4
Laban le ari aleben iri lohowan tan
1 Aha Korin kabudon ahi ki buku doh: Ahi badeh lohowan ta Krais. Eme ma Kindrei atehei ahi ta atiye sahou handru, ale mene aton tiri lau.
2 Taha tanan, buku taha amekes gok ta ari ndramak, taha badeh, ka-en hamon le ta iri tanan tan.
3 Jo babwerei se bwe-en, i buku aha mari asehek iri kandriyen tek, o iri lau rayah ja anya kasehek iri kandriyen tek kili ta sahou. Tasah jo tanan, jo amwenen kameh winiyan batehei jo bala ta sahou bwe.
4 Tasah, jo bamekes ari lakou bwe, ma jo ale basehek anya jo ndramak mwasin bwe. Arile sahou tek le dah, baleheya jo bwe. Laban le ari badeh, tanan iri kandriyen tek marakon, ma iy winiyan asehek ma edeu jo ili ta sahou.
5 Len ta sahou badeh, kahis, ya aha sasehek kandriyen tiri lau rayah ja, taha kado le katondrok len tan ta iy eme hamon ja. Iy kameh leheya iri lakou marakon aton udu bolo lulik, ma iri saba lakou udu bolo ndrine taha marakon. Ano Kindrei le ari barasehek iri kandriyen ta gok tataha ari, ari, mwasin ma ndra-in. Buku taha amekes mwasin, iy kameh tutuni nyara taha ta aliy.
Iri Korin atudun nyara iri le amwenen
6 Aha kawas tek, jo abudon ta aseben aha, eme ma, aru Apolos kaleheya kandriyen taru kewek taha, ta aha ka-en hamon tiri kandriyen mwasin i buku buk ndrabun ndrasehek. Aha sasakalau iri batanau mwasin doh. Jo bwalek aha tebelese ta atudun nyara ndramak ari mwasin, ya aha babudon iy ari ja bwe.
7 I buku sah handru? Are lau handru atehei aha asahan kabin? Iri lakou marakon ere taha kede-eh, Kindrei le ari edeu. Neh? I buku Kindrei edeu lakou mwasin labai ewek taha laleyah, ya buku sah ja, aha atudun nyara aha amwenen, anya, aha le amekes iri lakou nane doh?
8 Ehe, sebwe aha marakon ndrarek tiri nyamon mwasin. Sebwe, taha lakou marakon udu aliy nadeh, eme ma bwidi aha manyah ado mwasin. Sebwe aha ndrala labai tahi ja, ma aha ndrasahan buku kabin. Jo tikisiy labai, jo aso-ok labai ta aha kasahan kabin handru, ma ahi kameh awek, atondrok iri lakou hawe aha.
9 Ta nyolom tek badeh, Kindrei atehei ahi aposel ado bolo kon ndra-in labai. Ahi badeh, a buku iri lau ndra-in bawei mine iri ano iri adek ala kon ta ada iri amak. Iri angelo ma iri lau marakon badu kon munyak dah ta anyolom ahi le ai.
10 Tasah, ta atudun nyara Krais le ari badeh, ahi asahan i buku iri lau bale iri bwe, arile Krais badeh, ndrabwidi aha asahan iri lau ta tanan labai. Ahi se boto-on ma ahi nyamu ahi bwe, arile aha ndrabadok kabwe. Ahi se nyara ahi bwe, arile nyara aha badeh, ndra tinan labai.
11 Ndra bwena eme asahan nane dah, ahi badeh, amak ta son, ma bale ahi amar ta gwa, ya ahi badeh, asin iri awin ale ndratarah ndrandra-i en. Iri a-um ahi laleyah, ma ahi ari kon mwasin ta manyah ado aliy bwe.
12 Ahi amekes iri gok marakon badeh, na le boto-on ta mine ahi, iri bobose ma sondrokonya ahi, arile ahi ndremenya Kindrei ta amekes mwasin kili tiri, iri amekes ndra-in ja eme tahi, arile ahi ado le bwese iri maha-an marakon le doh.
13 Iri atenei ahi andra-i labai en, arile ahi asehek sahou mwasin ja ili tiri. Ahi asahan buku iri lakou ndra-in ta akeh iu, ta mada iri lau marakon, ahi badeh, ndra buku lakou ndra-in laleyah ndrajah. Ahi ndra bwena ado le buku doh eme asahan nane dah.
Pol aso-ok iri Korin ka-en hamon ta kandriyen tan
14 Jo atorou la-ukei dah ta amekes bwili aha ama, bwe. Jo atorou, tasah, jo aso-ok aha labai. Aha asahan naduk handru, ma jo anya kamekes budon taha kudu mwasin.
15 Buku lau nyaran bwe leheya aha ta kandriyen ta Krais, jo le ari badeh, tama aha handru. Tasah, jo ndrasehek taha ta nyala Krais Jises, ma aha ndrasahan naduk handru.
16 Ma, jo aso-ok aha kanyolom kandriyen tek, ma aha ka-en hamon ta aliy.
17 Ta idoh le, jo tiye Timoti ewek ta atou aha. Jo aso-ok iy labai, i buku naduk handru. Iy badeh, atondrok iri gok marakon ta Laban udu mwasin labai. Iy kameh winiya asehek taha ta iri kandriyen jo amekes ta in hamon ta Krais. Iri kandriyen nane doh, jo leheya iri lau ta Kindrei are bolo kon mari.
18 Aha rayah anya, jo kameh winiya bawek banyolom aha ja bwe. Eme ma aha rayah atudun nyara aha le, ma amekes lakou laleyah.
19 Arile i buku Laban aso-ok jo ta ewek, badeh, kameh jo ndrado hawe aha ja ai. Ano kameh jo anya kasilah boto-on tiri lau ta tebelese badeh, handru deh, bwe iri asehek sahou ta laleyah le.
20 Taha ndratanan, tondrok ta Kindrei bala buku ta asehek sahou solo-an ta leheya bwe. Iy lakou nyamun udu aliy ma iy boto-on labai.
21 Aha aso-ok jo kamekes saba lakou handru buku jo kasahan hawe aha? Aha aso-ok jo kasehek sahou boto-on kewek taha, ma ka-um aha nadeh? O, aha aso-ok jo kewek ma tikisiy tek ta asehek kandriyen mwasin kamunum kewek taha le ai.
Iri lau ta Kindrei badeh, katukum ka le se, kasehek nyala kandriyen ndra-in nane udu ndrokowa iri
(Kalan 5–6)