31
Jekop Eme Len Ta Leban
1 Ano badeh Jekop eme anuhun nadu Leban oro asehek anya, “Jekop badeh tan lakou sola kede-eh badeh ta lakou ta tama to le.”
2 Eme Jekop eme badeh atona kandriyen ta Leban bala buku none mwena mene bwe.
3 Ano Laban Kindrei tiye ta Jekop, “Ou au a hamon ala munyak ta tamam oro ma ala hawe lowam oro, ya jo kameh madak udu tam.”
4 Eme iy suni sahou i ta Rejel uru Liya ame hawen ame lobwidiu hawe katin haka udu hawen dah.
5 Eme iy tiye i turu, “Jo anyolom kandriyen ta tama ah amwekes eme tek bala buku none bwena mene bwe, arile Kindrei ta tama badeh udu hawek.
6 Ah tana ah, jo badeh amwekes lahou ta tama ah boto-on labai,
7 arile tama ah badeh mwesekei wasai san ronoh ta anya kisih jo; eme Kindrei badeh bamwesekei lomondra ta amwekes isi eme tek bwe.
8 I buku none iy katiye, ‘Iri me busuwen badeh sihinem, badeh kameh ma iri katin haka ala bada iri busuwen kameh tam le.’ Ma buku none iy katiye, ‘Iri me torowanan badeh sihinem, badeh kameh ma iri katin haka ala ato-ou bada iri torowanan badeh kameh tam le.’ Oro kasen ala busuwen badeh tek ai.
9 Eme badeh Kindrei badeh kuhi katin haka ta tamam oro badeh atehei eme tek.
10 “Na mada bun tiri katin haka ta adeu nah badeh jo ameh. Jo ameh iri me mwan badeh amwekes mada bun hawe iri katin haka torowanan ma hawe busuwen.
11 I doh badeh angelo ta Kindrei tiye na ameh, anya, ‘Jekop.’ Eme jo anya, ‘Jo kada-ah.’
12 Eme iy tiye, ‘Ou anyolom ki loke tiri me mwan amwekes mada bun hawe iri katin haka torowanan busuwen kede-eh. Jo le badeh amwekes kandriyen doh, tasah jo badeh ndranyolom kandriyen mari Leban amwekes ewek badam.
13 Jo dah badeh jo Kindrei mene asahan hawem udu Betel, eme ou mene tutuni bek i loke i buku none kalem ta abudon jo ma ou mene mwitiniy ndrelekei ta olip i bwele-en ma ou tandrakan eme tek. Na len dah badeh ou ruwani kon dah ya ou au ala munyak tam amwenen.’ ”
14 Ano Rejel uru Liya tiye, “Aru kameh winiyan bakohok munyak ta tama aru bwe ai.
15 Iy badeh amwekes aru i buku none lau badu leheleh. Iy atehei aru a ta sisih ma iy ale ndrani sihine aru, mene ndrano.
16 Handru labai lakou mari Kindrei kuhiy udu hawe tama aru badeh taru ma hawe lundriye aru oro. Ou an hamon ta sasah Kindrei asehek tam badeh.”
17 Ano Jekop eme, nyahani nadun ma udun uru ala manyah ado bwele-e kamel,
18 eme iy edek iu sariye iri katin haka tan i bwena tan, ma hawe lakou tan mari badu Padan Aram, edek iu ili hawe taman Aisik ili munyak Kenan.
19 Ya Leban badeh ndra-au, ndrasan lami iri sipsip, eme badeh Rejel ili badeh bene-ei ndramak, (asehek na sukumada kei) ta taman dah.
20 Ma ale Jekop badeh batiye tanan ta Leban badu Aram ta oro nane atobwak doh bwe.
21 Eme iy atobwak ma hawe lakou tan mari ili gwa i bilisiu ili loboho mandrei badu munyak Gileyat.
Leban In Hamon Ta Jekop
22 Udu len la-uh iu, ano i bada len taloh badeh lau tandra-un ta Leban, ta Jekop badeh ndratobwak.
23 Eme iy kuhi lowan oro a hawen, eme oro sakaniy an hamon toro, eme na len ndro taloh oro ala badeh tawi oro ado munyak Gileyat.
24 Ano badeh Kindrei asahan ta Leban badu Aram na ameh tiye i tan i buku doh, “Balem kudu tam kamwe-es, ou badeh sandres oro.”
25 Jekop badeh tahi asiu balei tan badeh udu bolo mandrei Gileyat, amwenen le na len Leban oro lowan ala asos ma oro amadin doh ale.
26 Ano Leban tiye i ta Jekop, “Ou amwekes sasah dah? Ou badeh ndrawendreyani jo, eme ou tuwi naduk uru i buku none lau ta ateu ta bahun.
27 I buku sah ou aton le ma ou wendreya le ma ou atobwak? I buku sah ou batandra-un tek bwe. Eme ya ou au ma sekesek ma wari ma ada ndran?
28 Ou badeh ale batehei jo babose se nadu tubu oro ma hawe naduk uru bwe. Ou amwekes kandriyen dah bamwenen bwe.
29 Jo badeh jo tek boto-on udu aliy ta amwekes maha ma isi ewek tam; arile na ben badeh Kindrei ta tamam badeh tiye tek, ta jo badeh balek kudu tek kamwe-es, jo badeh sasehek sahou ndra-in o sahou mwasin sawek tam ndri-i labai!
