10
1 Sui i nau ku rikia tee ensel rigita lau e sifo mai faasia i langi. Nia oofi ana si barobaro, ma na fulaꞌaro ka too galia na ketena, ma na maana ka iilingia na hato, ma na roo aena gi ka iilingia ta roo bae fungu gi ana eere.
2 Ma nia ka dau ana na eꞌere doo toꞌou na da ifingia i abana, ma ka uri i fafona na aasi ana na bali ae aaolo nia, ma na bali ae mouli nia ka uri ana fafona hae gano.
3 Ma ka rii ana riilaa baita iilingia ngongorolana na lion gi. Ma buira nia rii sui, na fiu kukuru daka oolisia ana waligilaa.
4 Ma si kada na fiu kukuru nae gi e bae, nau ku aade aagau uria kedelaa na baelaa gera, ma ku rongoa tee lingee doo bae mai faasia i langi e bae urii, <<Langi osi haea fuana ta wane ana si doo baa gi na fiu kukuru baa gi da haea, ma langi osi kededa.>>
5 Sui na ensel na ku rikia e take fafona na aasi ma na hae gano, ka uua na bali aba aaolo nia i langi.
6 Ma ka bae aalangai ana na hatana a God na e totoo firi ma ka haungainia na langi ma na doo gi sui na da too i laona, ma na molaagali ma na doo gi sui na da too i laona, ma na aasi ma na doo gi sui na da too i laona. Ma ka bae urii, <<Ka langi naa ta faataulana.
7 Ana si kada na fiuna ensel e uufia na bungu nia, na manatalaa aagwa nia a God ka dao naa mai, iilingia baa nia e faatalo sui naa mai ana fuada na wane ni rao nia gi na profet gi.>>
8 Sui na lingee doo na ku rongoa i nao e bae fuagu faasia i langi ka bae lau urii, <<O lea kou, oko ngalia na eꞌere doo na e ifi i abana na ensel na e take i fafona na aasi ma na hae gano.>>
9 Ma ku lea, ma kuka gania na ensel nae hai ka falea eꞌere doo toꞌou nae fuagu. Ma nia ka bae urii fuagu, <<O ngalia, oko ania. Tara ka mamasia i fakamu iilingia na wewedua, sui tara ka afaea na rakemu.>>
10 Ma nau ku ngalia na eꞌere doo toꞌou nae faasia na abana na ensel nae, ma kuka ania. Na ainitoolana e mamasia i fakagu iilingia na wewedua. Sui, si kada ku ookomia kou, ka afaea naa rakegu.
11 Sui daka bae urii fuagu, <<I oe oko ainitalo lau ana na faarongolaa nia a God sulia na tooa oro gi ma na fera oro gi ma na baelaa oro gi ma na aaofia oro gi.>>
Na roo wane faamamana gi.