10
1 Oote waihaasi gi, nau ku dooria asianaa na tooa nau gi Jiu daka ngalia na mouria firi. Si doo naa nau ku fooa uria fuana God sulia dani.
2 Nau ku haitamana gera rigita asianaa uria fooasilana a God. Sui, na fooalaa gera gi e garo, sulia gera si haitamana na faatolomailaa mamana.
3 Sulia gera lafusia na malutana a God uria olosilana na tooa. Ma gera ka iili uria olosi geralaa i talada ana malutaa na gera haungainia. Urinae gera ka oote gera ana malutana a God uria olosilana tooa.
4 Sulia a Christ e faasuia naa na kwaieresia gi faasia a Moses, hai tei gera na da manata mamana naa daka oꞌolo naa i maana a God.
5 Haia, a Moses e kekede sulia na oꞌoloa ana roolaa sulia na kwaieresia gi urii, <<So ni tei naa e roosulia na kwaieresia gi tara nia ka mouri.>>
6 Haia, na Kekedelaa Aabu e bae sulia na oꞌoloa ana fiimamanalaa ka urii, <<Langi osi soeledi oe i talamu, <Tei naa tara ka raa i langi?>>> eeri ka faasifoa mai a Christ i aano, sulia a Christ e sifo sui na mai.
7 <<Ma langi oko soeledi urii, <Tei naa tara ka sifo la gula ni maea?>>> eeri ka taea mai Christ, sulia a Christ e tatae sui naa.
8 Ma na Kekedelaa Aabu ka haea laugo urii, <<Na faarongolaa God e nii garangi oe naa, e nii laona baelamu ma i laona mourilamu.>> Na faarongolaa nae, nia na faarongolaa sulia na fiimamanalaa na mi ainitalongainia.
9 Lea mu haea ana Jesus nia a Lord, ma muka manata mamana ana a God e taea faasia na maea, tara muka mouri.
10 Sulia a God e olosi gia sulia na fiimamanalaa gia ana Jesus. Ma nia ka faamouri gia sulia na baelaa gia sulia na fiimamanalaa gia.
11 Sulia na Kekedelaa Aabu e haea urii, <<So ni tei naa e manata mamana ani nia, tara nia ka langi si liobukonu sulia na fiimamanalaa nia.>>
12 Ma na Kekedelaa Aabu nae, nia sulia na tooa gi sui, na tooa i Jiu gi ma tooa maadiu gi. Sulia a Lord langi kasi eefa ta iimola. A God, nia na Lord fuana tooa gi sui, ma nia ka faadianaa na tooa gi sui na da gani nia uria ta kwaiꞌadomilaa.
13 Sulia na Kekedelaa Aabu e haea, <<Tara a Lord ka faamouria ni tei gera sui go na da soe fuana uria kwaiꞌadomilaa.>>
14 Haia, ma tara gera ka soe fuana a God uria kwaiꞌadomilaa utaa, lea langi dasi manata mamana ani nia? Ma tara daka manata mamana utaa, lea langi dasi rongoa ua na faarongolaa? Ma tara gera ka rongo utaa, lea langi ta iimola haia ka ainitalongainia?
15 Ma tara na tooa gi daka ainitalongainia na faarongolaa utaa, lea langi ta iimola hai ka oodua teni tooa uria ainitalongailana? Nia iilingia na Kekedelaa Aabu e haea, <<Lea teni tooa da dao mai fai nia na Faarongolaa Diana, nia diana asianaa!>>
16 Haia, ma langi lau na tooa gi sui da manata mamana ana na Faarongolaa Diana. Sulia Aesea e bae urii, <<Lord, langi lau na tooa gi sui da manata mamana ana faarongolaa gami.>>
17 Haia, na tooa gi haitamana daka manata mamana lea gera rongoa na Faarongolaa Diana. Ma na Faarongolaa Diana ka lea mai faasia ainitalongailana Christ.
18 Haia, ma ni nau ku ledi, nia mamana na hasa langi dasi rongoa na Faarongolaa Diana? Langi. Gera rongoa, sulia na Kekedelaa Aabu e bae urii, <<Na lingeeda e talofia la molaagali sui. Ma na ainitalongailana baelana gi lea ka dao mai laona molaagali teefou.>>
19 Haia, ma nau ku ledi lau ku urii, na tooa i Jiu gi, langi dasi haitamana go na faarongolaa nae? Langi. Gera haitamana, sulia a Moses e kedea na baelaa a God urii, <<Nau tara ku aade gamu tooa Jiu gi hai muka kwaifii sulia na tooa maadiu gi na tara kuka faamouri gera. Ma nau tara ku aade gamu muka rakehasu sulia ku rakediana fuana tooa na langi dasi haitamagu.>>
20 Ma a Aesea e bae raraꞌa i nao ka urii, <<Na tooa na langi dasi nanisi nau, gera ka daotoogu. Ma na tooa na langi dasi ledi suli nau, nau kuka aadea hai gera ka haitamagu.>>
21 Ma fuana tooa i Jiu gi, a Aesea ka bae urii suli gera, <<Sui boroi ana na manatada ka ngasi ma gera ka aaburongo, tau na mai nau ku soe gera eeri gera ka lea mai siagu.>>
Na kwaimanatailaa God fuada Jiu gi.