10
Angelo atehei buk ili mine Jon ma iy iniy
1 Lakou ndra-in nane doh ano iu, ano jo anyolom angelo ari, boto-on labai udu bolo kandrah eme andri. Iri nyosowani iy na asi kandrah hawe beteke nyabwiu awudi batun udu le alih; madan badeh, i buku le an, ya katin ja badeh, i buku ndru laba tinan amekes na jih.
2 Iy tawi buk ari nadu bwisik asak le udu minen. Ya, iy nyahani katin salin udu bwele-e ndras, ya katin kamweu badeh, udu bwele-e kon munyak.
3 Iy nyahani katin mala-uh ano badeh, iy ataba bohon i tinan mara-ei, ma nyaro bohon badeh, i buku layon anyur. Iy aloh ano le badeh, nyaro kuruh ma ndro taloh atohou ili le rasan.
4 Nyaro kuruh ma ndro taloh nane atohou ili le rasan ano le badeh, jo eme anya katorou sahou toro nane amekes. Arile, jo anuhun boho ndramak ari udu bolo kandrah asehek sahou eme tek ja i buku doh, “Ou satorou sahou toro kuruh ma ndro taloh nane atohou ili le rasan doh. Ou tawiy kihis kudu budon tam le ka-iy.”
5 Udu hamon toro lakou nane ano badeh, jo anyolom iy angelo nane nyahani katin raka udu bwele-e ndras ma raka udu bwelee munyak badeh, suri minen salin nyowonya amwenen iu ili kandrah.
6 Ma iy asehek sahou tandrakan handru iu ili loken labai ta nyara Kindrei, iy winiyan bamak bwe, iy kameh ta udu le buku doh, iy bwidi kandrah, ma iri lakou mara-ei udu aliy, munyak ma lakou mara-ei udu bwele-en, ndras ma lakou mara-ei udu aliy. Iy angelo nane asehek i buku doh, “Len anya kano ai. Kindrei kameh winiyan babe-en ja bwai!”
7 Arile, iy angelo ndro taloh doh ili oloh ndrah tan, ma nyaro ndrah tan asahan, ma, na le liliy, iri lakou mara-ei nane Kindrei anya kamekes i san ta gok ta nadun, mara-ei kameh ano. Iri tanan mene ta gok ta Jises kameh amekes bame lewan bwe, tasah bwena mene Kindrei badeh, tone udu tiri lau mwan ma badih. Arile, udu hamon ja badeh, iy nyowaniy, ma iy atehei ili mine iri lohowan tan, iri badeh, propet tan ta asehek ili tiri lau mara-ei.
8 Ano ja boho ndramak nane jo anuhun udu bolo kandrah, iy badeh, asehek sahou eme tek ja i buku doh, “Ou ala andrei buk ndrasihiy le udu mine iy angelo nane ales udu bwele-e ndras ma munyak.”
9 Jo eme edek amwenen ili hawe iy angelo nane, ma jo ndremenya iy katehei nadu buk nane doh keme minek. Iy eme tiye tek i buku doh, “Idoh, ou andrei, ma ou aniy; idah kameh, i titi-in udu bolo ndrinem, arile simidin udu bohom kameh, nyaman labai i buku gwa ta bwirik.”
10 Jo eme andrei nadu buk nane udu minen, jo atehei ili bohok, ma jo aimon, ma simidin badeh, nyaman labai i buku gwa ta bwirik udu bohok. Arile, udu hamon ta jo sakalamiy, titi-in ta aliy ja badeh, udu bolo ndrinek.
11 Ano iri ado kandrah tiye sahou eme tek i buku doh, “Ou ala asehek sahou ta Kindrei dah ja, ta iri lakou mara-ei kameh asahan tiri lau, bada iri randrah, randrah, ma tiri lau badu kon munyak tinan mara-ei, ma tiri lau asehek boho kon rakon rakon badu kon mari, ma tiri kabin ale.”