14
Ndramas ari le mwasin ta Malawin Ndrabun
1 Ya, aha badeh, ka-en hamon ta kandriyen ta adeu ndrine aha ta aso-ok ndramak ari, ari. Kandriyen le doh udu bwele-en mara-ei. Ma aha ale kaso-ok labai ta akohok iri ndramas, Malawin Ndrabun edeu eme tataha. Handru, ndramas ari le mwasin labai, aha ale asa-ar ma atehei budon taha ta akohok badeh, gok propet. Idoh le badeh, iy katin ta atiye sahou mara-ei ta Kindrei.
2 I buku ou akohok ndramas ta asehek boho kon randrah ja, ale iri lau rayah tana iri bwe, ou asehek amwenen ili ta Kindrei. Iy le ari badeh, tanan iri lakou marakon nane ou asehek. Ari ndramak ja winiya bala tanan ta moso iri sahou nane ou asehek ta aliy bwe. Ou asehek lakou Malawin Mwasin le ari tanan.
3 Arile, buku ou asehek sahou boho Kindrei, ou asehek amwenen ili tiri lau. Iri sahou tam nane doh atadau budon tiri abadok, sekeyani iri ta amekes kandriyen mwasin, ma amekes ndrine iri udu mwasin labai.
4 Are ndramak iy asehek boho kon randrah ja, idoh badeh, aseben ndrinen le ari udu mwasin. Arile iy ndramak iy asehek sahou ta Kindrei, iy ndramak doh badeh, iy atadau ma amekes budon tiri lau ta Kindrei abadok.
5 Jo Pol, jo aso-ok aha lau marakon ki tana aha ta asehek iri boho kon rakon ja. Arile, lakou ari jo aso-ok tinan labai ja badeh, ta aha katiye sahou ta Kindrei. Are lau iy tanan boho iri kon rakon ja, iy katobolowe iri sahou, idah kameh iri lau ta Kindrei winiya akohok boto-on ta iri sahou tan. Buku iy batobolowe iri sahou bwe, iy kameh winiya basahan bala buku ndramak ale atiye sahou ta Kindrei, bwe. Ndramak ta atiye sahou ta Kindrei kameh asahan bwena le ai. Tasah, sahou tan badeh irih, ma atadau iri lau ta Kindrei ta adeu budon tiri handru i tan.
6 Aha nadu tine, ma aha kawas tek, aha kabudon bolo iri sahou doh kamwenen: Jo winiyan ewek hawe aha ma jo winiya asehek boho kon rakon ja. Arile, buku jo basehek taha ta iri sahou rayah ta Kindrei, iy nane leheya eme tek, o, i buku jo badeu taha iri tanan mwasin bwe, o, jo basehek sahou ta Kindrei bwe, o, jo baleheya aha ta moso sahou ta Kindrei bwe, ya, barala buku sah kameh jo kaseben aha?
7 Aha kanuhun sahou sokek dah se: Lakou koha iri bwe, buku ndrah, bala-eu, ma ndran, buku iy bamekes nyaron randrah, randrah bwe, ya, kili buku sah handru kameh taha kanuhun nyaro ndran amwenen?
8 I buku ndran ta luloh bala bwe, are lau handru kameh baralokou lakou? Sebwe kameh bwe nadeh.
9 Aha i buku aliy ale, buku aha asehek boho kon rakon ja, ale iri lau tana iri bwe, ya iri lau katanan moso sahou barala buku sah handru? Idah kameh sahou taha iu laleyah, ari ndramak winiya banuhun bwe.
10 Handru, boho kon tataha badeh, solo-an labai udu bolo kon munyak dah, arile, iri boho kon tataha marakon doh, moso iri sahou mwasin ta ariu budon ta lau mwan ma badih marakon aleu.
11 Buku jo tanan ma jo banuhun boho kon iy ndramak nane asehek doh bwe, idah kameh jo anya, iy kede-eh badu leheleh. Ma iy kede-eh anya, jo badu leheleh ale.
12 Sahou sokek nane dah, badeh, ta kandriyen aha amekes. Aha aso-ok labai ta akohok ndramas ta Malawin Ndrabun, ma aha abudon anya, ndramas ta asehek boho kon rakon ja badeh, ndramas ari mwasin handru. Idoh mwasin, arile aha kabadok ta akohok iri ndramas randrah ja ta atadau lau mwan ma badih ta Kindrei kabadok.
