5
1 Si kada naa, gia too ana na fanualama fai nia a God sulia na raoa a Jesus Christ na Lord gia e iilia. Nia e urinae sulia a God e olosi gia sulia na fiimamanalaa gia.
2 Ma sulia gia ka fiimamana, a Christ e ngali gia siana a God eeri ka rakediana fuaga ma ka faadiana gia. Ma sulia e urinae, gia ka eele asianaa sulia gia ka fiitoo hasa tara gia ka initooa fai nia a God.
3 Ma langi lau na doo diana gi go ana gia ka eele sulia, ma gia ka eele laugo si kada gi ana afetaia, sulia gia haitamana na afetaia doo uria faarigitalaga eeri gia ka tasa dongaa ana manata mamanalaa.
4 Ma lea gia ka tasa dongaa urinae, tara a God ka eele suli gia. Ma ana si kada a God ka eele suli gia urinae, gia ka fiitoo hasa tara a God ka faadiana gia.
5 Ma na fiitooa nae, afetai fuana a God ka langi si faadiana gia. Sulia a God e faatainia ana rakedianalaa nia fuaga ana na Aanoedoo Aabu na nia e falea fuaga.
6 Gia haitamana a God e rakediana fuaga, sulia ana si kada afetai gia gi adomi gia i talaga, a Christ e mae usia gia tooa taꞌa gi, ana si kada na God e aadafilia.
7 Nia e afetai so ta iimola ka mae uria adomilana ta wane oꞌolo. Boro ta wane na ana oto mone haia ka mae fuana ta wane na e diana.
8 Haia, a God e faatainia sui naa na rakedianalaa nia fuaga, sulia ana si kada na mourilaga e taꞌa ua, a Christ ka mae usi gia.
9 Ana na kwaisuusilaa nia a Christ ana maelana, a God ka olosi gia naa. Lea urinae, tara a Christ ka adomi gia ka tasa eeri gia ka mouri faasia na kwakwaelaa a God.
10 I nao mai, gia na maalimaea a God gi, sui nia ka ruana fai gia sulia na maelana na Wela nia. Ma sulia gia na ruana a God gi, i nia tara ka faamouri mamana ani gia sulia a Christ e mouri lau.
11 Haia, ma langi lau si doo naa go ana na gia ka eele ana. Ma gia ka eele laugo sulia na taa naa a God e iilia ana Jesus Christ na Lord gia na e oolifai gia hai gia ka kwaimaani fai nia a God.
Adam fai nia a Christ.
12 Na aade taꞌalaa e dao mai laona molaagali sulia eetana wane nia e aadea doo taꞌa. Ma na maea e dao mai laugo fai nia na aade taꞌalaa. Ma sulia nia e urinae, na maea ka dao mai fuana tooa gi sui, sulia na tooa gi sui da aade taꞌa.
13 Haia, na aade taꞌalaa e too naa la molaagali suifetei a God ka falea na kwaieresia gi fuana a Moses. Haia, si kada e langi ua ta kwaieresia, a God kasi iidumia na doo taꞌa gi.
14 Boroi ana ka urinae, e ita mai ana si kada a Adam lea ka dao ana si kada a Moses, tooa gi sui da mae, boroi ana na tooa gi na langi dasi iilia na taꞌalaa iilingia a Adam ana si kada nia e oolisusuu ana a God.
A Adam e iilingia na mamalafooa ana a Christ, baa tara ka dao mai i buri.
15 Haia, na roo wane nae gi langi daaro si bobola, sulia na falelaa oꞌoni nia a God e langi si iilingia na aade taꞌalaa nia a Adam. Sulia na tooa oro da mae i nunufana na aade taꞌalaa nia tee wane nae. Haia, ma na rakedianalaa nia a God e baita ka liufia na taꞌalaa nia a Adam, ma na falelaa oꞌoni nia a God e baita ka tasa laugo fuana na tooa oro gi i nunufana na rakedianalaa a Jesus Christ.
16 Ma tee si eꞌetelaa na e too i matanga na falelaa a God ma na taꞌalaa a Adam e iilia. Sulia i buira na taꞌalaa nia a Adam, a God ka falea kwakwaelaa. Ma buria na doo taꞌalaa oro gi lau, a God ka fale oꞌoni ana oꞌololaa fuaga.
17 Haia, sulia na aade taꞌalana tee wane, na tooa gi sui daka mae. Ma si doo diana na e dao mai sulia si taa naa a Jesus Christ e iilia, e baita ka tasa. Sulia ni tei gera na da ngalia si rakedianalaa a God fai nia na falelaa nia ana oꞌoloa, daka too ana mouria firi i langi i nunufana a Christ.
18 Nia naa, si taꞌalaa nia tee wane nia ka falea maea fuana tooa gi sui, ma e urinae laugo na aade dianalaa nia tee wane nia ka olosia tooa gi sui ma ka falea na mouria fuada.
19 Ma tooa gi sui gera ka haitamana aade taꞌalaa, sulia na oolisusuulaa nia tee wane. Ma e urinae, a God ka olosida, sulia na roosulilaa nia tee wane.
20 A God e falea na kwaieresia gi eeri na aade taꞌalaa gi ka oro. Haia, si kada na aade taꞌalaa e oro, a God kafi faatainia na rakedianalaa nia ka baita tasa.
21 Nia naa, i nao ua na mai, na aade taꞌalaa ka baita faafia na tooa gi haia gera ka mae, ma e urinae ana si kada naa na rakedianalaa a God ka baita faafia na tooa gi haia gera ka oꞌolo, ma nia na aadea gia ka ngalia na mouria firi sulia a Jesus Christ a Lord gia.
Gia iilingia mae sui naa fuana taꞌalaa.