30 Jo tanan ou badeh koham ndrapwe ta ala kon tam, arile ou badeh ndrabene-ei sukumada kei badu asiu tek.”
31 Eme Jekop anya, “Jo badeh inoh, jo anya koro-an ou ka tawi nadum uru kado.
32 Arile i buku none ou silahei are andrei sukumada kei tam badeh iy kimek, ma udu mada lowa talu oro badeh, ou anyolom i buku none ari lakou tam udu bolon tek handru, badeh ou andrei kewek hamon.” Arile Jekop badeh tanan bwe, Rejel badeh andrei sukumada kei nane doh.
33 Eme badeh Leban asilah bolo asiu balei ta Jekop ano iy i bolon ta Liya ano badeh iy i bolon turu badih ta lahou dah, eme badeh iy batakalei ari lakou bwe. Iy udu asiu balei ta Liya eme len ano iy i bolon ta Rejel.
34 Rejel badeh andrei sukumada kei badu asiu ta taman badeh, tonei udu baha ndrahu manyah ta udu bwele-e kamel udu bada munyak ma iy manyah udu la-un. Leban badeh silahei bolo asiu balei mari arile iy batakalei ari lakou bwe.
35 Eme Rejel tiye i ta taman, “Tama, ou sabolosen, jo badeh winiyan bales bare loken bwe; mada bun tek ndrasahan.” Eme iy asilah sukumada kei ta asiu tan, arile iy batakahei bwe.
36 Eme Jekop i bolosen, Anya, “Sasah jo mwesekei andra-i dah? Saba kandriyen jo mwesekei ya ou ame atikah jo dah?
37 Na dah ou badeh ndratakalahei bolo lakou tek mari. Ou silahei sasah badu asiu tam jo andrei? Abo, ou atehei keme manan ya lau tam ma lau tek kanyolom, are mwasin.
38 Jo badeh udu hawem jaha lunoh ai, arile iri sipsip ma me tam badeh baruwe ta ato-ou nah bwe, ma jo badeh baimon ari katin haka tam bwe.
39 Iri katin haka ndriliu aimon katin haka tam, arile jo bandrei bawek hawem bwe; jo le atehei saluwen. Arile ou badeh andrekei sihinen udu minek ewek na ben na len, buku none amai.
40 Jo badeh an suluwmi jo na len ma nyala iniy jo na ben, ma jo bakohok matinou bamwenen bwe,
41 udu le buku doh winiya jaha ma lunoh jo udu asiu tam. Jo badeh amwekes lahou tam ta akohok nadum badih uru jaha ma ronoh hahuw, ano jaha onoh ta katin haka tam. Arile ou wendreyani jo ta adeu sihinek san ronoh.
42 Ki buku none Kindrei ta tama, Kindrei ta Abraham ma Aisik bare hawek bwe; i dah nane ou suni jo ki-iu na ari minek ma katik le. Arile Kindrei badeh atou maha ma isi udu tek ma lahou tinan jo mwesekei, eme na ben mene ou atou losen tan.”
43 Eme Leban anya, “Uru badih kede-eh naduk, oro nah kede-eh badeh naduk ma hawe oro katin haka kede-eh tek. Lakou mari udu mada kede-eh tek le ai. Ya sasah na dah jo kamwekes ki bada naduk uru hawe nadu naduk oro?”
44 Ano Leban tiye, “Talu kamwekes sahou randra le, ki buku none kalem ta ndrokowa talu.”
45 Eme badeh Jekop tutuni bek i loken i buku none kei ales.
46 Ano iy tiye i ta lowan oro, “Ado katukumwi rayah bek.” Eme oro tukumwi bek i se ano badeh oro aimon nyamon ado mirihik ta aliy.
47 Eme Leban tondrohaniy kon doh Jegar Sahaduta, moson, “Bek ta tandrakan” i boho kon Aram, hawe Jekop tondrahani Galit, i boho kon Hiburu moson i le buku aliy.
48 Ano badeh Leban tiye, “Bek tukumwi dah i nyara kalem udu ndrokowak hawe ndrokowam na dah.” Tasah badeh aloh Galit.
49 I doh badeh aloh ale Mispah, moson, “Bokok,” tasah iy anya, “Laban Kindrei badeh madan kudu tam ma kudu tek len talu banyolom talu bwe.
50 I buku none ou batondrok naduk uru bala mwasin bwe, ya i buku none ou asoh badih ari ja, ya lau bare hawe talu banyolom bwe, arile Kindrei le baranyolom talu ma baradeu talu barala ta sahou.”
51 Ano badeh Leban tiye i ta Jekop le, “Bek tukumwi doh ma bek tutuni doh badeh jo mwesekei badeh ta ndrokowa talu.
52 Tukumwi bek ma tutuniy bek doh badeh kalem ta tandrakan ta talu. Ta jo winiyan basakalawi bek tukumwi kede-eh bawek bilisiu ta amwekes isi bwe ai, ma ou ale sasakalawi bek tukumwiy ma bek tutuniy same bilisiu samwekes isi same tek.
53 Winiya le Kindrei ta Abraham, ta Nahor, ma Kindrei ta tamam oro badeh baranuhun talu.” Eme Jekop tandrakan i ta nyara Kindrei ta taman Aisik.
54 Eme iy amwekes salom i bada bek udu mandrei ma tiye iri lowan aimon nyamon. Oro aimon ano badeh oro amadin ben ari.
55 Na mandraben badeh Leban atamas ma sekesek nadu tubun oro ma hawe nadun uru ma edeu nyosowan i toro. Ano badeh iy iu i hamon ja i kon tan.