13 Ta katin doh le, i buku taha asehek sahou ili boho kon rakon ja, eme lau rayah tana iri bwe, taha badeh, kasolom kili ta Kindrei ta boto-on tan keme tataha ta tobolowe moso iri sahou kamwenen.
14 Aha kabudon. Buku jo asolom ili ta Kindrei i boho kon rakon ja, idoh badeh, malawik le asolom, arile budon tek mari badeh, udu laleyah, bakohok ari seben bwe.
15 Idah kameh jo kamekes barala buku sah handru? Sebwe, jo kameh asolom ili ta Kindrei na malawik, ma na iri budon tek marakon. Jo ale kiyah wari na malawik, ma na iri budon tek marakon ale.
16 I buku aha adeu wurah ili ta Kindrei na boho kon rakon ja, malawi aha le badeh, asehek. Eme ma, i buku lau rayah laleyah are bolo aha, iri kameh winiyan anuhun sahou doh, deh? Iri kameh winiyan asehek, “Handru,” deh? Bwe! Tasah, iri winiya bala tanan ta saba sahou handru aha asehek ili ta Kindrei, bwe.
17 Aha atudun nyara Kindrei mwasin labai, arile aha batadau iri lau rayah laleyah nane are bolo aha babadok se bwe.
18 Jo Pol, jo edeu wurah i ta Kindrei ta jo winiyan asehek boho kon rakon ja, aha winiyan basehek bala buku jo asehek bwe.
19 Arile, buku iri lau ta Kindrei katukum badeh, jo anya kasehek sahou ma limeh le kili boho kon iri marakon tanan. Jo bwalek ta amekes sahou solo-an labai (lakou buku 10,000) ili boho kon rakon ja, iri nane tanan moson ta aliy bwe. Iri sahou solo-an labai doh kameh baraseben iri barala buku sah? Winiyan bwe-en!
20 Aha kawas tek, budon taha sala buku tiri nadu nah bwisik. Arile, i buku iri nadu nah bwisik badeh, tana iri ari kandriyen ndra-in bwe, aha lau mwan ma badih ta Kindrei badeh, kasahan buku le aliy. Ta kandriyen mwasin handru ja badeh, budon taha keme kasahan ki buku lau mwan ma badih en, iri tana iri ta lakou marakon doh.
21 Udu bolo buk ndrabun, Laban asehek i buku doh:
“Jo kameh andrei iri lau leheleh, boho kon tiri randrah ja, ame asehek sahou ili tiri lau tek. Iri lau leheleh kameh asehek sahou ili tiri lau tek i boho kon rakon ja, arile iri lau tek winiya banuhun jo bwe le.” Aisaya 28:11-12
22 Eme ma, sahou dah leheya taha, ta kandriyen ta amekes sahou ili boho kon rakon ja, Kindrei amekes ta aseben iri lau mwan ma badih batehei budon tiri ba-en tan bwe. Arile, kandriyen ta atiye sahou ta Kindrei eme lewan buku propet, badeh, Kindrei edeu ili tiri lau mwan ma badih, iri atehei budon tiri handru in tan.
23 Eme ma, buku aha lau ta Kindrei atukum a se, ma aha marakon kamekes sahou ta boho kon rakon, rakon, aha kabudon kamwenen op. Buku lau rayah tana iri bwe, ma batehei budon tiri bwe, buku iri kame bolon ale kanuhun aha, iri kameh abudon i buku sah bah? Sebwe, iri kameh asehek i buku doh, “Aha ndralolo-ou.”
24 Arile, i buku are lau nane iy batehei budon tan mari bala ta Kindrei bwe, o, are lau nane bala tanan bwe, iy eme bolon, iy anuhun aha marakon asehek sahou ta propet, idah kameh sahou taha mari orowei ndrinen ma nyuwani iri kandriyen ndra-in tan marakon iy amekes.
25 Iri kandriyen ndra-in tan marakon nane aton mara-ei asahan eme lewan. Iy kameh atehei bwili ndru-un i andri, ma iy atudun nyara Kindrei. Iy kameh tiye i buku doh, “Handru labai, Kindrei udu hawe aha kada-ah.”
