2
Sahou ili tiri lau mwan ma badih badu kon Epesus
1 Iy ndramak nane dah asehek eme tek i buku doh, “Ou atorou rayah sahou kili ta angelo ere bwena tiri lau ta Kindrei are kon Epesus. Sahou i buku doh:
‘Jo badeh, tawi oro ndrau ma ndro taloh udu minek salin, ma jo edek bolo ndrokowa ndru-u oro sun ma ndro taloh iri amekes na bek nyikilikin. Jo le amwenen badeh suni sahou dah ewek tam:
2 Jo badeh, ndratanan mara-ei ndrano ta iri kandriyen mara-ei nane aha lau ta Kindrei badu Epesus amekes, ma ta sa-ar ta gok taha mara-ei ano. Jo tanan, aha badeh, ales boto-on labai tiri maha-an asahan taha, ma aha bwale aha iri lau ndra-in. Iri badeh, tiye aha i buku doh, “Ahi aposel ale.” Arile, iri aposel bwe. Ma aha ndraseleyani sahou tiri, ma aha ndrasilahei kati kandriyen mara-ei iri amekes. Eme ma, aha ndratanan ai, iri lau ta wendreya le.
3 Aha badeh, ndra-en hamon tek, ma aha ndratawi nyarak ndrahis mara-ei. Eme ma iri lau badeh, amekes ndra-in ewek taha. Arile, aha badeh, ales boto-on labai, ma bwese iri maha-an mari doh, ma jo tanan aha bawoyah ta aliy bwe.
4 ‘Arile, jo tek sahou udu taha i buku doh: Ma bwena handru mene aha atehei budon taha badeh, eme le tek, ma aha aso-ok jo labai, arile nadah ja badeh, aha baso-ok jo bala buku bwena mene aha amekes ja bwe.
5 Ya, ma bwena mene aha amekes kandriyen mwasin labai, arile nadah ja aha ndraruwaniy. Ya, aha kabudon kili hamon ja ta kandriyen, mene aha atehei budon taha mara-ei eme le tek, ma aha aso-ok jo labai. Aha katubuni ndrine aha ja, ma ka-en hamon tek buku bwena mene ja. Buku bwe-eh, jo kameh asahan hawe aha ma andrei ndru-u sun taha iu.
6 Handru labai, aha amekes kandriyen ari mwasin labai. Aha badeh, bwale aha kandriyen tiri lau ta Nikolas. Jo ale bwalek kandriyen iri amekes.
7 ‘Ya, buku ndranye aha udu aliy, aha kanuhun saba lakou handru Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri bwe, jo kameh tiye buku doh, iri kameh winiyan akohok nyamon badu ta kei nane edeu kohan mwasin ili tiri mwan ma badih. Kei doh badeh, udu bolo bilin ta Kindrei udu bolo kandrah.’ ”
Sahou ili tiri lau mwan ma badih ta Kindrei badu kon Semena
8 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Semena. Sahou i buku doh:
‘Jo ndra bwena, bwena labai, ma jo ndrobek handru. Jo mene imek, arile jo amak eme awas ja, ma jo udu kada-ah. Jo amwenen asehek sahou ewek taha dah:
9 Jo tanan iri maha-an ma isi badeh, ndrasahan taha, ma jo ndratanan, aha ari lakou bwe, aha badeh, ndra buku iri lau laleyah. Arile, lakou taha mari badeh, solo-an labai udu hawek. Ma jo ale tanan sahou nane iri lau rayah sondrokonya aha badeh, badu boho iri Juwis amwenen. Iri lau nane doh anya, “Ahi badeh, lau ta Kindrei handru, tasah ahi badu Juwis.” Arile bwe, iri badeh, lau ta Satan.
