2
Kukue Ko Ɔ́wɔni Utǝ Efeso Eto Bafokanɔfɔ Eto Ditsyukpa.
1 Mfo nya ɔ́tɛyi mɔ Yohanes nkǝ, “Wɔni etiki nyamfo atsyese Efeso eto bafokanɔfɔ eto ditsyukpa eto Onanto eto ɔtɔnkpe fǝnkǝ,
Mɔ, Yesu, nwǝ nlɛ befandebi bekuanse lǝ kodiani, nya ɔnlɛ bɔyɛ lǝ sika sia eto kakandiɛ eto keyifo ekuanse nti eto etiki ni nnya nlɛ bubǝ mfo nɛ.
2 Nnyi keyifo ka fékeyifo, nyi kase fákplatsya ku kase fákpe dibusǝ ku kase fákpe nkɛale fǝnyǝ kanyi. Nnyi miǝ aanla babuyifo tidi eto asa. Áto mba laakpo mǝ ǝsuǝ bǝ batɔnkpe abe, fɛɛ benni, nya fǝnyǝ fǝ beyifo badiantidi.
3 Nyi miǝ akpe dibusǝ nya fǝnyǝ kanyi lǝ mɔ disi nya ani mánlo fǝ.
4 Fɛɛ kabua ka minyǝ lǝ fǝ ǝsuǝ ni bǝnkǝ, ensi anla mɛ mɔmɔ fe kase fákala mɛ kɔ.
5 Nyaso kloma kaka fǝtǝkǝ fɛ fáfankli fetsyi ǝsuǝ. Tsyi awuninsǝ lǝ ǝtsyǝ fe kase fǝtsyǝ kɔ. Nya lǝ tsyi awunisǝ lǝ fǝ abua ǝsuǝ, lǝ inni nko muubǝ ntsyi fǝ okandiɛ eto uyi ǝmǝ lǝ wǝ kǝnyǝkɔ
6 Fɛɛ nnya ni fǝ afele ni bǝnkǝ, leekisi asa nnya Nikolatia eto betidi leeyifo fe kase mintsya leekisi nya.
7 Lǝ akpe atoo, nyalɛ tsyue ato lǝ anɔ lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi. Mba ditǝkǝ kato, muutǝ mǝ kuyi ko lǝǝtǝ nkpǝ ko ńyǝ lǝ Onanto eto ɔkpɔ kafo eto eyibibi ǝtsyuǝ miǝ bedi.”
Kukue Ko Ɔ́wɔni Útǝ Smirna Eto Bafokanɔfɔ Eto Ditsyukpa.
8 Nya ɔ́tɛyi mɛ nkǝ, “Wɔni kukue komfo atsyese Smirnafɔ eto bafokanɔfɔ eto Onanto eto ɔtɔnkpe fǝ,
Mɔ, Yesu, wǝ ni ututɛ ku ɔfɛfɛfɛ, wǝ díkpe fɛ usi ótaka útsyi ɔkɔmǝ úbǝ nkpǝ, nlɛ nyamfo bɔtɛyi minkǝ,
9 Nnyi kanyi ka bɛnlɛ bunyǝ ko ohiã wǝ bɛnlɛ bunyǝ. Fɛɛ lǝ sitinti, biyifo batabinyǝ. Nnyi asa bua nnya mba bǝ mǝ ni Yudafɔ fɛ benni Yudafɔɔ, laatɛyi kefi kabiasǝ mi. Bomu beyifo mba nkpe lǝ Obonsam eto ditsyukpa nti.
10 Biante kanyi saa ka biǝbǝ bunyǝ sikpi. Bitsyue ato lǝ bǝnɔ. Obonsam eboto mi bǝtsyuǝ obe, utǝ bǝ beti mi bǝtsyuǝ bakpe lǝ aba eto diyo, biunyǝ kanyi itǝ eyi lefosi. Bidi ɔnukualɛ bitǝ mɛ lǝ ibǝ bǝ balo mi kulaa tsya, nya muutǝ mi nkpǝ manlo eto lekankpakpa fe mba dítǝkǝ kato.
11 Lǝ bekpe atoo, nyalɛ bɛnɔ lesa nǝ Lǝwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi! Mba luutǝkǝ lebua kato, embudufǝ lǝ ukpǝ nuǝfǝ manlo manlo ǝsuǝ.”
Kukue Ko Ɔ́wɔni Útǝ Pergamo Eto Bafokanɔfɔ Eto Ditsyukpa.
12 Nya ɔ́tɛyi mɛ nkǝ, “Wɔni kukue ǝtǝ Pergamo eto bafokanɔfɔ eto ditsyukpa eto Onanto eto ɔtɔnkpe nkǝ,
Mɔ, Yesu, wǝ nkpe lesiabi nyɛ nnuǝ yayaya eto etiki ni nkǝ,
13 Nnyi kaka binsi, kaka Obonsam dítsyǝ wǝ sekakedikɔ. Befo mɛ bɛnɔ kekleke. Nya bianyani mi bofokanɔ lǝ mɛ lǝ lefe nǝ bálo Antipa kulaa tsya, wǝ didi mɔ etiki lǝ ɔnukualɛ eto kusu ǝsuǝ lǝ kaka Obonsam nsi.
