5
1 Sui nau ku rikia tee eꞌere doo na da kede roo bali ana, ma daka faamamalafooa ana na fiu si mamalafooa gi ana na eꞌere doo nae. Na wane na e gwouru ana si gula ni gwourua ana initooa, nia dau ana eꞌere doo nae lao aba aaolo nia.
2 Ma ku rikia tee ensel na e rigita asianaa, ma nia ka bae baita ka urii, <<Ni tei naa oꞌolo eeri nia e faorana uria lafulana na fiu mamalafooa naa gi ma ka ifingia na eꞌere doo naa?>>
3 Sui, langi dasi rikia ta wane i langi ma langi la molaagali ma langi i farana na molaagali hai so ka bobola fai nia na ifingilana na eꞌere doo nae hai ka aada i laona.
4 Ma i nau ku aangi asianaa, sulia langi dasi daotoona ta wane hai ka faorana uria na ifingilana na eꞌere doo nae ma na aadalaa i laona.
5 Sui, tee wane ana na wane baita gi e bae ka urii fuagu, <<Langi osi aangi. Aada oko rikia na Lion ana kwalafaa David ma a Juda. Nia e saitasa naa, ma ka bobola uria na lafulana na fiu mamalafooa gi ma na ifingilana na eꞌere doo naa.>>
6 Sui nau kuka rikia tee gale Sipsip e take ana initoona si gula ni gwourua nae, ma na fai doo momouri gi ma na wane baita gi daka too galigalia. Ma nau ku rikia laugo na doo maala gi na gera haungi ana i nao. I nia e too ana fiu kokonae doo gi ma na fiu maa gi. Haia, na fiu maa nae gi naa na fiu mangoedoo a God gi na e falea uria la molaagali loulou.
7 Ma na gale Sipsip nae e dao ma ka ngalia na eꞌere doo baa faasia na bali aba aaolo nia na wane nae e gwouru ana si gula ni gwourua nae.
8 Ma si kada nia e ngalia ana na eꞌere doo nae, na fai doo momouria nae gi ma na roo aakwala ma fai wane baita nae gi daka boururu i aano maana aena na gale Sipsip nae. Ma i gera sui go daka dau ana na doo ni kiilana na da alangia ana na harp gi, ma daka dau ana teu ana gold gi na e fungu ana na ai momoko gi uria suungilana. Haia, ma na hasu faasia na ai momoko nae gi naa na fooalaa gera na tooa gi na da manata mamana ana Christ.
9 Ma gera ka nguulia tee fe nguu faalu daka urii, <<I oe o faorana oko ngalia na eꞌere doo ma oko lafua na mamalafooa ana gi. Sulia gera haungi oe, ma na kwaisuusilaa ana mourilamu e duu fuana a God usia na tooa gi ana na aebara gi sui ma na baelaa eꞌete gi sui ma na aefera gi sui.
10 I oe o aaluda ana initooa ana fataabu gi uria na raolaa fuana a God gia. Ma gera tara daka baita la molaagali.>>
11 Ma i nau ku aada lau, ma kuka rongoa na nguulaa na ensel oro gi. I gera oro asianaa, da tooni gi ma na mola gi. Da take galia na gula nae ni gwourua ana initooa ma na fai doo momouri baa gi ma na wane baita gi.
12 I gera da nguu baita daka urii, <<Na gale Sipsip na da haumaelia, e faorana uria na ngalilana na mamanaa ma na todadoo ma liotooa ma na rigitaa ma na babaitaa ma na initooa ma na baelafea!>>
13 Sui ma ku rongoa na doo momouri gi sui i langi ma la molaagali ma i farana na molaagali ma i laona na aasi, gera sui da nguu daka urii, <<Na baelafea ma na babaitaa ma na initooa ma na rigitaa totoo firi fuana wane na e gwouru ana si gula ni gwourua ana initooa ma fuana na gale Sipsip.>>
14 Ma na fai doo momouri gi da oolisia daka urii, <<E mamana.>> Ma na wane baita gi daka boururu i aano ma daka fooasi daaro.
Na mamalafooa gi.