9
Faik fo Lamatuak nadenu Ndia hataholi nala, Ndia boe oo fee sala hak ma koasa
1 Boso duduꞌa mae, au taa aena hak fo sulak leoiak fee ei. Huu, Manetualain nadenu au uu afada hataholi laꞌeneu Ndia. Au boe oo, ita itak Yesus, ita Lamatuan. Au nanambaꞌak akandoo ua Ndia. Ei basa nggei boe oo, mamahele neu Ndia, huu au ueng.
2 Mae hataholi feꞌe kala taa simbok au dadik Lamatuak nadedenun, tehuu neu ko ei bubuluk so, mae, Lamatuak nadenu au, fo afada Ndia hehelun neu ei. Mete ma ei nau sangga ndia butin bali, na, mete ei nanggatutuu-nambadedeim leo. Huu, ei nanambaꞌak mia ita Lamatuan!
3 Au sangga ataa asafali neu hataholi fo nateme soli salak neu au, leoiak:
4 Ei duduꞌa mae, au ma Barnabas taa maena hak simbok nanaꞌa-nininuk neme hataholi la fo ai manoli sala do?
5 Ei duduꞌa mae, ai taa maena hak, sao ina salanik, fo bisa tungga noꞌu, suek ono-lau nai mamana feꞌek do? Naa te, Lamatuak nadedenu feꞌe nala loo sao nala. Petrus mesa kana leondiak boe!
6 Do, ei duduꞌa kada au ma Barnabas mesa nggai musi tao ues sangga doik, fo ai bisa masoda suek manoli hataholi?
7 Ei duduꞌam ndia, neten hata? Mete soldadu la. Ala taa hasa sila nanaꞌan ma baloꞌa nala. Mete kada hataholi mana tao ues lai osi anggol dale. Taa hambu esa kaꞌin, nae, “O taa bole muꞌa anggol boa kala sila!” Mete kada manahoo la. Sila laena hak fo haꞌi lala biꞌilombo lanea kala susu oen.
8 Au kokolak leondiak taa tungga au, fo hataholi basa faik duduꞌa hehelin. Huu, Manetualain Heti-heu nala sila boe oo, lafada dedeꞌak leondiak boe.
9 Nai baꞌi Musa Heti-heun nana sulak, nae, “Ledoeik sapi heheta hade, fo tao feꞌe hade no nggiin, na, boso lapa misa bafan, fo suek bisa naꞌa.” Ei duduꞌa maehetuk kada Lamatuak nau ela kada sapi mesa kana bisa naꞌa do?
10-11 Taa! Huu, Ndia kokolan boe oo, suek tao matak neu ita! Huu, nana sulak boe, nae, “Hataholi mana foi dae, ma hataholi mana tao feꞌe hade deꞌek neme mbulen mai, na, neu faik ala tao ues ndia, sila boe bubuluk, lae, dei fo ala hambu babaꞌek.” Leondiak boe malole, mete ma hataholi nadedenu kala bisa simbo sila babaꞌe nala leme sila tatao-nonoꞌin buna-boa nala mai. Huu, ledoeik ai manoli ei dedeꞌa kala leme Lamatuak Dulan mai, de, ndia sama leo hataholi mana tao ue daek fo ana sele. De, ledoeik ai manoli basa, na, mete ma ai simbo nanaꞌa-nininuk neme ei mai. Huu memak ndia nandaa!
12 Hataholi feꞌek mana manoli ei, naena hak, fo simbo nanaꞌak ma bua feꞌek neme ei mai do? Mete ma ai, na, leobee? Ai maena hak lena heni sila!
Tehuu, ei bubuluk so. Ai taa pake mitak ai hak fo moke no nakasetik leondiak. Ai mahele nai dedeꞌak mata-matak, fo boso tao nakalelee ei. Huu no leondiak, na, ei mahiik mamanene Karistus Hala Malolen fo ai tuin neu ei.
13 Duduꞌa sudi kana dei! Malangga anggama la fo mana ono-lau lai hataholi Yahudi la Uma Ina Huhule-haladoin, ala lasoda leme fefeek fo hataholi leni kala. Ma hataholi mana ono-lau lai mei tunu-hotuk, ala bisa laꞌa mbaa, neme banda fo hataholi leni kala.
14 Leondiak boe, Lamatuak helu, nae, hataholi fo tatao-nonoꞌin nafada Karistus Hala Malolen, ala bisa lasoda leme sila tatao-nonoꞌin buna-boan mai. Ndia ndia, tetebes.