10 Hamon kameh, aha akohok sisi-in ma bwese maha-an, arile aha sanoh ta aliy. Aha kanuhun! Balik kameh atehei iri mwan ma badih rayah badu bolo aha ala bolo kou, ta none budon taha. Ma aha kameh akohok sisi-in ma bwese maha-an ili winiya le len ma ronoh. Arile, aha saruwani budon taha handru udu tek. Aha katawiy kihis budon taha handru kili, winiya le len iri adai ou amak. Ma idah kameh jo edeu taha kohan handru ta udu le buku doh, i nyara ndramas taha.
11 Ya, buku ndranyem udu aliy, abo, ou anuhun saba lakou handru, Malawin Mwasin asehek ili tiri lau ta Kindrei! Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, iri kameh winiyan bakohok sisi-in ta imek ari hamon ja bwe.’ ”
Sahou ili tiri lau mwan ma badih ta Kindrei badu kon Pegamum
12 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Pegamum. Sahou i buku doh:
‘Jo tawi samen raho lawe-en, madan ma la-uh, ma madan, madan labai, ma jo suni sahou dah ewek taha.
13 Jo tanan, iri lakou ndra-in asahan kon nane aha are aliy badeh. Satan badeh, ndratondrokei iri mwan ma badih rayah badu loboho badeh, ma iy udu koyeu tan ma ndrasahan kabin handru! Bwena mene, iy ndramak Antipas badeh, iy ndramak ari ta atiye sahou tek, iy udu hawe aha, ma iy in hamon handru tiri sahou tek. Eme ma, iri lau badu loboho badeh, adai iy imek udu kon tiri lau ta Satan are aliy. Na len dah, aha baruwani budon taha udu tek bwe le. Aha badeh, a-en hamon tek kahis, ma aha batone budon doh bwe le.
14 ‘Ya, aha mwasin handru, arile jo tek sahou rayah udu taha: Iri lau rayah are bolo aha kede-eh badeh, a-en hamon ta leheya ta Balam, iy mene leheya Balak, san ta ariu iri lau badu Isra-el ta taku ala bolo kandriyen ndra-in. Eme ma, Balak andrekei iri mwan ma badih rayah badu Isra-el ta aimon nyamon nane iri asalom ili ta nyara kindrei ta wasai, iri amekes na sukumada kei, ma iri amekes kandriyen ndra-in ta karei.
15 I buku le aliy ai, lau rayah are bolo aha kede-eh badeh, a-en hamon ta sahou tiri lau ta Nikolas.
16 Eme nadah badeh, aha katehei kona aha kili tiri sahou hawe kandriyen ndra-in tiri lau ta Balam hawe Nikolas. Buku aha bamekes bwe-eh, mirihik ai, jo kameh ewek amekes bahun hawe aha lau nane a-en hamon ta sahou tiri lau ta Nikolas, na samen madan, madan labai kameh udu bohok eme len.
17 ‘Buku ndranye aha udu aliy, jo aso-ok aha kanuhun saba lakou handru Malawin Mwasin asehek ili tiri lau ta Kindrei. Buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, jo kameh edeu niri mana, amai labai udu kon tek. Ma jo ale kameh edeu bek belen mara-ei i tiri ari, ari. Ma udu bwele-e bek doh, jo kameh torowenei nyaran ha-un udu aliy. Ma ari ndramak ja winiyan bala tanan ta kati nyaran doh bwe. Are lau, iy nane akohok bek doh, iy le kameh winiyan i tanan moson ta aliy ai.’ ”
Sahou ili tiri lau ta Kindrei ado kon Tayataira
18 Iy ndramak doh tiye jo ja i buku doh, “Ou atorou rayah sahou kili ta angelo ere bwena tiri lau ta Kindrei are kon Tayataira. Sahou i buku doh:
‘Jo Nadu Kindrei, madak badeh, anya i buku jih nyarahan labai. Ma bada katik badeh, buku bras nyikilikin ma nyikadin labai. Eme ma, jo amwenen asehek sahou dah ewek taha lau batun ta nyala aliy:
19 Jo ndratanan ta kandriyen marakon aha amekes. Jo tanan ale, ta aha badeh, aso-ok labai iri lau rayah ja. Ma aha ale atehei budon taha mara-ei eme le tek. Ma aha amekes gok ale ta aseben iri mwan ma badih rayah ja. Na len marakon, maha-an anya kasahan, arile aha ales boto-on ma atadau aha tiri lakou doh. Nadah, kandriyen solo-an aha amekes badeh, mwasin labai ja tiri kandriyen mene aha amekes ma bwena, kabatana aha asahan lau ta Kindrei.
