2
Budon tataha kabadok ta teleya sahou wasai
1 Jo Pol, jo aso-ok aha katanan lakou dah: Jo badeh, ibo gok boto-on labai ta aseben aha mwan ma badih badu Kolosi, ma iri mwan ma badih badu Leyodisiya, hawe iri mwan ma badih rayah ale banyolom madak bwe le.
2 Jo amekes gok boto-on, tasah jo aso-ok ndrine aha kabadok ma aha katukum ka-en hamon ta kandriyen ta aso-ok labai iri nadu tine aha iri mwan ma badih ta Kindrei. Jo badeh, amekes gok boto-on labai, ma idoh kameh atadau budon taha, ma aha winiyan atanan kati sahou aton handru ta Kindrei. Krais amwenen badeh, kati sahou aton.
3 Iy amwenen badeh, iy irek labai ta iri tanan mwasin dah, ma sahou aton ta Kindrei, ma iy le amwenen winiyan aseben aha atanan iri lakou marakon ta Kindrei doh.
4 Jo amekes sahou dah, tasah jo baso-ok ta lau rayah kameh wendreya aha ta iri sahou ta atamar ma aha kameh winiyan ba-en hamon ta sahou rayah ta Kindrei bwe.
5 Handru, jo bado hawe aha bwe. Arile, ta budon tek mara-ei badeh, i buku jo udu hawe aha, ma jo tikisi aha tinan labai. Arile, jo sekesek ta anuhun aha adek a se ma abo gok mwasin, ma aha atehei budon taha handru in ta Krais.
Taha badeh, kahis hawe Krais ma kakohok kohan handru
6-7 Aha ndranuhun sahou mwasin ta Laban Krais Jises, ma aha ndratehei budon taha handru ndrala tan. Eme ma, aha badeh, kahis hawe Krais, ma kadek na kandriyen tan. Aha badeh, kahis badan, buku kei ateh ma kandron ateu iy boto-on labai udu bwele-e munyak, ma buku asiu ales udu bwele-e ndru boto-on. Ma aha badeh, atehei budon taha boto-on labai in ta sahou mwasin doh, iri lau mene ndraleheyani aha ta aliy, ma len marakon aha kadeu wurah kili ta Kindrei ta iri lakou mwasin iy ndrabwidiy ndrawek taha.
8 Ya, aha katondrok aha kamwenen. Kora-on iri lau rayah kadeu sahou laleyah, ma sahou yoyou kewek taha ta iri budon solo-an ta aha ka-en hamon ta aliy. Ma iri kameh kawendreyani aha ta sahou dah, ma aha kameh anuhun boho iri. Iri lau doh badeh, akohok tanan ta tubu iri, ma tiri malawin ndra-in ale atondrok iri lakou badu kandrah, ma kon munyak. Iri tanan sahou ta Krais bwe.
9 Ya, bale aha kudu taha. Tasah, aha ndratanan, koha Kindrei ma kandriyen tan mara-ei badeh, irek udu bada Krais le ari.
10 Ma iy udu bwele-en labai tiri lakou boto-on mari. Aha badeh, ta Krais, eme ma, Kindrei ndratehei kohan handru ndrawek taha, ma kohan doh ndrarek udu bolo oda aha.
11 I buku doh: Aha ndrahis hawe Krais ma ta kandriyen ta Krais, taha ndraruwani kandriyen ta ndrine taha malen. San ta ruwani kandriyen ta ndrine taha malen dah, i buku kandriyen ta asan ku-i iri nah mwan, buku iri Isra-el amekes. Arile, idoh lakou ta bada taha bwe. Lakou doh Krais bwidiy udu ndrine aha.
12 Na len ta alomwa aha badeh, i buku aha ndramak hawe Krais, ma Kindrei ihi aha ala bolo lek hawe Krais. Aha atehei budon taha handru in ta boto-on ta Kindrei, iy mene mete-ei Krais udu bolo lek. Eme ma, na budon taha handru doh, iy mete-ei aha ame hamon ame awas hawe Krais.
13 Bwena badeh, aha amekes kandriyen ndra-in solo-an, ma aha a-en hamon ta ndrine aha malen, ma bwidi aha amak. Arile, Kindrei bwidi aha akohok kohan handru hawe Krais, ma Kindrei mani iri kandriyen ndra-in tataha marakon iu.
