11
Manetualain mana kokolan dua ala seli
1 Basa de, ala loo fee au, ai uꞌukuk esa nalun sama leo teteꞌe-aik. Boe ma, Manetualain palenda au, nae, “Yohanis, foꞌa leo, fo muu uku Au Uma Ina Huhule-haladoing, ma ndia mei tunu-hotun nai Yerusalem. Ma hingga basa hataholi mana hule-haladoik lai ndia.
2 Tehuu boso uku Uma Huhule-haladoik ndia pasan, te mamanak ndia Au feen neu hataholi nusa feꞌe kala, fo ala ta lalelak Au. Neu ko ala mai heheta tao langgenggeo Au kotang ndia, losa bulak haa hulu dua (fo ndia faik lifun esa natun dua nee hulu (1.260)).
3 Faik ndia Au adenu Au hataholing dua lai ndia. Ala dadik neu Au mana kokola nggala. Ala pake baloꞌa fafaluk ma lafada Au hehelung, losa faik kalifun esa natun dua nee hulu sila basan.”
4 Manetualain mana kokolan Zakarias, sulak memak neme makahulun mai, laꞌeneu mana kokola kadua kala sila. Ana lole pake gambar ai saitun huuk dua, ma mamana nakatetende banduk dua, fo lambadedein lasale Manetualain, fo ndia, basa hataholi manai daebafok Lamatuan.
5 Mete ma hambu hataholi sangga tao lakatotoꞌak Manetualain mana kokola kadua nala ia, na, neu ko haꞌi kalua neme sila bafa nala mai, fo tao lakade basa sila musu nala. No leondiak, na basa hataholi mana sangga tao lakatotoꞌa kasa, neu ko mate sala.
6 Neu faik fo dua sala dadik Manetualain mana kokola nala lai daebafok, Ana fee koasa fo kena uda. Ndia boe fee koasa fo tao oe matak dadi daak, ma koasa fo leni soe mata-mata kala lai daebafok ia, tungga kada sila hihii-nanau nala.
7 Mete ma sila fain fo lafada Manetualain hehelun basan so, na, neu ko banda manggalauk esa kalua neme bolo doidosok fo deman babasan taa. Ana natati laban dua sala, losa ana senggi ma tao nisa dua sala.
8-9 No leondiak, na, dua sala mate lai kota inahuuk, fo makahulun hataholi la tao lisa sila Lamatuan neme ai ngganggek. Te kota ndia, dadik kota manggalauk, sama leo Sodom ma Masir lele uluk. Boe ma hataholi la, mbia heni mana kokola kadua kala sila mbombola nala neu dalak. Boe ma hataholi luma leme basa hataholi nusa kala, basa leo la, basa dedeꞌa-kokola kala, mai lanilu mbombola kadua kala sila losa faik telu seselik. Ala ta latanggodo latoi sala,
10 huu ala lamahoko lita hataholi kadua kala mate sala so. Te fai makahulun, dua sala lambue tao babalik basa hataholi daebafok duduꞌa nala. De, basa sala ala tao feta, ma esa haitua fee esa hadia.
11 Tehuu, basa faik telu seselik, neu ko Manetualain fee sala ani-hahaek, fo lasoda fali. Boe ma basa hataholi mana nita sila, dele nggebe-nggebe.
12 Boe ma, mana kokola kadua kala sila lamanene hala malii esa neme lalai mai nadenu sala, nae, “Wei! Ei dua nggei hene lain ia mai leo!” Boe ma dua sala nana soꞌuk leni lalai leu, ma koꞌas mboti nala sala. Lita leondia, boe ma, sila musu nala nado lamanggonggoak.
13 Kada nggengge neuk, te dae nanggeꞌo nalan seli. Mete ma ita hingga basa uma manai kota, neme uma sanahulu, na, tuꞌu heni esa. Ma hataholi lifun hitu mate sala. Hataholi feꞌek fo ta mate sala, bii lalan seli. Tehuu sila boe fee hada-holomata neu Manetualain, huu Ndia ndia, mana palenda nai nusa-sodak.
14 No leondiak, na, soe kaduan ana seli so. Tehuu mata neuk bou! Te soe katelun sangga mai ia so.
Fuu toꞌi kahitun - Manetualain ma Yesus Karistus toꞌu palenda nai daebafok
15 Basa ndia, boe ma Manetualain ata nusa-soda kahitun fuu ndia toꞌin. Kada nggengge neuk, te au amanene halak noꞌun seli, leme nusa-sodak mai, lae,
“Hatematak ia mana toꞌu palenda nai daebafok,
kada Manetualain ma Karistus,
fo ndia Manetualain Hataholin fo Ana hele nalan so, neme makahulun mai.
Dei fo Manetualain toꞌu palenda sama leo Manek, losa dodoon neu.”
16 Malangga kadua hulu haa kala sila, fo mana langgatuuk lai kadela mana palenda la lai Manetualain matan ndia, ala lamanene hala kala sila boe. Boe ma ala sendek lunggulanggak ma mata nala losa dae, fo koa-kio neu Manetualain,
17 ma soda, lae,
“Ou Manetualain!
Ai Lamatuan!
Ai Manetualain!
Manetualain fo mana palenda basan.
Manetualain mana koasa basan.
Manetualain kasodak neme lele uluk mai.
Manetualain kasodak hatematak ia.
Ai moke makasi neu Manetualain,
huu Manetualain pake koasa inahuun so,
fo toꞌu palenda nai daebafok.
18 Tehuu hataholi nusa feꞌe kala luli,
huu tala nau tungga Manetualain.
Tehuu hatematak ia Manetualain luli boe,
huu sila tala nau lalelak Manetualain.
Hatematak ia fain losa so,
fo Manetualain huku hataholi ta mana nau mbali Ndia.
Hatematak ia, ndia fain losa so,
fo Manetualain tao nakalulutu hataholi fo mana tao nakalulutu hataholi feꞌek.
Hatematak ia ndia fain losa so,
fo Manetualain palisak hataholi mana mate kala dedeꞌan.
Hatematak ia ndia fain losa so,
fo Manetualain bala Ndia hataholi nadedenu nala mbuse titi nala.
Sila, fo Manetualain mana kokola nala,
ma Manetualain hataholi nala,
inahuu-kadiꞌik, lasi-mulik.
Manetualain bala basa hataholi la,
fo mana fee hada-holomata neu naden.”
19 Basa ndia, boe ma au ita nai nusa-sodak, Uma Huhule-haladoik lelesun nana soik. Boe ma au ita peti ndia fo makahulun ala paken mbeda Manetualain palendan, fo nana sulak nai batu. Boe ma manggahadok ana nahadok neu-mai, lalai nangguꞌuk nalulu inahuuk nalan seli natuti-natok, daebafok nanggeꞌo, ma uda es batu mabela nalan seli, tuda leme lalai mai.