La-ukei ta Pol atorou ili tiri lau badu kon
EPESUS
Sahou Tanan
Kati budon ta la-ukei dah i buku doh, Kindrei anya katukum iri lakou marakon hawe Krais, idoh iri lakou marakon badu kandrah ma badu munyak, ma Krais kameh udu bwele-e iri lakou marakon doh (1:10). Ma Kindrei anya katudun iri lau tan amwenen, iri kameh ahis handru hawe Krais ma iri ado mwasin.
Ma mwena ta la-ukei dah Pol amekes sahou solo-an ta tikisiy ta Kindrei amekes iri lau mari atehei budon tiri in ta Krais atukum a le se asahan rabuk le. Ta gok ta Jises Krais, Kindrei ndrandrei iri lau ndrame hamon, ma iy atehei Malawin Ndrabun ili tiri i buku kalem tan, iy kameh amekes iri lakou marakon mwasin ili tiri buku iy mene ndratandrakan (1:14). Udu bolo la-ukei ta Pol asehek i buku doh, iri lau ta Kindrei kahis hawe Krais, eme ma ndrine iri kudu mwasin handru ma iri ka-en hamon ta kandriyen ta Kindrei le amwenen.
Ta la-ukei dah Pol badeh, amekes iri sahou sokek ta leheya iri lau katanan kamwenen handru buku iri ahis hawe Krais ma iri ndrasahan ndra le rabuk. Iy tiye i buku doh, iri lau ta Kindrei buku bada taha badeh ari le, ma Krais le ari atondrok bada taha ari le nane doh (4:1-16). Ma ale, iri lau ta Kindrei badeh i buku raem asiu, eme ma Krais badeh i buku ndru alih ta asiu doh (2:19-22). Ma iri lau ta Kindrei badeh i buku ari badih, eme ma Krais asahan i buku udu i badih nane doh (5:22-32). Ta la-ukei dah kede-eh anyolom amwenen handru ta iri lakou mwasin labai Kindrei anya kamekes kili tiri lau tan.
Iri Sahou Tinan
Sahou sekesek (1:1-2)
Krais atiye nyosowan mwasin labai (1:3–3:21)
Koha taha ha-un ihis hawe Krais (4:1–6:20)
Sahou sekesek ta ano (6:21-24)
Ta Krais le badeh, Kindrei mesekei taha mwan ma badih asahan ha-un ja
1
(Kalan 1–3)
1 Jo Pol, jo aposel ari ta Krais Jises. Na so-ok tan amwenen, Kindrei atehei jo buku ari aposel, ma jo edek rakon, i rakon ta atiye sahou mwasin ta Jises Krais. Jo atorou la-ukei dah ewek taha mwan ma badih ta Kindrei, aha are kon tinan Epesus. Aha badeh, a-en hamon handru ta Krais Jises, ma aha ahis hawen.
2 Jo aso-ok tama taha Kindrei hawe Laban Jises Krais, uru katikisi aha ma kamesekei kandriyen mwasin kewek taha, ma kamekes ndrine aha kudu mwasin.
Ta Krais le Kindrei atehei tataha iri lakou marakon mwasin badu kandrah
3 Taha badeh, katudun nyara Kindrei, iy tama Laban tataha Jises Krais. Na Krais le badeh, iy ndratehei tataha lakou marakon mwasin badu kandrah ta aseben malawi taha.
4 Kindrei bamekes kon munyak bwe le badeh, iy ndratehei taha ndrahis hawe Krais. Eme ma, taha kameh winiyan ado mwasin, ma ndrabun, ma ari ndra-in winiyan bado madan bwe.
5 Kindrei aso-ok taha tinan labai, eme ma ndra bwena handru, iy abudon ta atehei taha a buku nadun amwenen, na gok Jises Krais kameh amekes hamon. Ya, Kindrei abudon i buku aliy, eme ma, iy amekes eme tataha.
6 I san ta nadun amwenen Jises Krais, iy aso-ok iy labai, iy tikisi taha ma bwidi kandriyen mwasin labai eme tataha. Eme ma, taha badeh, katudun nyaran ta tikisiy ma seben laba tinan doh.
7 Ya, Krais bwidi kandriyen mwasin labai ndrame tataha. Iy imek ta konohei taha ame hamon, ma ndrayen amou ta sikine kandriyen ndra-in tataha marakon.
8 Kindrei solowei tikisiy tan tinan labai ndrame tataha, iy atehei iri tanan randrah randrah, ma iri budon mwasin eme tataha.