20 ‘Ya, lakou mara-ei aha amekes badeh, mwasin. Arile, jo basekesek ta lakou ari aha amekes bwe. Aha badeh, andrei Jesebel ewek udu hawe aha, iy badih doh, leheya kandriyen rayah ndra-in i taha mwan ma badih ta amekes gok tek. Ya, iy badeh, ndrawendreyani iri, ma iy anya iy le badeh, propet. Arile, iy ibo gok ta leheya iri mwan ma badih tek ta a-en hamon ta kandriyen ta karei ma aimon nyamon nane iri adeu i ta salom ta kindrei ta wasai iri amekes na sukumada kei.
21 Jo ndratehei len ndrala tan, tasah jo aso-ok iy katubuni ndrinen ta iri kandriyen ta karei iy amekes. Arile, iy baso-ok bwe.
22 Ya, aha kanuhun! Jo kameh edeu sisi-in hawe sik ndra-in laba tinan i ta badih doh. Ma hawe iri mwan ma badih nane a-en hamon tan amekes kandriyen ndra-in i le buku iy, buku iri batubuni ndrine iri bwe, ma batehei kona iri bala tiri lakou doh bwe-eh, idah kameh jo edeu sisi-in ma maha-an laba tinan labai ili tiri.
23 Ma jo ale kameh idi nadu i badih nane mara-ei amak au. Eme ma iri mwan ma badih ta Kindrei kameh winiyan atanan buku, jo badeh, anyolom ma aleben amwenen labai iri lakou udu budon ma ndrine iri mwan ma badih mari. Ma jo kameh edeu ndramas ndra-in labai ewek taha ari ari, i bundruwe le iri kandriyen nane aha amekes.
24 ‘Arile, nadah badeh, jo anya kasehek kewek taha ado Tayataira, aha badeh, ba-en hamon ta sahou ta Jesebel bwe, ma aha ale bakohok ari tanan ta kandriyen nane iri aloh, “Udu bolo kandriyen handru ta Satan.” Na aha le badeh, jo anya kasehek ki buku doh: Jo kameh winiya badeu ari sahou batanau ta aha ka-en hamon ta aliy ja bwai. Lakou ari le doh badeh, kabwai.
25 Iri lakou marakon ale aha atehei budon taha, ma a-en hamon ta aliy badeh, aha katawiy kihis mara-ei, kili winiya le len ta jo kameh eme hamon eme kon munyak ja.
26 ‘Ya, buku are mwan o badih ale ales boto-on udu bolo bahun nane balik amekes i tiri, ma iri baruwani budon tiri handru bwe, ma iri ale ta amekes lahou na so-ok tek winiya le gok tek ano; jo kameh edeu boto-on ili tiri, ma iri kameh asahan tinan are bwele-en labai ja tiri mwan ma badih badu kon munyak tinan mara-ei.
27 I buku le buk ndrabun ndrasehek,
“Iy kameh tawi balekei hayen ari udu minen ta atondrok iri mwan ma badih boto-on handru,
ma tabasi marakon ili le bwisik, bwisik i buku ndramak tabasi kun iri amekes na ndren.” Wari 2:9
Jo amwenen kameh edeu gok doh i tiri. Idoh, i buku le gok mene tama edeu eme tek, ta atondrok iri mwan ma badih marakon.
28 Ma jo kameh edeu ndrau ta boho len i tiri.
29 Ya, buku ndranyem udu aliy, jo aso-ok ou anuhun iri saba lakou handru, Malawin Mwasin asehek ili tiri lau ta Kindrei.’ ”