6
Aha lau ta Kindrei sadeu aha amwenen sala ta sahou
1 Buku ari taha, iy tebelese ili hawe nadu tinen ari i san ta Jises, i buku sah handru iy mani iri lau ta Kindrei udu? Ya iy ili ja amekes sahou tan udu mada iri lau nane tana iri Kindrei bwe. Bwilin bama ta iy amekes iri kandriyen doh bwe nadeh?
2 Aha ndratanan o, taha lau ta Kindrei kameh adeu lau marakon badu kon munyak ala ta mada sahou. I buku taha adeu lau marakon badu kon munyak ala ta sahou, ya i buku sah handru, aha winiyan ta asehek lakou nadu bwisik doh bado ndrokowa aha bwe?
3 Aha ndratanan o, taha kameh adeu iri angelo ala ta sahou. I buku idoh i handru, taha kameh winiyan ta adeu iri lakou marakon badu munyak a ta sahou.
4 Tasah handru aha adeu iri ndra-i ma tebelese taha ili hawe ndramak ta anuhun sahou, iy nane tanan Kindrei bwe?
5 Jo asehek sahou dah ta bwili aha kama. Buku sah handru? Sebwe aha kede-eh ari ndramak ta tanan ja bwai, ta amekes ndra-i udu ndrokowa uru nadu tinen kudu mwasin ja?
6 Arile bwe, aha ja, adeu nadu tine aha amwenen ales ere ta sahou udu mada ndramak ta anuhun sahou, iy nane tanan Kindrei bwe!
7 Ya, aha kede-eh adeu iri mwan ma badih ta Kindrei rayah ja ala ta mada sahou, ma ta lakou doh, aha ndrataku, ma aha ndramani iri kandriyen ta Kindrei. Buku sah handru, aha balelei iri bamekes laleyah bawek taha bwe? Mwasin ta aha kalelei kili mine iri kakohok saba lakou taha, ma aha satehei iri sales ta sahou, sala hawe iri lau ta anuhun sahou, iri tanan Kindrei bwe.
8 Arile, aha bwale aha a-en hamon ta iri kandriyen mwasin nane doh. Aha amwenen ja badeh, amekes ndra-in udu ndrokowa aha. Ma aha akohok lokowa nadu tine aha amwenen laleyah ale.
9 Aha tanan bwe nadeh? Iri lau ale ta amekes iri kandriyen ndra-in doh, iri kameh winiya bala bolo tondrok ta Kindrei bwe. Aha sawendreya ndrine aha amwenen. Iri lau marakon ale amekes kandriyen ndra-in ta karei, iri lau ale asolom ili ta sukumada kei, iri lau ale amekes karei hawe iri badih tasou, iri lau ale ta amekes iri kandriyen ta bwilima udu aliy hawe iri lau rayah ja,
10 ya iri lau ta bahana, iri lau mada iri alikis ta iri lakou tiri lau rayah ja, ya iri lau ale a-un gwa boto-on ta amekes batu iri ibo lolo-ou, ya iri lau ale ta bobose ma sondrokonya iri lau rayah ja, ya iri lau ale ta ariu lakou ta lau rayah ja. Iri lau marakon doh kameh winiya bala bolo tondrok ta Kindrei bwe.
11 Aha rayah bwena mene i buku iri lau doh. Arile, na dah ja, nyara Laban tataha Jises Krais ma hawe boto-on ta Malawin Mwasin ta Kindrei tataha, anyuwi aha, lebelei aha, ma bwidi aha asahan iri lau tan mwasin ta madan.
Bada taha lau badeh asiu handru ta Malawin Ndrabun
12 Aha lau rayah asehek anya, “Ahi winiyan amekes iri lakou marakon, buku ahi anya kamekes.” Arile, jo katiye taha, lakou
marakon doh winiya baseben taha bwe. Handru, iri lakou marakon jo winiyan ta amekes, arile jo bwalek alelei ari lakou atondrok jo, ma jo bwalek asahan bonyo-ou ta lakou nane jo amekes.
13 Lau rayah asehek i buku doh, “Nyamon badeh, ta ndrine taha le. Ya ndrine taha badeh, ta akohok nyamon le.” Sahou marakon doh handru, arile Kindrei kameh andrei iri nyamon hawe bada taha iu. Eme ma, aha sakeh bada aha sala ta kandriyen ta karei. Tasah, Laban badeh, atondrok bada taha, ma taha badeh, kalowosa bada taha kamwenen ta amekes gok tan.
14 Na le boto-on ta Kindrei, iy mete-ei Laban udu bolo lek tan eme loken ja. Ma iy kameh mete-ei taha ale.
15 Aha tanan, bada aha badeh, badu hawe bada Krais. Buku jo kandrei bada Krais, eme jo katehei kili hawe bada i badih ta karei, kandriyen doh mwasin o, ndra-in? Idoh bamwenen ta ari kandriyen mwasin bwe!
16 Aha tanan, i buku are lau iy amadin o amekes karei hawe iy badih ta karei, bada uru badeh, ndrasahan ari buruwen kabwe. I buku le buk ndrabun ndrasehek,
“Uru kasahan ari buruwen.” Jenesis 2:24
17 Arile, are lau iy ihis handru hawe Laban, iy kameh asahan ari buruwen hawen i san ta Malawin Mwasin.
18 Aha ka ndra len ta iri kandriyen ndra-in ta karei. Iri kandriyen ndra-in rayah taha lau amekes, idoh bamekes bada taha bala bolo ko-ak bwe. Arile, buku ndramak amekes karei, iy ndrabwidi badan mara-ei ndrala bolo ko-ak.
19 Handru, bada aha badeh, taha le bwe. Bada aha badeh, buku asiu ndrok ta Malawin Ndrabun. Sebwe, aha babudon ta aliy bwe nadeh? Kindrei atehei Malawin Mwasin ndrawek taha, ma iy udu bolo oda aha. Eme ma aha taha le bwe, aha ta Kindrei ale.
20 Iy mene sihinei aha ame len ta kandriyen ndra-in na luk tinan labai. Eme ma aha katudun nyara Kindrei na le bada aha mara-ei amwenen.