15 Mae, au aena hak fo asoda leondiak, tehuu, au taa ahiik tao leondiak. Au taa sulak susulak ia no hihiik fo suek ei mulai fee au buas. Au ono-lau ei dook ia so, ma, au taa oke hata-hata neme ei mai. De, malolenak au mate, neme kada hataholi duduꞌa lae, au mulai oke sudi hata.
16 Mae, au afada akandondoo henin hataholi, laꞌeneu Lamatuak Hala Malolen, tehuu, ndia taa dadik toꞌok fo au bisa kokolak koaok. Au musi afada hataholi laꞌeneu Lamatuak, huu Lamatuak ndia nadenu au leondiak. Mete ma au taa tao tungga au ueng leondiak, na, au soe ndia! Huu neu ko huhukuk tuda laꞌeneu au.
17 Mete ma au tao ues ia kada tungga au hihii heheling, na, buas fo au hambuk ndia, sama leo kada nggadi fo hataholi mana tao ues sala simbon. Tehuu, mete ma au tao ues ia, huu Lamatuak nadenu au, na, ndia feꞌe. Huu, Ana namahele au, fo au anea Ndia bua mabelin ndia.
18 De, mete ma leondiak, na, au nggading hata? Au taa paluu simbo nggadi! Au afada Lamatuak Hala Malolen, ma au taa oke hata-hata. Ndia ndia tao nala au ameda dai so. Ma namemeda manadaik ndia, sama leo au hambu au nggading. De, mae au aena hak mata-matak leo hataholi naena ues nafada Hala Malole, tehuu, au mesa nggau taa nau pake basa au hak.
19 Au ia, hataholi kalamboꞌis fo tao ues tungga au hihiing. Hataholi taa naena hak, fo nadenu au tao ues ia, do, tao ues ndia. Mae leondiak, tehuu au tao aok sama leo ata, fo basa hataholi laena hak ladenu au. No leondiak, na, au bisa tulun hataholi noꞌuk lena, fo ala lahele tungga Manetualain.
20 De, mete ma au akabubua ua hataholi Yahudi, na, au tao aok leo hataholi Yahudi, fo tulun hataholi Yahudi mana malelak Lamatuak. Mete ma au akabubua ua hataholi mana toꞌu tingga-tingga Lamatuak Heti-heun, na, au tao tungga Lamatuak Heti-heun, suek au boe, tulu-fali sala, fo lalelak Lamatuak, (mae au bubuluk so, ae, tao tungga Heti-heuk ndia, taa bisa tao nala au malole ua Lamatuak).
21 Mete ma au akabubua ua hataholi taa mana bubuluk Lamatuak Heti-heun, na, au sama leo sila, fo ua sala leni Lamatuak leu. (Au taa mboꞌi heni Lamatuak Heti-heun fo Ana nakondan nesik baꞌi Musa, tehuu hatematak ia au asoda unik Karistus Heti-heun.)
22 Soaneu hataholi fo dalen taa matea, na, au tao aok sama leo au daleng taa matea, fo au bisa kokoe sala, suek leni Manetualain leu. Soaneu basa hataholi la, na, au tao aok leo sila, fo mae leobee boe oo, au bisa tulun fee luma lasoda.
23 Au tao basa dedeꞌa kala ia, fo suek basa hataholi la bisa lamahele leu Lamatuak Hala Malolen. No leondiak, ita bisa hambu babaꞌek nai basa dedeꞌa malole la, fo Lamatuak nahiik fee ita.
24 Au fee nakandandaak neme nakasusudi nalaik. Hataholi noꞌu kala tungga lalaik, tehuu, mana hambu juara kada hataholi esak. De, o musi malai muni tean, fo suek dadik juara neu Lamatuak.
25 Basa hataholi mana tungga nakasusudi nalaik, musi tungga tebe-tebe hata fo ndia mesen nafadan hetu? Ala tao ues mbilu-mbuse leondiak, fo kada hambu solangga juara fo dei fo ana male. Tehuu, mete ma ita, na, ita tao ues fo hambu nggadi mana mahelek losa dodoon neu.
26 De, au taa alaik adabak. Tehuu au asusua tingga-tingga, alaik akandoo losa mateꞌek. Mete ma nakasasama au ua mana matutuk, na, au taa tutu salan, tehuu au tutu pesin.
27 Au tao tungga tebe-tebe, ma anoli tingga-tingga, fo suek au bisa ahele akandoo. Huu, taa malole, mete ma au afada hataholi feꞌek laꞌeneu Manetualain, naa te au mesa nggau laꞌolena heti-heuk, boe ma Lamatuak fee au uni nakasusudik deak uu.