6
1 Haia, ma lea ta iimola ani gamu e rakehasu fuana ta iimola na e manata mamana lau, e langi si diana fuana ka lea siana wane keketo gi na langi dasi manata mamana ana a Christ uria olosilana. Ma lau ana, e diana fuana ka lea siana tooa a God gi, eeri gera ka olosia na doo nae.
2 Langi musi haitamana go na tara tooa a God gi gera ka ketoa na tooa gi la molaagali? Haia, ma lea so muka bobola uria iililana na doo nae, gamu haitamana laugo muka olosia go agamu na gala doo gi ana si kada naa.
3 Langi musi haitamana go na tara gia ka ketoa na ensel gi? Nia naa, e tasa asianaa fuana gia ka bobola uria na olosilana na gala doo gi ana si kada naa.
4 Lea ta iimola ani gamu ka rakehasu fuana ta wane lau na e manata mamana, langi si diana fuana ka lea siana wane na e langi si manata mamana uria ka olosia.
5 Ma lea ta iimola ani gamu ka lea siana ta wane keketo urinae, nia e taꞌa ma nia ka bobola uria idalaa. Nau ku manata hasa teni tooa la soefaataia i fera gamu da liotoo ma daka haitamana go ada olosilana doo gi matanga gamu.
6 Ma ni gamu ana, si kada ta iimola lau ani gamu ka rakehasu fuana ta iimola ani gamu, nia ka lea siana na wane keketo na e langi si manata mamana ana a Christ, haia ka olosia. Nia langi si diana!
7 Haia, ma na doo gi na mu rakehasui gamu ana fuagamu kwailiu, nia e faatainia na gamu langi si roosulia go na kwaidooria a Christ. Ma e diana go ana lea muka faalamainia na waihaasi gamu gi daka iilia doo taꞌa fuagamu ma daka ngalia na doo gamu gi. Nia diana liufia na feengilaa na mu iilia ana si kada naa.
8 Ma ni gamu na mu manata mamana, mu iili taꞌa fuagamu kwailiu ma muka ngalia na doo gamu gi kwailiu.
9 Haia, gamu mu haitamana na tooa na aabulolada e taꞌa, e afetai gera ka too la Initooa a God. Langi musi manata mamana ana susugelaa. Na tooa gi na aabulolada e taꞌa, ma na tooa na gera fooasia na nunuidoo gi, ma na tooa ooeoe gi, ma na wane gi na da ooe ada fai nia na wane gi, ma na geni gi na da ooe ada fai nia na geni gi,
10 ma na tooa bebeli gi, ma na tooa lulugoni, ma na tooa na da gwou baita ana waen, ma na tooa na da bae susuge taꞌa gi sulia teni tooa ete gi, ma na tooa faafefe gi, haia na tooa nae gi e langi ta iimola ani gera tara ka ruu i laona Initooa a God.
11 Haia, ma ana si kada e sui na mai, bali ani gamu na aabulolaa gamu gi e urinae. Sui ana si kada nae, a God ka manata lukea na aade taꞌalaa gamu gi, ma muka faalu naa faasia na aabulo taꞌalaa gamu gi, ma muka hau na ana tooa a God gi. Sulia a Lord gia Jesus Christ fai nia na Aanoedoo a God gia daaro aadea hai gamu ka oꞌolo.
Muka falea na noni gamu gi fuana a God.
12 Haia, ma lea ta iimola ka haea, <<I nau ku haitamana kuka iilia go agu na doo gi sui,>> nau ku oolisia urii, sui boroi ana oe haitamana iililana na doo gi sui, langi na doo gi sui kasi diana fuamu. Ni nau, nau ku haitamana laugo kuka iilia go agu na doo gi sui. Sui langi kusi faalamainia tesi doo ka baita fuagu.
13 Ma lea so hasa ta iimola aai lau ka bae urii, <<Na fanga e too fuana na rakega, ma na rakega e too uria fanga>>, nau ku oolisia urii, tara a God ka faasuia na fanga fai nia na rakega. Urinae laugo, na noniga e langi lau doo uria ooelaa, sulia a Lord e haungainia na noniga eeri gia ka rao fuana. Ma a Lord ka aadasulia laugo na noniga.
14 A God e tataea a Lord Jesus faasia na maea, ma nia tara ka tatae gia laugo ana mamanaa baita nia.
15 Gamu haitamana gia tooa na gi manata mamana, na noniga nia ta bali go ana ana nonina Christ. Nia naa, langi si bobola fuana gia ka aadea tesi doo ana ta bali noni ana Christ uria oofulaa fai nia ta geni sesele!
16 Utaa, langi musi haitamana lea ta wane e teo fai nia na geni sesele, na roo noni daaro gi ka aalua naa tesi noni? Sulia na Kekedelaa Aabu e bae folaa ka urii, <<Na roo iimola naa gi daaro ka aalua tesi noni.>>
17 Haia, ma na iimola na e manata mamana ana a Lord Jesus, na mourilana fai nia na mourilana a Jesus daaro aalua go tee doo.
18 Haia, muka iiliili uria toolaa faasia na ooea. Teni aadelaa taꞌa gi laugo gera taꞌa, sui langi gera si labasia lau na noni. Sui na gwounge aabulolaa taꞌa ana ooelaa, nia haitamana ka labasia na noni.
19 Utaa, langi musi haitamana go na noniga naa na gula ni toolaa nia Aanoedoo Aabu na a God e falea fuaga? Nia naa, langi gia i talaga na e baita usia na noniga, sulia gia na doo a God gi.
20 Sulia a God e iilingia ka foli gia ana na maelana Wela nia. Nia naa, na doo gi sui na mu iilia ana na noni gamu gi, muka aade diana ana uria faaꞌinitoolana a God.
Sulia na afelaa ma na aarailaa.