awg pad huh kho ko lar kig huh kha gag Yer suq khaz nuhr vid viad lo ghaq kae lehq, awg lawn che ve haq awg leh med kha gag gha sir gha mawg tug, yawd gehe lehq saw par teq pa geh mi chehd che yaog.
59 Paw khod nux teq pa he lehq phawng daq chehd che chaw awg gha lia awr lehr, Yer suq haq gha dawz vehr tug, yawd awg lawn ma hez hez che sax khiz haq ca che yaog.
60 Ma hez hez che sax khiz khanr var kha peh vad-ag cawg liz, jehg sehr phad teq pa teq chaweh sax khiz yug te tug ca mad mawg. Awg leh med lo gaeg lehq, ma hez hez che sax khiz khanr var ni ghad tuhaz lehq koz che,
61 “Chaw che ve phad koz che, ‘Ghig sa ve bon yehg nux haq ngag te lug lehq, sehr ni awg khuhn lo lehax kawq te gha hawg,’ ” lehz ix mag sax khiq khanr che yaog.
62 Awg yand u ve khuhn paw khod nux tuag lehq koz che, “Chaw che ve phad nawg haq awg lawn sax khiz khanr chehd che yaog. Nawg teq chaweh liz ma koz khuhq vehr cheawg la,” lehd Yer suq haq na che yaog.
63 Kheh liz, Yer suq taq chuh-ax ghad chehd chehd che yaog. Paw khod nux yawd haq kawq koz vid che, “Ghig sa ve Yad phu Khreq lehd koz che te ghad awr lehr, nawg yaog la. Ngag hehd haq koz ax tug, teq chehd che Ghig sa ve mehz khuhd suhr ngag nawg haq khanr cuha che yaog,” lehd koz che yaog.
64 Yer suq kawq koz vid che, “Nawg koz che heh yaog. Kheh te lehq, ngag nig hehd haq awg cehg mag koz ax laq, che khaz nuhr ver chaw yad ve Yad phu vawr, kand pax ir jad che awg sehr phad ve laq yaq awr phawd awr mi lar lehq, mog khuhn yaq che haq nig hehd gha mawg tug yaog,” lehz yawd haq koz vid che yaog.
65 Kheh te lehq paw khod nux yawd ved beg ke veq kad haq juhq seh lehq koz che, “Chaw che ve phad awr lehr, awg cehg mag Ghig sa haq maq sawnr ma caz koz che yaog. A nig sax khiz a thoq haq kawq ca sar le. Yawd Ghig sa haq maq sawnr ma caz koz che haq a meha chuhr huh nig hehd gha kad vehor.
66 Nig hehd teq pa khawd-ehg kheh duhd-aq le,” lehd koz na ngawx che te yand, “Yawd vawr suh kenr vehr che yaog,” lehz i hehd teq pa koz che yaog.
67 Kheh te lehq, su yawd ved mehz khuhd khuhn cux ghig pheq puhr lehq chung phehd lehq, ted pehg vawr mehz khuhd khuhn tha ke vid che yaog.
68 Kheh te peg lehq yawd haq na che, “Khreq-og, nawg haq a sug dawz che law le. Ghig sa ve cuh kar var heh te lehq ngag hehd haq koz ax laoq,” lehd koz vid che yaog.
Per troq Yer suq haq chid bag che
69 Awg yand u ve haq Per troq sax nanx yehg awg bag huh mi chehd lehq, awg ceg ma te ghad yawd chehd-ag huh lag lehq koz che, “Nawg liz Gar liq lehd chaw Yer suq geh chehd che yaog,” lehd koz che yaog.
70 Kheh ma khuhd, Per troq chaw kheh ma ve mehz khuhd suhr huh her ka lehq koz che, “Nawg koz chehd che ix ve haq ngag maq sir,” lehd koz che yaog.
71 Kheh te peg lehq Per troq yehg ghaz mir khuh bag lo tuhez thad huh, awg kag awg nuz awr ve awg ceg ma te ghad yawd haq mawg lehq u huh chehd che chaw teq pa haq koz vid che, “Che ve phad awr lehr Nar sar rehq chaw Yer suq geh chehd che yaog,” lehd koz vid che yaog.
72 Per troq te pawz kawq her ka lehq koz che, “Chaw u ve phad haq ngag maq sir daq,” lehd koz lehq khanr che yaog.
73 Teq per nehax heh gaeg lehq, u huh hox chehd che chaw teq pa Per troq chehd lo lag lehq, “Nawg liz awg cehg mag i hehd awg mor khuhn chehd che chaw te ghad phehq che yaog. Awg lawn ghod ver, nawg tawd yaw che khuhd haq lehax na liz, ngag hehd sir che yaog,” lehz yawd haq koz vid che yaog.
74 Kheh te lehq Per troq khen lehq, “Chaw u ve phad haq ngag maq sir daq,” lehd koz lehq khanr che yaog. Yawd u kheh koz chehd che awg yand awg khuhn ghaz buhg vehr che yaog.
75 “Ghaz mad buhg ser huh nawg ngag haq sehr pawz kha gag chid bag tug yaog,” lehz Yer suq koz vid lar che haq Per troq kawq duhd nuhd vehr che yaog. Kheh te lehq, yawd tuhez lehq duhd har jad che khuhn hax ceh huhg che yaog.