14
Yonr che ni ma awg ghad nud che chaw awg lawn
1 Yonr che khuhn awg ghad nud che chaw haq haq yur-oq. Kheh ma khuhd, duhd khad maq hawr daq che teq pa awg lawn yawd geh tawd ghawg daq che taq te.
2 Chaw te ghad awr lehr, cad tug awg ceng gha lia haq cad gha che lehz yonr che yaog. Kheh ma khuhd yonr che khuhn awg ghad nud che chaw te ghad awr lehr, ghawd phaq muhg nuha haq lehax cad che yaog.
3 Awg ceng gha lia haq cad che chaw awr lehr, ma cad che chaw haq maq sawnr ma caz maq gha te. Ma cad che chaw liz, cad che chaw haq vend bax maq gha tar. Awg lawn ghod ver, Ghig sa awr lehr yawd haq haq yug vehr che yaog.
4 Nawg awr lehr, a suawg le, su ved awg ceg haq vend bax tar che. Yawd cawd che lehd ma koz, yaq che lehd ma koz, yawd ved awg jawd mawd haq cawg che yaog. Kheh te lehq, Jawd mawd Yer suq Khreq yawd haq cawd che yaog lehz sawnr tug yaog. Awg lawn ghod ver, Jawd mawd Yer suq Khreq awr lehr yawd haq ga vid gha tug kand pax cawg che yaog.
5 Chaw te ghad awr lehr, awg ni teq ni haq awg kag awg nuz awr ve awg ni teq pa haq keh tar ir che yaog. Kheh te lehq, awg kag awr ve chaw te ghad awr lehr, awg ni awg gha lia kha sur suar yaog lehz sawnr lar che yaog. Chaw awg gha lia a sug yawd ni ma khuhn kha nehax duhd chez lor.
6 Awg ni haq tar ir che chaw te ghad awr lehr, Jawd mawd Yer suq haq duhd nuhd lehq tar ir che yaog. Awg ceng gha lia haq cad che chaw te ghad liz, Jawd mawd Yer suq haq duhd nuhd lehq cad che yaog. Awg lawn ghod ver, yawd Ghig sa haq chid muh lehq cad che yaog. Ma cad che chaw te ghad liz, Jawd mawd Yer suq haq duhd nuhd che awg khuhn cad tug ce lehq Ghig sa haq chid muh che yaog.
7 Awg lawn ghod ver, a nig awg khuhn a sug lehd ma koz, a sug yawd awg ton awg pun teq chehd che ma hez. A sug lehd ma koz, a sug yawd awg ton awg pun suh che ma hez.
8 A nig teq che awr lehr, Jawd mawd Yer suq awg pun teq che yaog. A nig suh che liz, Jawd mawd Yer suq awg pun suh che yaog. Kheh te lehq teq che lehd ma koz, suh che lehd ma koz, a nig awr lehr Jawd mawd Yer suq ve med nged phehq che yaog.
9 Awg lawn ghod ver, suh vehr che chaw haq liz, teq chehd che chaw haq liz uq penr tug, Khreq khanr suh lehq kawq teq tuag che yaog.
10 Nawg awr lehr, a thoq ted ceng haq te lehq nawg ved a vix a nax haq vend bax tar cheawg le. A thoq ted ceng haq te lehq, nawg ved a vix a nax haq maq sawnr ma caz te cheawg le. Awg lawn ghod ver, a nig awg gha lia Ghig sa ve suhx jehg suhx taz kig kaw jaw mehz khuhd suhr huh gha gag tug yaog.
11 Awg lawn ghod ver, Liq phu khuhn buhq lar che,
Jawd mawd Ghig sa koz che, Ngag teq chehd che heh
ngag mehz khuhd suhr huh chaw awg gha lia nar kheh teh mi lar lehq,
mawq kaw awg mag gha lia Ghig sa haq chid muh tug yaog,
lehd koz buhq lar che yaog.
12 Kheh te cheaq te lehq, a nig awg gha lia a sug yawd awg ton awg lawn Ghig sa haq gha koz mar vid tug yaog.
13 Kheh te cheaq te lehq, yaq ni khaz nuhr te ghad haq te ghad vend bax tad kawq tar daq. A vix a nax khi thid pog par lehq te yaq tug ngag maq teog lehz, nig hehd duhd chez lar lor.
14 Jawd mawd Yer suq awg khuhn ngag chehd cheaq te lehq, cad tug a thoq ted ceng lehd ma koz, yawd khad yawad chaq chiz che ted cear liz mad cawg lehz ngag sir lehq yonr che yaog. Kheh liz, chaw te ghad awr lehr, cad tug ted ceng cear haq chaq chiz che lehz yawd sawnr ver, yawd awg pun chaq chiz che ted ceng phehq che yaog.
15 Awg lawn ghod ver, cad tug dawg tug haq te lehq nawg ved a vix a nax gha duhd har ver, nawg awr lehr haq pehnd che awg khad haq kae tod che ma hez. Nawg ved cad tug haq te lehq nawg ved a vix a nax haq taq te lug vid. Yawd awg pun liz Khreq khanr suh lar peg che yaog.
16 Nawg awg pun daq che ted ceng lehz sawnr lar che haq su mad daq che awg ceng koz tug tad cawg vid.
17 Awg lawn ghod ver, Ghig sa ve muhd mig awr lehr, cad tug dawg tug awg ceng ma hez. Kheh ma khuhd, Daq che kehg che Awg ha phu haq te lehq thed che cawd che, duhd sa gad sa che he lehq ha lehg che awg ceng phehq che yaog.
18 Khreq awg pun che kheh te kanx te che chaw haq Ghig sa ni ma cawd lehq, chaw yad liz yawd haq tar ir che yaog.
19 Kheh te cheaq te lehq cawd daq hawr daq tug he lehq te ghad he lehq te ghad ir lag muh lag tug, khar thad liz te kae veg.
20 Cad tug dawg tug haq te lehq Ghig sa ve kanx haq taq te lug vid. Awg gha lia awr lehr daq kehg che yaog. Kheh ma khuhd, cad che haq te lehq su khi thid pog lehq kuhd che ver, cad che chaw te ghad awr lehr te yaq che yaog.
21 Sar cad che lehd ma koz, a pehx med ghig dawg che lehd ma koz, a thoq ted ceng te che lehd ma koz, nawg ved a vix a nax khi thid pog par tug te che ver, maq te cawd che yaog.
22 Nawg yonr che ted ceng awr lehr nawg he lehq Ghig sa nig mag haq lehax teh lar-oq. A sug yawd ved ni ma khuhn cawd che yaog lehz sawnr lar che awg ceng haq te lehq, a sug yawd awg ton haq vend bax tar kig mad cawg ver, ha lehg che chaw phehq che yaog.
23 Kheh ma khuhd, yonr che awg khuhn ni ma thuhd duhd nuhg duhd te che chaw te ghad cad ver, yonr che ni ma mad cawg lehq cad cheaq te lehq, suhx jehg suhx taz che haq gha khanr che yaog. Awg lawn ghod ver, a thoq ted ceng lehd ma koz, yonr che ted ceng awg khuhn lag che ma hez ver, vend bax phehq che yaog.