9
Kindrei Amwekes Sahou Randra Le Hawe Nowa
1 Eme Kindrei atehei nyosowan i bwele-e Nowa hawe nadun oro ano ma iy tiye, “Ado kadeu nah ma lundriye ado oro kaweleyani kon munyak mari.
2 Ya i dah kameh iri katin haka, sirih ma hawe iri ni kameh anoh adoh, ma iri kameh are baha tondrok tado.
3 Eme ado badeh kaimon iri hawe bara la-u kei; jo atehei mari doh ta nyumon tado.
4 Arile lakou ari le doh badeh ado saimon, lakou mulin ma ndra; jo anya ndri-i, ndra ki-iu op, tasah lakou doh badeh kohan ma ndrayen udu aliy.
5 I buku none are lau idi iri lau awas amak, i dah kameh iy kameh akohok sisi-in ta aliy. Ma jo kameh edeu isi i tare katin haka i buku none iy aimon lau amak.
6 Tasah ndramak badeh mwesekei iy konen i le buku Kindrei, eme ya i buku none are lau idi ari ndramak imek, badeh iy ndramak nane doh, badeh lowan oro kadai iy kimek.
7 “Ado badeh kamwekes nah kasola eme lundriye ado oro kado ma kaweleyani bolo munyak mari.”
8 Ano Kindrei tiye i ta Nowa hawe nadun oro,
9 “Na dah jo kameh amwekes sahou randra le hawem ma hawe tubum oro,
10 ma hawe iri mulin mari ala ado ndron mene ame len hawem.
11 Na sahou dah jo amwekes sahou randra le hawem, ya jo tandrakan jo kameh winiyan badai lakou mulin mari bwe ai, na len kon atuh bwe ai; ma badai munyak ma winiyan kon winiyan batuh ja badeh bwe ai.
12 Ya na kalem dah udu le ta sahou randra le, jo badeh amwekes hawem ma hawe iri mulin mari hamon asahan.
13 Jo kameh edeu betekenyabwiu udu bolo asi kandrah. I doh badeh kalem ta sahou randra le tek i hawem ma hawe iri mulin mari badu munyak.
14 Ya i buku none jo tubulu-i kandrah na asi kandrah ma betekenyabwiu asahan,
15 badeh kameh jo abudon tandrakan tek mene ewek tam, ma i tiri katin haka mulin mari ta kon winiyan batuh ta adai iri ja bwe ai.
16 Ya buku none betekenyabwiu asahan bolo asi kandrah ya i buku jo anyolom kameh, jo kameh lomondrani sahou randra le tek hawe iri mulin mari badu munyak.
17 Eme i dah kalem tek jo edeu udu ndrokowak hawe iri mulin mari.” Nowa Hawe Lundriyen Oro
18 Eme ya nadu Nowa oro ame len ta ndron badeh, kadok badeh nyaran Sem, bwaneh badeh nyaran Ham ya silih Jepet. (Ham badeh tama Kenan).
19 Nadu Nowa oro ma taloh doh baden adeh tubu iri lau mari badu munyak.
20 Nowa badeh ndramak ta amwekes bilin ma hawe iy ndramak ta atah wa-in ma mwena.
21 Ano hamon ta iy a-un wa-in ano badeh ma iy ibo lolo-ou ma iy amadin kolau bwe, udu bolo asiu balei.
22 Eme tama Kenan Ham badeh eme anyolom taman kolau bwe eme ma iy suburuk i ta nadu tinen uru.
23 Ano Sem uru Jepet ame andrei kolau, ano uru talahani udu kona uru. Eme uru adek na kona uru ala badeh tubulu-i tama uru. Ya mada uru badeh batou tama uru bwe.
24 Ano boto-on ta wa-in ano badeh Nowa amak iy i tanan ai nadun bwaneh badeh amwekes lakou nane doh i tan,
25 eme iy anya, “Jo tandrakan Kenan kameh i bonyo-ou ta nadu tinen uru.
26 Katudun Laban Kindrei ta Sem! Kenan kameh i bonyo-ou ta Sem.
27 Ya Kindrei badeh mwesekei kane Jepet ki sola! Ya lundriyen badeh kamanyah kado hawe lau ta Sem oro. Ya Kenan badeh ki bonyo-ou ta Jepet.”
28 Ano hamon ta kon atuh badeh Nowa udu winiya jaha tuluwi lemenek (350).
29 Ano jaha tan asahan ndro rawa lemenek (950) badeh ma iy imek.