22
1 Na ensel naa ka faatainia laugo fuagu na kafo busu ana na kafo ana mouria na e gwagwalifolaa iilingia ta gilasi, e busu mai faasia si gula ni gwourua ana initooa nia a God ma na gale Sipsip,
2 ma ka iigwa mai oogotouna na tala na e liu i laona na fera baita naa. Ma na ai ana mouria e take sui go ana roo bali gi ana na kafo nae, ma lea doo ka fungu ana aakwala ma roo si kada i laona tee fe ngali. Nia e fungu ana tee si kada i laona fe sinali gi sui, ma na abana ai nae daka ngalia uria na guralana na tooa gi ana na fera baita gi.
3 Haia, ma si taa naa a God e langi si dooria kasi too laona fera baita nae.
Si gula ni gwourua ana initooa nia a God ma na gale Sipsip ka too i laona na fera baita nae, ma na wane ni rao nia gi daka fooasia.
4 Ma tara daka rikia na maana a God ma na hatana daka kedea i maadarada.
5 Tara ka langi go ta rodo i see nae, ma langi dasi dooria naa ta kwesu langi na raralana na hato, sulia a Lord God naa na raralaa gera, ma gera daka aaofia sulia dani firi.
Na daolana mai a Jesus.
6 Sui na ensel ka bae urii fuagu, <<Si baea naa gi e mamana, ma si baea ni manata ngadolaa ana gi. A God na Lord, na wane na e falea mai na Aanoedoo nia fuana na profet gi, ma ka falea mai na ensel nia hai ka faatainia fuada na wane ni raoa nia gi si doo naa gi ka fuli aliꞌali mai.>>
7 Ma a Jesus ka bae urii, <<Haia, nau aliꞌali ku lea naa mai. Oilakea fuada na tooa gi na da roosulia na kekedelaa aabu gi i laona na buka naa!>>
8 I nau a John na ku rongoa ma kuka rikia na doo naa gi sui. Ma si kada ku rongoa ma kuka rikia ana si doo naa gi, nau kuka boururu i maana na aena na ensel nae e faatainia na doo nae gi fuagu ma kuka aade agu uria fooasilana.
9 Sui, i nia ka bae urii fuagu, <<Osi iili lau urinae! I nau na wane raoa go ana laugo iilingi oe ma na dooramu na profet gi ma na tooa gi sui na da roosulia na baea gi i laona na buka naa. O fooasia amu a God!>>
10 Sui nia ka bae lau urii fuagu, <<Langi osi aagwatainia na kekedelaa a God gi i laona na buka naa. Sulia e garangi ka dao naa ana si kada hai na doo naa gi ka dao mai.
11 So ni tei na e iilia doo taꞌa gi, nia ka tasa dongaa ana iililana na doo taꞌa gi. Ma so ni tei na e oꞌolo ma ka iilia na doo diana gi, nia ka tasa dongaa ana oꞌolo ma ka iililana na doo diana gi.>>
12 Ma a Jesus e bae ka urii, <<Haia, i nau ku lea aliꞌali mai. Nau ku ngalia mai na kwaiaraa nau gi fai nau hai kuka falea fuana tei gera na sulia si doo diana gi na da iilida.
13 I nau naa na Alfa ma na Omega, na hahafalia ma na susuia ana doo gi sui.>>
14 Oilakea fuada na tooa gi na da saufia na maku tekwa gera gi ka faalu, eeri daka bobola uria na anilana na fufuana na ai ana mouria ma daka ruu ana na maehaga gi uria i laona na fera baita.
15 Haia, na tooa na da iilia na doo ni idalaa, ma na tooa na da aaruaru gi, ma na tooa ooeoe gi, ma na tooa hauwane gi, ma na tooa gi na da fooasia na nunui doo gi, ma na tooa gi na da suge ma daka iilia na doo susuge gi, gera daka too i maa faasia i laona na fera baita nae.
16 Ma a Jesus e bae lau urii, <<I nau a Jesus na ku oodua kou na ensel nau hai ka ainitalo ana si doo naa gi fuagamu na soefaataia gi. I nau naa na wane ana na ooliolitana David na aaofia, ma i nau naa na kwakwali i ofaidani na raralana e folaa asianaa.>>
17 Ma na Aanoedoo Aabu fai nia na geni fungao, daaro ka bae urii, <<O lea mai!>>
Haia, ma ni tei naa da rongoa na doo naa, gera ka bae laugo urii, <<O lea mai!>>
Ma so ni tei na e maeligwou ma ka dooria ngalilana kafo ana mouria, o lea mai ana, oko ngalia oꞌoni ana na kafo ana mouria.
18 I nau a John ku bae fifii fuana tooa gi sui na da rongoa baelana a God gi i laona na buka naa. Lea so ta wane ka aalua lau tesi doo sarenga fai nia, tara a God ka falea sarenga laugo ana na kwaelaa gi na da bae sulia i laona na buka naa fuana.
19 Ma lea ta wane ka lafua tesi doo faasia na baelaa a God gi i laona na buka naa, tara a God ka lafua laugo na doo nia ana na fufue doo ana ai ana mouria, ma na gula nia ana na fera aabu baita na da bae sulia i laona na buka naa.
20 Jesus, na wane na e faamamanaa na doo naa gi e bae urii, <<E mamana asianaa! I nau ku lea aliꞌali naa mai!>>
Iiuka, Lord Jesus, o lea mai!
21 Na dianalaa nia a Jesus na Lord ka too fai gamu sui. E mamana.