Gok ta atudun nyara Kindrei kudu mwasin
26 Aha kawas tek, buku aha anya katukum ta atudun nyara Kindrei, aha kamekes saba lakou handru? Gok taha marakon udu aliy: Iy ari badeh, ta wari ai, iy ari ta leheya lau, iy ari ta asehek sahou Kindrei edeu i tan ta tiye ili tiri lau, iy ari ta asehek boho kon rakon ja; gok ta iy ari ja ta tobolowe boho kon nane doh. Handru, aha kamekes iri lakou marakon doh, ta atadau aha lau ta Kindrei kales boto-on.
27 Buku aha rayah anya kasehek boho kon rakon ja badeh, mwasin ta uru la-uh le, o, oro taloh le ka-iy kamekes. Oro le doh winiyan. Ya oro samekes sahou toro sala le rasan; iy ari asehek tan op, ano, iy ari ja, oro mari kamekes kili le buku doh. Ya ndramak ari ja badeh, kudu aliy ta tobolowe sahou toro.
28 I buku ari ndramak bado aliy ta tobolowe sahou toro bwe, ou amundru le, ou asehek sahou ki tam amwenen ma kili ta Kindrei.
29 Winiya lau la-uh, o, lau taloh ta tiye sahou ta Kindrei buku iri propet. Oro le lau doh winiya tiye sahou ta Kindrei. Ya iri lau rayah ja manyah winiya anuhun moso bolo sahou toro, eme ta Kindrei handru, deh bwe.
30 Buku iy ari nane manyah udu andri, Kindrei asehek sahou i tan, iy ndramak nane asehek sahou badeh, sasehek sahou op, ndramak ari ja kili kasehek sahou.
31 Ta kandriyen nane doh, idah kameh aha marakon winiya asehek sahou; iy ari op, ano iy ari ja. Idah kameh aha marakon winiya akohok tanan hawe boto-on.
32 Handru, aha winiyan a-en hamon ta kandriyen jo ndrasehek taha. Tasah, iri propet ta Kindrei handru badeh, atondrok malawi iri ma boho iri amwenen, buku iri anya kasehek sahou.
33 Jo kasehek, tasah Kindrei kede-eh winiya bawahei iri lakou laleyah bwe. Iy amekes ndrine taha amwenen, ma manyah tataha kudu mwasin.
34 Buku iri lau mwan ma badih ta Kindrei atukum a se, iri badih badeh, winiya bamekes sahou bwe. Iri kandru-uk le ai. Iri lau ta Kindrei tataha rayah kede-eh badeh, amekes i buku le aliy. Iri badih badeh, winiya basahan kabin ta lau ta Kindrei bwe. Iri kare le bahandra tondrok tiri mwan, i buku le sahou batanau iri Juwis ndrasehek.
35 Buku ari badih, iy anya ki tanan moso ari sahou, mwasin ta iy kandremenya udun, buku oro ala hamon ala asiu toro amwenen. Tasah, buku iy badih amekes sahou udu bolo tukum tiri lau ta Kindrei are le se, iy badeh bamekes kandriyen bamwenen bwe, ma iy atehei bwilima ili tan amwenen.
36 Buku sah? Aha kede-eh anya kandriyen taha badeh, mwasin labai ja, tiri lau ta Kindrei rayah ja nadeh? Sebwe, aha le badeh kati sahou handru ta Kindrei ai? Sebwe aha le badeh, akohok sahou ta Kindrei ai? Ya, iri lau mwan ma badih rayah ja bwai? Bwe. Eme ma, jo aso-ok aha ka-en hamon ta sahou jo ndrasehek ndrawek taha.
37 Jo Pol, jo asehek i buku doh: I buku ou are lau, ou anya, ou asehek sahou ta Kindrei buku iri propet, o, ou anya budon ta Malawin Ndrabun udu tam, ou ki tanam kudu mwasin ta iri sahou marakon jo nane atorou ewek taha, idoh badeh, batanau ta Laban.
38 Arile, i buku are lau, iy ba-en hamon ta sahou batanau dah bwe, aha sanuhun iy, ma aha sa-en hamon tan.
39 Aha kawas tek, ma aha nadu tine, aha katehei budon taha mari kili ta atiye sahou ta Kindrei, ma aha satehei ndrabun sala ta are lau ta asehek sahou i boho kon rakon ja.
40 Arile, aha kamekes lakou marakon kili san mwasin, ma ki-in hamon ta kandriyen ta Kindrei.
Iri lau mwan ma badih mene ndramak, iri kameh amak ame awas ja
(Kalan 15)