14 Idoh i buku Kindrei ndratarani la-ukei bilisiu, tarou ta batanau udu aliy. Ya tarou mene, turuki taha ta mada sahou, ma anya korou sahou eme tataha ta iri kandriyen ndra-in taha amekes bwena. Arile, Kindrei ndratolowei iri lakou buku doh: Udu kala Jises Krais imek udu bada kei tondreh, Kindrei andrei la-ukei nane doh, iy tatahiy ili bada kei tondreh, ma sokosowei iri tarou ta batanau mari ma sahou ta imek udu aliy iu.
15 Ma iy tolowei boto-on ta tinan tiri malawin marakon, ma iri lakou boto-on rayah ja. Ma, na gok ta Krais amekes udu bada kei tondreh, Kindrei ndrasakalawi iri, ma bwidi iri asahan buku lakou laleyah ta mada iri lau marakon.
Taha badeh, ndramak hawe Krais ma iri kandriyen malen winiyan baseben taha bwe
16 Ya, aha kanuhun! Aha badeh, kadeu kona aha kili tiri mwan ma badih anya korou sahou kewek taha ta kandriyen ta batanau ta beleben nyamon ma gwa, ma ta len tinan aha ba-en hamon ta aliy na bolo jaha marakon bwe, o, ta len ta bun ha-un asahan, arile aha basan len hawe iri bwe, o, ta len ta amunyau.
17 Iri lakou marakon doh badeh, malawi le iri lakou handru kameh asahan hamon. Arile, Krais le badeh, iy lakou handru.
18 Eme ma, buku rayah mwan ma badih asehek ta nyala lakou iri ndranyolom udu bolo ameh tiri, ma buku iri anya korou sahou kewek taha, tasah aha ba-en hamon tiri bwe, ma batehei aha ba-au bala andri mara-ei bwe, ma batehei bwili ndru-u aha bala andri bala tiri angelo bwe; ya, aha badeh, kadeu kona aha kili tiri. Bar tiri mwan ma badih buku doh badeh, ta amekes lakou laleyah. Tasah, iri badeh, a-en hamon ta kandriyen ta ndrine iri malen atondrok iri kahis.
19 Ma iri batiye sahou handru ta Krais bwe. Iy udu bwele-e taha, ma taha a buku badan. Iy le badeh, atondrok taha mwan ma badih ta Kindrei, ma taha badeh, asahan buku iri mwan ma badih Kindrei aso-ok. Ma, Krais badeh, i buku batu taha. Batu taha atondrok bada taha, ma bada taha ato-ou eme loken, ma bwidi iri ndruwi taha ma len ta bada taha ihis i le se. Eme ma, bada taha asahan i tinan na le boto-on ta Kindrei.
20 Aha tanan, aha badeh, ndramak hawe Krais, ma aha ndramani batanau ndra-in tiri kabin ta bwena tiri malawin ndra-in badu munyak dah. Buku sah handru, na dah ja, aha anya kadek buku iri mwan ma badih badu kon munyak? Kora-on aha ndranuhun rayah mwan ma badih anya kariu aha, ma a-en hamon ta batanau doh:
21 “Aha sateu lakou, aha saimon nyamon, ma aha sanyokar lakou na mine aha. Aha amekes i buku doh, badeh, bamwenen ta mada Kindrei bwe.”
22 Aha sa-en hamon tiri batanau doh, tasah batanau doh ta nyamon nane, iri lau aimon laleyah ndra-au. Ma ale, iri lau le badeh, amekes batanau dah, ma iri leheya taha ta aliy. Arile, batanau dah ta Kindrei bwe.
23 Ma iri batanau doh, ibo gok boto-on ta andrek iri mwan ma badih kamekes kandriyen ta atehei bwili ndru-u iri i andri i ta lakou doh; iri abudon anya Kindrei badeh, sekesek labai ta aliy. Ma iri ale abudon taha badeh, katehei taha kala andri mara-ei ma katehei bwili ndru-u taha kili andri kili tiri angelo, ma ka-um bada taha. Na budon tataha mwan ma badih badu kon munyak, idoh i buku kandriyen mwasin ta tanan udu aliy ta amekes Kindrei kasekesek taha. Arile, lakou doh, winiyan baseben taha ta ruwani kandriyen ta ndrine taha malen iu bwe-en!