3
Aha kasolom kili ta Kindrei, iy kaseben aso
1 Na dah, aha nadu tine aso, mwan ma badih, sahou taso ari ja i buku doh: Aha kasolom kili ta Kindrei, iy kaseben aso ta atiye sahou ta Krais, ma sahou ta Laban kameh winiyan sakaliye ili bolo kon mara-ei, iri kandrei, ma katawi kihis kudu budon tiri, i buku le iy mene amekes udu ndrokowa aha, na len aha anuhun, ma atehei budon in ta sahou mwasin doh.
2 Ma aha ale, kasolom kili ta Kindrei, iy kandrei aso are mine iri lau ndra-in kame len; iri badeh, ta amekes kandriyen ndra-in. Tasah, aha tanan, lau solo-an labai badeh, batehei budon tiri handru bala ta Kindrei bwe, ma iri baso-ok gok aso amekes dah bwe.
3 Ya, lau rayah ja badeh, batehei budon tiri bala ta Kindrei bwe, arile Laban badeh, ta amekes kandriyen handru na len mari. Eme ma, taha katehei budon tataha handru ki-in tan, ma iy kameh atadau budon tataha, ma atondrok aha, ma balik kameh winiyan baruwi budon taha bwe.
4 Laban badeh, aruwi budon taso, ma aso atanan aha i buku doh: Iri kandriyen mari, aso mene asehek badeh, aha a-en hamon ta aliy ai. Ma hamon ale kameh, aha amekes i buku le aliy.
5 Aso badeh, aso-ok Laban ki-in bwena taha kaleheya budon mwasin kewek taha, ma aha winiyan atanan Kindrei, iy aso-ok aha labai, ma Krais winiyan aseben aha ta ales boto-on, ma ta bwese maha-an, buku iy mene amekes udu ndra kon munyak.
Lau ta Kindrei marakon badeh, kamekes gok
6 Aha nadu tine aso mwan ma badih, ta bwele-e nyara Laban tataha Jises Krais, aso anya kabatanau aha badeh, buku doh: Aha badeh, kare ndra len ta nadu tine aha iri rayah nane manyah laleyah, ma ba-en hamon ta tanan nane aso adeu ili tiri bwe.
7 Tasah, aha ndratanan, aha badeh, ka-en hamon ta kandriyen taso. Bwena mene, aso are hawe aha, aso bamanyah laleyah bwe!
8 Aso bakohok nyamon rayah badu mine aha laleyah bwe. Aso asih le! Aso abo gok boto-on na len ma ben, aso winiyan badeu maha-an bawek taha bwe.
9 Aso badeh, winiyan ndremenya aha ta aseben aso, arile aso abo gok ta aseben aso le, ta aha kanyolom ma ka-en hamon ta aliy.
10 Aso mene ado hawe ado badeh, aso atehei batanau boto-on labai ewek taha i buku doh, “Are lau, buku iy bamekes gok bwe, iy winiyan bakohok nyamon bwe.”
11 Aso amekes, tasah aso anuhun lau rayah ado bolo aha badeh, bamekes gok bwe. Iri badeh, are laleyah, arile iri asehek sahou solo-an ja, ta lahou ta ndramak ari labai.
12 Ta nyara Laban tataha Jises Krais le badeh, aso batanau iri boto-on, i buku doh: Aha kamanyah kamwenen, kamekes gok ta atondrok manyah taha.
13 Aha nadu tine aso mwan ma badih rayah ja, aha sawoyah ta amekes kandriyen mwasin.
14 Buku iri mwan ma badih rayah ba-en hamon tiri sahou, aso torowenei in bolo la-ukei dah bwe, mada aha kaleu kamwenen kudu tiri. Ma aha sadek hawe iri, ma idah kameh bwidi bwili iri mara-ei ama.
15 Arile, aha sabudon kaliu tiri udu bwele-e aha, ndri-iy. Aha badeh, kabatanau iri, ki buku nadu tine aha iri handru.
Sendrehendreh ta sahou ta Pol ili tiri
16 Laban kudu hawe aha mara-ei. Laban badeh, kati nyosowa mondrei, ya aso aso-ok mondrei tan badeh, kudu hawe aha na len mara-ei kudu le buku doh.
17 Jo Pol, jo atorou sahou sekesek tek ewek taha na minek le amwenen. Ya tarou dah badeh, kalem tek amwenen, jo edeu ndra bwena in bolo iri la-ukei jo atorou ili kon marakon, jo atorou marakon i buku le doh.
18 Tikisiy ma nyosowa mondrei ta Laban Jises Krais badeh, kudu hawe ado mara-ei.