14 Fɛɛ nkpe etiki sɛkɛ lǝ mi ǝsuǝ. Bekpé betidi bǝtsyuǝ lǝ mi nti ba ntekeko Balam eto asatete. Utidi ǝmfo ni nwǝ léte Balak kase ɔɔwɛ Israel bebi okpe lǝ lebua ǝsuǝ, nya ɔ́wɛ mǝ ókpe bédi lesa nǝ béfi bǝtǝ bǝfiǝ kedi, nya bédi sɛsɔnɔ.
15 Nko kee, mi bǝtsyuǝ tsya ntǝkǝko Nikolatiafɔ eto asatete kama.
16 Bisinkli lǝ mi abua kama! Lenni nkoo, yǝmbɔklɛ muubǝ mi ɔflɔ nya muufi lesiabi nǝ nkpe mɛ lǝ kɛnyɛ nkpɔnko betidi bamfó lema.
17 Lǝ bekpe atoo, nyalɛ bɛnɔ lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi. Mba ditǝkǝ katoo, muutǝ mǝ manna eto didisa kulakula nǝmǝ ditsyuǝ. Muutǝ mǝ utsyuǝ saa tsya lebaflubia nǝ ǝsuǝ báwɔni diye fɔfɔ nǝ kuutsyuǝ saa lenyi bǝtǝkǝ enso nwǝ hã léfo ni.”
Kukue Ko Ɔ́wɔni Útǝ Tiatira Eto Bafokanɔfɔ Eto Ditsyukpa.
18 “Wɔni kukue komfo atsyese Tiatira eto bafokanɔfɔ eto Onanto eto ɔtɔnkpe fǝnkǝ,
Kɛnyɛ kamfo etsyi Onanto eto Ubi wǝ eto ǝnǝmi nlɛ bunyǝ fe ute seka, nya wǝ akpa nlɛ buyǝnde fe ayiwa nnya bási ele kɛnkɛ.
19 Nyi keyifo ka feyifo. Nyi kase fala mɛ, fǝ bofokanɔ lǝ mɛ ku fǝ kesumu lǝ kanyinyǝnyǝ ǝsuǝ ku dibusǝ nǝ nkpe fǝ, nyi miǝ alɛ bokplatsya mɔmɔ kaso kɔ.
20 Fɛɛ nnya minyǝ lǝmbǝ kɔnɔ lǝ fǝ ǝsuǝ ni bǝnkǝ bítǝ usio wǝ baakpo Isabel, wǝ nkǝ uyifo Onanto eto unyɛlǝkǝtidi kusu ɔnlɛ asa bote mɔ beyifoyifo, kanyansǝ mǝ kusu kedi asɔnɔ, nya beedi edisa nnya béfi bǝtǝ bǝfiǝ kedi.
21 Ntǝ wǝ lefe miǝ ɔtsyi ɔwuninsǝ lǝ ɔyɛ abua buyifo, fɛɛ ɔ́ni nkǝ wǝmbɔyɛ wǝ sɛsɔnɔdi.
22 Lǝ nnya esoo, muutǝ unyǝ kanyi lǝ wǝ belabeke biamǝ ǝsuǝ nya mba laakpo wǝ ebunyǝ kanyi sitinti. Muuyifo nyamfo nko lǝ bantsyi bawuninsǝ bayɛ asa bua nyamfo buyifo ku wǝ.
23 Moolo mba ntǝkǝko wǝ tsya lǝ bafokanɔfɔ eto etsyukpa kenke tsya lǝ bate bǝ nyifo nwǝ nyi utsyuǝ saa eto nsusu kǝmiǝ ku wǝ alasa. Moofo utsyuǝ saa kayo ɛyɛ lǝ wǝ eyifosa eto kɛnyɛ.
24 Fɛɛ mi Tiatirafɔ fɛfɛ ba dímamfo wǝ asatete bua nyamǝ, mimba dímankase wǝ asatete nnya baakpo bǝ Obonsam eto asakulakula nnya eto kǝmiǝ letsyo, bɛnɔ, mensimbutsyisǝ mi bitsyike bamba saa.
25 Fɛɛ isu ese lefe nǝ muubǝ, bɛkɔbe lesa nǝ bɛnlɛ kɔni kekleke bɛlɛ.
26-27 Nya mi bǝtsyuǝ ba luutǝkǝ lebua kato nya bɔɔlɛnko nko isu ese lǝ kalosǝkɔɔ, muutǝ mǝ ǝsuǝale fe kase mímfo mintsyiko mɔ Anto ɔflɔ. Muutǝ mǝ ǝsuǝale bedi seka lǝ ese ese ǝsuǝ,
‘Bedi seka lǝ mǝ ǝsuǝ ku kɔni ale,
baba mǝ besense bakpo fe kase baaba ekplibi seka.’
28 Muutǝ bǝyǝnde fe kolensiǝnto eto sefandebi ke tsya.
29 Lǝ bekpe atoo, nyalɛ bitsyue koto lesa nǝ Lɛwɔnɔ nǝmǝ nlɛ bafokanɔfɔ eto etsyukpa nyamǝ bɔtɛyi.”