3
1 Waihaasi gi ae, na baelaa iꞌisi: muka fooa fuana a God fuamelu, eeri na ainitalolaa gemelu ana baelaa nia a Lord ka tagala aliꞌali ma na tooa oro daka manata mamana ana ma daka hae baita sulia, iilingia laugo na mu iilia.
2 Molu ka fooa laugo eeri a God ka aadasuli gemelu faasia na tooa taꞌa gi. Sulia na tooa oro dasi manata mamana ana Faarongolaa mamana.
3 Ma a Lord mone, nia e faamamana ua go na baelaa nia gi, ma nia tara ka faarigita gamu ma ka aadasuli gamu faasia a Satan.
4 Ma a Lord ka adomi gemelu haia melu ka haitamana tara molu ka tasa dongaa ana roosulilaa na taa gi naa melu bae sulia fuagamu.
5 I gemelu ka fooa laugo hai a Lord ka adomi gamu eeri muka haitama diana ana na rakediana a God ma muka tasa dongaa ana fiimamanalaa gamu gi sulia a Christ boroi ana kada mu liufia na afetaia gi.
Nia bobola uria gia ka rao.
6 Waihaasi gi ae, sulia na mamanaa na a Lord gia a Jesus Christ na e falea fuamelu, nia naa melu ka kwaieresi gamu urii, muka too faasia na tooa na da manata mamana na daka noni eela uria raolaa ma daka aaburongo ana na doo gi na melu faatolomai gamu ana.
7 Gamu mu haitamana sui naa na mu bobola uria iilifai gemelulaa. Ana kada melu too mai fai gomolu, e langi melu si noni eela uria raolaa.
8 Ma i gemelu si ngalia oꞌoni go ana tesi fanga ana ta iimola, ma lau ana melu foli sui go. Sulia dani ma rodo melu rao rigita haia ka langi molu si daotoona tesi afetailaa suli gemelu.
9 I gemelu rao urinae, sui boroi ana gemelu too ana mamanaa uria ngali oꞌonilaa ana fanga faasi gamu. Gemelu iili urinae, eeri molu ka iilifainia na maluta gemelu ana raolaa.
10 Haia, kada baa melu too mai siamolu, na faatolomailaa gemelu fuagamu e urii baa, <<So ni tei ani gamu na e oote nia ana raolaa, langi molu si falea fanga fuana.>>
11 Melu kede urinae, sulia melu rongoa tee bali ani gomolu seenaa da noni eela uria raolaa, ma daka liliu go ada uria aadasilana na raoa gera teni tooa ete.
12 Ana mamanaa ana Lord Jesus Christ, melu bae ni kwaieresi kou fuagera ma melu ka bae fifii kou ani gera hai gera ka too oꞌolo ma daka iilia na mone tesi raolaa eeri gera ka ngalia na doo gi na gera dooria.
13 Ma i gamu laugo, waihaasi gi ae, langi molu si makeso uria na iililana doo diana gi.
14 Ma lea so ni tei ani gamu na dasi roo go sulia taa gi na melu haea gi kou i laona kekedelaa naa, molu ka manatatoona, ma langi molu si liu kwailiu fai nia, eeri nia ka ida.
15 Ma sui boroi ana, langi molu si manata hasa nia ta maalimae agamu. Muka bae abo go agamu fuana, sulia nia ta haasi agamu.
Na bae iꞌisi gi.
16 Melu fooa eeri a Lord na e haitamana falelana fanualama fuaga ka falea fanualama fuagamu si kada gi sui, ma ka too fai gamu.
17 I nau a Paul nau ku kedea na doo iꞌisi nae gi. Urinae nau ku faasuia na kekedelaa nau gi sui. Nia naa na kekedelagu.
18 I nau ku fooa haia a Lord gia a Jesus Christ ka rakediana fuagamu sui.