48
Jekop Edeu Nyosowan I Ta Ipra-im Hawe Manase
1 Ano udu sese badeh iri tiye ta Josep ta taman badeh ndrabosik. Ano badeh Josep kuhi nadun uru ma la-uh, Ipra-im hawe Manase, eme oro ala hawe Jekop.
2 Eme Jekop anuhun nadun Josep eme ta atou iy badeh, eme ma boto-on tan asahan ma iy suri iy ma iy manyah udu loken bada sau.
3 Ano Jekop tiye i ta Josep, “Kindrei tinan badeh asahan hawek udu kon Lus udu munyak Kenan badeh atehei nyosowan eme tek.
4 Eme Kindrei tiye i tek i buku doh, ‘Jo kameh edeu nadum oro kameh asola ma lundriyem oro ari ari kameh asahan kon tinan rakon buruwen; ma jo kameh edeu munyak dah kameh i ta lundriyem i buku ari lakou i toro udu le buku doh.’ ”
5 Ano Jekop tiye le, “Josep, nadum uru ma la-uh, Ipra-im hawe Manase badeh adeu uru ado Ijip udu hamon ta jo asahan dah, arile uru badeh tek le, i buku none le Ruben uru Simiyon.
6 Buku none ou adeu nah udu hamon turu ja badeh tek bwe ai; badeh tam labai; ya oro kameh akohok lakou badu mine Ipra-im uru Manase.
7 Jo amwekes doh badeh, tasah ta tinem Rejel le. Na len jo udu Padan Aram eme len badeh ma aso are ndra munyak badu Kenan kahis le, ya aso bame mirihik ta kon Eprat bwele badeh Rejel imek. Eme jo amwekes tikisiy ano badeh jo ihiy iy udu ka-u san ili kon Eprat.” (Eprat kon doh na dah badeh aloh Betelehem).
8 Ano badeh Jekop anyolom nadu Josep uru badeh iy ndremenya, “Nadu are uru mwan dah?”
9 Eme Josep anya, “Uru doh badeh naduk, Kindrei atehei eme tek na len jo udu Ijip dah.”
Ano Jekop tiye, “Ou andrei uru kameh dah jo kedeu nyosowan ki turu.”
10 Mada Jekop badeh anya kagwah, tasah iy badeh ndra alon labai, eme badeh iy winiyan banyolom kon bala mwasin bwe. Eme Josep andrei nadun uru badeh ame hawe Jekop, eme badeh Jekop tawi uru a batalan.
11 Ano Jekop tiye i ta Josep, “Jo mene anya i dah kameh jo winiyan banyolom ou bwe, arile Kindrei le mwesekei jo eme badeh ndranyolom ou hawe nadum uru mwan ma la-uh.”
12 Ano badeh Josep bwese-ei uru ado bada ba Jekop, ano iy aluh kandrun i andri bada munyak udu mada taman.
13 Ano Josep atehei Ipra-im udu bilisiu kamweu ta Jekop ya atehei Manase badeh udu bilisiu salin ta Jekop.
14 Arile Jekop eme badeh atehei minen salin i sakan i bwele-e batu Ipra-im, aliy i bahan ai, ya minen kamweu badeh i bwele-e batu i kadok Manase.
15 Ano Jekop edeu nyosowan i la-u Josep:
“Kindrei ala tama Abraham, tama Aisik ta atudun badeh
katehei nyosowan ki la-u uru nah dah!
Ma Kindrei ala udu hawek atondrok jo eme eme taku na len dah katehei nyosowan ki la-u uru le!
16 Angelo ala sebenei jo ma lakou batok tek bwe badeh katehei nyosowan ki la-u uru!
Eme ma iri katanan ah badeh badu hawek, hawe badu hawe tama
Abraham uru Aisik kudu le buku doh!
Ma lundriye uru badeh ki sola ma lundriye nadu uru ka sola!”
17 Eme Josep badeh tikisiy handru ta anyolom taman badeh atehei minen salin i la-u Ipra-im; eme badeh Josep tawi mine taman udu bwele-e batu Ipra-im atehei i bwele-e batu Manase.
18 Eme Josep tiye, “Tama bala buku badeh bwe. Iy kadok asah i dah; ou atehei minem salin ki bwele-e batun.”
19 Eme taman bwalen ma iy tiye, “Naduk jo tanan. Lundriye Manase oro kameh asahan lau boto-on ale, arile lundriye nadu tinen oro bahan kameh boto-on labai ja ta iy kadok Manase, ma lundriyen oro kameh asahan solo-an ma kameh asahan kon tinan solo-an.”
20 Eme na len doh badeh iy atehei nyosowan i la-u uru tiye anya, “Iri lau mari badu Isra-el kameh aloh nyara ah ta adeu nyosowan. Iri kameh aloh anya, ‘Kindrei kamwekes ou i buku none Ipra-im hawe Manase!’ ” San doh le badeh, eme badeh Jekop badeh atehei Ipra-im udu mwena ta Manase.
21 Ano Jekop tiye i ta Josep, “Ou badeh ndranyolom jo, jo badeh anya kimek ai, arile Kindrei le kameh udu hawem ma iy le kameh winiyan tiyani ou ala hamon ja ala munyak ta tubum oro.
22 Nadu tinem oro bwe ai, ou le badeh jo atehei kon Sekem i tam, i doh munyak mada lihin, jo mene andrei ta bahun udu mine iri Amora eme na boto-on ta samen hawe bonara tek.”