21
Aisik Asahan
1 I buku none Kindrei mene ndrasehek ma ndratandrakan ndra-au ta iy badeh tikisiy Sara labai,
2 Eme udu bada Abraham i alon badeh, Sara ndrinen i tinan ma iy tuwi nah mwan i nadun. Amwenen le ta len mene Kindrei tandrakan iy.
3 Eme badeh Sara atehei nah dah eme len badeh, Abraham tondrohani nyaran Aisik.
4 Ano len ta nadun Aisik asahan ndru la-uh badeh Abraham sani ku-i lakou tan iu, i buku Kindrei ndratiye tan.
5 Abraham jaha tan asahan rinek (100) badeh nadun Aisik eme len.
6 Eme badeh Sara tiye, “Kindrei badeh atehei sekesek eme ndrinek ma buku none iri lau mari anuhun kameh iri kameh sekesek hawek.”
7 Ano iy tiye le, “Are tiye i ta Abraham anya, Sara kameh winiyan nyowo-ei nah bwe? Arile udu bada alon tan badeh jo ndratehei nah mwan ai.”
Haga Uru Isma-el Au
8 Iy nah badeh i tinan ano na len Aisik aruwe sur badeh, Abraham mwesekei tine nyamon.
9-10 Arile Sara anyolom nadu i badih Haga badu Ijip, atehei i nadu Abraham badeh bobose, eme iy tiye ta Abraham, “Ou tikahei badih ta lahou tam ma hawe nadun ki-iu, tasah nadun kameh winiyan bakohok ari lakou hawe nadum Aisik bwe.”
11 Eme Abraham abudon la bwe, tasah iy badeh nadun le.
12 Arile Kindrei tiye, “Ou sabudon tinan labai ta nah nadu badih ta lahou tam kede-eh. Ou badeh anuhun boho Sara asehek tam, tasah na Aisik le kameh lundriyem oro asahan.
13 Jo kameh edeu nadu badih ta lahou tam kameh asahan kon rakon buruwen, tasah iy badeh nadum le.”
14 Na ma ndraben ta len ari ja badeh Abraham kuhi nyamon rayah ma hawe bwisi gwa (amwekes na ku-i katin haka) idih na gwa atehei i mine Haga. Iy bwese-ei i nah badeh tukuni i konan ma tiye uru au. Eme iy edek leleyah ili bolo lomale an Bersiba.
15 Eme gwa udu bolo bwisin ano badeh, iy nyahani i nah udu bolo bwidiu udu ai.
16 Eme iy ili manyah udu len. Ano iy abudon, “Jo bwalek anyolom nah mwan kodo-oh imek.” Eme iy anya keden.
17 Eme Kindrei anyolom i nah dah eden, eme badeh Angelo ta Kindrei udu kandrah aloh i ta Haga, “Ou ndra buku sah badeh? Ou sanoh, Kindrei badeh ndranuhun i nah eden kede-eh.
18 Ou bwese-ei iy keme loken ma ou apon iy, tasah jo kameh amwekes lundriyen oro kameh asahan kon tinan rakon handru.”
19 Ano badeh Kindrei mwesekei madan asak badeh, iy atou gwa li. Eme iy andrei bwisi gwa ili badeh asuniy ma i nah dah a-un.
20 Iy badeh i tinan, Kindrei badeh udu hawen le. Iy badeh ndrahu manyah tan udu kon lomale an, eme iy badeh asahan nyekelen handru ta beteleu.
21 Iy manyah udu lomale an nyaran Paran, ano tinen badeh andrei badih ari badu Ijip i udun.
Sahou Randra Le Ndrokowa Abraham Hawe Abimelek
22 Na len doh badeh Abimelek hawe Pikol ndramak ta mwena ta bahun tan tiye i ta Abraham, “Sasah ou amwekes badeh Kindrei udu hawem.
23 Na dah udu mada Kindrei badeh ou tandrakan ta ou badeh sawasai jo ma lundriye naduk oro. Jo badeh tikisiy ou labai, eme jo aseken ou badeh tikisiy jo ale ma kon munyak ou manyah are aliy dah.”
24 Eme Abraham tandrakan.
25 Ano badeh Abraham eme nunu-uh Abimelek ta gwa li oro lau ta lahou ta Abimelek solo-ei.
26 Eme Abimelek anya, “Aliy, jo tanan are amwekes badeh bwe. Ou batiye tek bwe, nane le jo badeh baranuhun.”
27 Eme badeh Abraham kuhi sipsip hawe bulumakau eme atehei i ta Abimelek. Eme uru amwekes sahou randra le.
28 Ano Abraham kuhi sipsip kasen ndro taloh tan eme len,
29 eme badeh Abimelek ndremenya Abraham, “Saba moson ta ou atehei sipsip kasen ndro taloh udu len kede-eh?”
30 Eme iy tiye, “Ou kuhiy sipsip kasen ma ndro taloh doh, tasah gwa li badeh jo a-eh.”
31 Eme nyara kon doh badeh Bersiba, moson “Li ta tandrakan,” tasah uru lau ma la-uh badeh tandrakan ado aliy.
32 Hamon ta sahou randra le ano udu Bersiba badeh, hawe Pikol ndramak ta bwena ta bahun tan badeh uru au a hamon ala Pilistin.
33 Ano Abraham tahi kei tamarisk udu Bersiba, eme iy aloh nyara Laban, Kindrei ta udu le buku doh.
34 Eme Abraham badeh manyah ili eme udu munyak ta Pilistin luluwen labai.