☰ Rod maq liq 10
10
1 A vix a nax teq paog, ngag ved ni ma he gad che he lehq Ghig sa geh ngag bon lawg che awr lehr, i hehd Id sar rer laq chaw teq pa thaer khuhq che haq gha tug awg pun yaog. 2 Awg lawn ghod ver, i hehd awr lehr Ghig sa awg pun ni ma puhd jad che haq ngag sax khiz khanr che yaog. Kheh liz, i hehd sir lehq te che ted ceng ma hez. 3 Ghig sa ve thed che cawd che* haq i hehd maq sir gad lehq, a sug yawd ved thed che cawd che† haq yug cid tug khar thad liz cud cad te chehd cheaq te lehq, i hehd ni ma ma nud nehg lehq Ghig sa ve thed che cawd che haq mad haq yug vehr che yaog. 4 Awg lawn ghod ver, kha yonr che chaw awg gha lia thed che cawd che chaw phehaq tug, Khreq awr lehr awg lid tawd khuhd haq te peg vid che‡ yaog.
5 Mod ser awr lehr, awg lid tawd khuhd haq caz daq che thed che cawd che awg lawn haq che kheh koz buhq lar che yaog. †Awg lid tawd khuhd haq te che chaw awr lehr, awg lid tawd khuhd haq te lehq co ha gha teq tug yaog. 6-7 †Kheh ma khuhd, yonr che haq caz daq che thed che cawd che ted ceng awr lehr che kheh koz che yaog. †Muhd nuh maq lo a sug taez tuawg le.§ Nax jad kig lo a sug yaeq tuawg le lehz ni ma awg khuhn ta duhd lehd koz che yaog. (Che kheh koz che awr lehr, Khreq haq ca sir veha lehq yaq vid tug, muhd nuh maq lo a sug taez tuawg le. Khreq haq suh kig lo kawq teq tuag vid tug, nax jad kig lo a sug yaeq tuawg le lehd koz gad che yaog.) 8 Kheh ma khuhd, yonr che haq caz daq che thed che cawd che ted ceng a thoq koz cheawg le. Ghig sa ve tawd khuhd awr lehr,* nawg haq ned jad che yaog. Nawg ved mawq kaw awg khuhn liz, nawg ved ni ma awg khuhn liz cawg che yaog lehd koz che yaog. (Tawd khuhd u ve awr lehr, ngag hehd mar vid che yonr che haq caz daq che tawd khuhd haq koz gad che yaog.) 9 Yer suq awr lehr Jawd mawd† phehq che yaog lehz nawg ved mawq kaw khanr yug lehq, Ghig sa awr lehr yawd haq suh kig lo kawq teq tuag vid vehr che haq nawg ved ni ma awg khuhn yonr ver, nawg thaer khuhq che haq gha tug yaog. 10 Awg lawn ghod ver, chaw yad awr lehr ni ma khuhn yonr cheaq te lehq yawd haq thed che cawd che chaw phehaq vid vehr lehq, mawq kaw khanr yug cheaq te lehq thaer khuhq che haq gha vehr che yaog. 11 Awg lawn ghod ver, Liq phu khuhn koz lar che, †Yawd haq kha yonr che chaw awg gha lia awr lehr, maq gha yaq taw tug yaog lehd koz lar che yaog. 12 Awg lawn ghod ver, Yud daq chaw he lehq Her lar saq chaw pen daq kig mad cawg.‡ Chaw awg gha lia haq uq penr che Jawd mawd awr lehr, te ghad lehax cawg lehq yawd haq kha kug ca che chaw awg gha lia haq yawd awg bon kha peh vad-ag pid che yaog. 13 Awg lawn ghod ver, †Jawd mawd Ghig sa ve awg meh haq kha kug ca che chaw awg gha lia awr lehr, thaer khuhq che haq gha tug yaog.
14 Kheh ma khuhd, yawd haq maq yonr ver, khawd-ehg kheh te lehq yawd haq kug ca tuawg le. Yawd awg lawn haq maq gha kad jaw ver, khawd-ehg kheh te lehq yawd haq yonr tuawg le. Mar vid sehr phad mad cawg ver, khawd-ehg kheh te lehq gha kad tuawg le. 15 Kheh te lehq, chaw haq maq kae pe ver, khawd-ehg kheh te lehq mar vid gha tuawg le. Che haq kha sur suar, †Ha lehg che bon khuhd mar vid sehr phad teq pa ve khi kud awr lehr, khawd-ehg taw maq ngawx sa jad§ cheawg le lehz Liq phu khuhn buhq lar che yaog. 16 Kheh liz, chaw awg gha lia ha lehg che bon khuhd haq na yug che ma hez. Awg lawn ghod ver, Id sar yaq koz che, †“Jawd mawd-og, a nig mar vid che tawd khuhd haq a sug yonr cheawg le,” lehd koz lar che yaog. 17 Kheh te cheaq te lehq yonr che awr lehr, gha kad che haq te lehq yaog. Gha kad che liz, Khreq ve awg lawn su mar vid che haq te lehq yaog.