9 Kindrei bwetenei ndra bwena ta lakou iy anya kamekes ta gok ta Krais. Iy in hamon ta budon tan amwenen, ma iy leheya taha ta lakou tan doh, bwena mene aton mara-ei.
10 Budon doh, Kindrei kameh bwidi marakon ano, ta len ta aliy amwenen, ta atukum lakou marakon iy amekes i le se, iri lakou marakon badu kandrah, ma udu bwele-e munyak ma Krais le ari atondrok iri marakon.
11 Kindrei badeh, in hamon le ta budon tan amwenen, iy andromwei taha, ma atehei taha ala ahis hawe Krais. Ehe, buku Kindrei abudon ta amekes ari lakou, iy kameh amekes le. Saba lakou iy anya kamekes na dah, idoh udu budon tan bwena mene ale.
12 Tasah handru Kindrei amekes kandriyen mwasin buku doh eme tataha? I buku doh: Ahi lau badu Juwis ala bwena, ma atehei budon tahi handru in ta Krais ma a-en hamon tan. Eme ma iy anya, ahi kabudon tikisiy tan, ma katudun nyaran.
13 Ma aha lau badu leheleh, aha ndrasahan lau ta Kindrei ale, kala le aha mene anuhun sahou handru. Sahou mwasin doh amekes, ma Kindrei atehei aha ahis hawe Krais. Aha atehei budon taha handru in ta Krais, ma Kindrei ndratehei Malawin Ndrabun ndrawek taha i buku kalem ta lakou, iy ndratandrakan ta edeu.
14 Ehe, Malawin Ndrabun doh, i buku kalem tiri lakou mwasin, Kindrei kameh edeu ewek taha hamon. Aha badeh, lau tan handru. Ya, Kindrei atehei kalem doh udu ta lau tan, winiya le iy konohei taha ame hamon. Iy amekes i buku doh, ta taha winiyan atondrok na len iy anya kakohok taha kala hawen. Ta lakou doh, taha badeh, katudun nyaran kudu loken labai.
Pol asalom i ta Kindrei ta iy kedeu tanan mwasin ki tiri lau badu Epesus
15 Jo ndranuhun sahou, ta aha atehei budon taha handru in ta Laban Jises, ma aha badeh, aso-ok iri mwan ma badih ta Kindrei labai.
16 Eme ma, len marakon jo edeu wurah ili ta Kindrei tataha. Jo badeh, bamani kandriyen ta asolom aha bwe. Len marakon ta salom, jo abudon aha ma jo asolom Kindrei kameh kaseben aha.
17 Jo badeh, asolom ili ta Kindrei ta Laban tataha Jises Krais, iy tama taha ari le udu kandrah. Jo asolom ili tan, ta iy kedeu Malawin Mwasin kewek taha, ma iy kedeu tanan mwasin ta kati sahou tan kewek taha, eme ma aha winiyan atanan Kindrei amwenen.
18 Jo asolom ta iy kameh katehei sun kanya kudu ta budon taha. Eme ma, aha kameh winiyan atanan ta ndramak ta seben nane, iy aloh aha katehei budon kihis ki-in tan, ma aha kasekesek le ta atondrok iy. Ya, ma aha kameh winiyan atanan iri lakou, Kindrei ndraleheyani ta amekes ewek taha, idoh mwasin labai.
19 Ma aha kameh winiyan atanan buku, boto-on tan ibo gok ta aseben taha lau atehei budon handru in tan. Idoh badeh, tinan labai, taha winiyan batomondrohei bwe. Nadah, boto-on tinan doh, ibo gok ta koha taha, i buku iy le mene ibo gok ta koha Krais.
20 Iy ndramak, ma na boto-on tan doh Kindrei mete-ei iy, ma atehei iy ili ere loken labai mirihik ta boto-on tan udu kandrah.
21 Nadah, Krais ndra tinan, ma iy ere bwele-en labai tiri kabin marakon badu kandrah, ma iy atondrok iri lau marakon ta bwena, iri kabin ta kon, iri lau boto-on, ma hawe iri tinan. Iy udu bwele-en labai ja tiri lau, nyara iri i tinan na bolo len dah, ma ta len hamon ale.
22 Ya, Kindrei atehei iri lakou marakon ndrala bahandra tondrok ta Krais, ma atehei iy udu bwele-en handru tiri lau mwan ma badih tan.
23 Lau ta Kindrei doh badeh, bada Krais, ma iri badeh adih na Krais, eme ma, lakou mari doh, idih na le Krais.