18 Kheh ma khuhd ngag koz che awr lehr, i hehd maq gha kad lehq la. Gha kad cehg mag che yaog. Awg lawn ghod ver, Liq phu khuhn koz lar che heh,
†“I hehd ve awg khuhd awr lehr,
mig gig khod-aq awg kag gha lia lo buhg veh lehq,
i hehd ve tawd khuhd awr lehr, mig gig awg leh kha gag, gag vehr che yaog.”
19 Kheh ma khuhd, te pawz ngag kawq na ngawx che, Id sar rer laq chaw teq pa na maq gha lehq la.* Mod ser koz che,
†“Bid saz a naz chaw ceng teq pa haq nig hehd khawehx tug ngag te lehq,
cud yiq mad cawg che chaw ceng haq te lehq
nig hehd nez nag tug ngag te tug yaog,”
lehz awg kawd maq thad loar koz lar che yaog. 20 Id sar yaq liz ni ma tag che khuhn te lehq koz che,
†“Ngag haq maq ca che† chaw teq pa awr lehr, ngag haq gha mawg vehr che yaog.
Ngag ved awg lawn haq maq na ngawx che
chaw teq pa haq ngag ved awg lawn sir vid vehr che yaog,”
lehd koz che yaog. 21 Kheh ma khuhd, Id sar rer laq chaw teq pa awg lawn yawd koz che,
†“Maq na yug lehq tawd kawq sang vix che chaw ceng‡ haq haq yug tug,
teq ni muhd kha phiq ngag ved laq kuhr che law chehd che yaog,”
lehd koz che yaog.
* 10:3 Ghig sa ve thed che cawd che Yonr cheaq te lehq gha che thed che cawd che haq koz che yaog. 1:17 † 10:3 a sug yawd ved thed che cawd che Kanx te che haq lehax yug cid chehd che haq koz che yaog. ‡ 10:4 awg lid tawd khuhd haq te peg vid che Awg leh med gag vehr vid che haq koz che yaog. Kheh te cheaq te lehq, Khreq yad teq pa awr lehr awg lid tawd khuhd awg huhx ma chehd-og. 6:15 † 10:5 Ak 18:5 † 10:6-7 Bon 30:12-14 † 10:6-7 Bon 9:4 § 10:6-7 Muhd nuh maq lo a sug taez tuawg le Bon 30:12-13 khuhn, awg lid tawd khuhd haq koz gad che liz, chuhr huh Yer suq haq koz gad che yaog. * 10:8 Ghig sa ve tawd khuhd awr lehr Ha lehg che bon khuhd haq koz gad che yaog. † 10:9 Jawd mawd Her brehd khuhd “Ya hod va” lehd koz che haq Her lar saq khuhd “Jawd mawd” lehd kawq koz lar che yaog. † 10:11 Isy 28:16 ‡ 10:12 pen daq kig mad cawg Thaer khuhq gha tug Yud daq chaw liz, bid saz a naz chaw liz Yer suq haq lehax gha cud che yaog. † 10:13 Yl 2:32 † 10:15 Isy 52:7 § 10:15 khi kud … ngawx sa jad Bar bud lunx muhd mig khuhn su ceg te chehd che haq pong vid tug daq che awg lawn awg tand yug veha lag che heh, vend bax ve awg ceg te chehd che chaw haq pong vid tug bon khuhd ca mar vid che haq koz che yaog. † 10:16 Isy 53:1 † 10:18 Chid 19:4 * 10:19 na maq gha lehq la Cud yiq mad cawg che bid saz a naz chaw teq pa sir lehq na gha che ver, Yud daq chaw teq pa lex lehq sir cawd che yaog, lehd koz gad che yaog. † 10:19 Bon 32:21 † 10:20 Isy 65:1 † 10:20 Ngag haq maq ca che Bid saz a naz chaw haq koz che yaog. † 10:21 Isy 65:2 ‡ 10:21 Maq na yug lehq tawd kawq sang vix che chaw ceng Maq yonr vix che Id sar rer laq chaw teq pa haq koz che yaog.
☰