10
OMiccie pinet ul appik caꞌri culukku
1 Lon lothonceꞌret lon cik loMucca lapurrut polon iloporot ilaik lanthan, purrut empi okorronno oka lon ilaik ïcat. Akka nthokeccet aꞌrupu woüccük cik thupuththuput thakannothikkie ul woporot pꞌrin pꞌrin iaththaꞌrane Kapik ngaꞌrama.
2 Ana amma thokiot ngüccük cik thokat thaꞌret kin, okin thaceꞌret thokiot ngüccük cik. Akka ul ioccokothe lon nocïkït waathakkat woporot caꞌri culukku kirrkkir, ana okin thakanninat ka ken itti okin thonu lon ilokithak.
3 Anaruk aꞌrupu wothokinthet Kapik ngüccük cik enni thupuththuput wothokwarttikiet ul lon len ilokithak,
4 akka lonthommat itti ngüccük ngonyura ana ngolicok nganeko lon ilokithak.
5 Ittina, anakka oMiccie paat nocapu akwiꞌrekat Kapik itti,
“Aꞌrupu wothokinthet Kapik ngüccük cik ana aꞌrupu wothethet nuthuk, waKapik kꞌrat,
anaruk ngkwokuccenthin ka cik
6 Ngkwakannopira noka naꞌrupu wothokiot ngüccük cik iokꞌrettat ana wothokiot ngüccük cik nti ilon ilokithak.
7 Ana mpiꞌrekathe itti, ‘Kapik kin mpei,
lon lin lokkurrakot iatham itti,
Mpaat anathokkot lon ila ngkwongothe.’ ”
8 Kwiꞌret cittokït itti, “Aꞌrupu wothokiot ngüccük cik ana aꞌrupu wothethet nuthuk ana aꞌrupu wothokiot ngüccük cik iakꞌretta ana aꞌrupu wothokiot ngüccük cik nti ilon ilokithak, ana manna ngkwakannoka popirat noka nan” (antoka manna itti lon lothonceꞌret lon cik liꞌret itti lakkattat).
9 Ittina kwiꞌrekathe itti, “Mpei, mpaat itti anathokkot lon lang.” Kwopaꞌret thonekket lon cik thorokït akwonekket ithommakittothe.
10 Ana ittina llon ila Kapik kongothe, oron appik thothikkiettakathe thupupure nthio thoIeccuo oMiccie ngka kung itha kwinet ul appik caꞌri culukku.
11 Ana appinappin pul ponoppan toKapik pakkot ngre ngung ngonoppan toKapik opakkukket tit akwethet Kapik aꞌrupu wothokiot ngüccük cik ammakka akwokkettet anaruk lon len lakorronno opaꞌre lon cik ilokithak.
12 Anaruk akka pul ponoppan toKapik empi ipa aMiccie, pethet Kapik aꞌrupu wothokiot ngüccük cik womaꞌri appik caꞌri culukku nti ilon ilokithak, kwikkatheik thokkun wothothari woKapik.
13 Nci nocaꞌri cen kwokat cik akwoꞌrïkot aKapik onekket ul iꞌrarok thoceken coracok tung,
14 akka mpapu pothokiot ngüccük cik pulukku kwothikkiekathe okkwion ithokat thupupure thoporot kirrkkir.
15 Cakuruk Kanang ikupupure kerethe elli akiꞌrekat itti,
16 Ili wiꞌret itti, “Thonekket lon cik enthi itha anokkot ïnaththungon amma caꞌri enceꞌre ceot
ana mpanekket lon lothonceꞌrt lon cik lin nomïkït men,
ana mpakurrinthet kin ima men.”
17 Akwapparttat nan itti, “Mpakannappokwarttikot lon len ilokithak ana ngre ngen iella lon cik.”
18 Ana na lon ilokithak loccïkakothe, aꞌrupu wothokiot ngüccük cik wolon ilokithak wakannappokaik.
Ngkwakkarakot accokot cïkït ilon
19 Ittina pangkingon oron thina nomïkït monon itti oron thaik thaeo nokaꞌran ikupupure cannan ngüccük ngoIeccuo,
20 ana ngkathar kothikkoik ikie ikanyattanthet ton nthopaꞌre kret kothopettoik ika ka kung,
21 ana inakka oron thonu pul ponoppan toKapik iprïk iponu lon lonoppan toKapik ikkun,
22 ton eo iccik koKapik mmïkït moporot ana ona thoccokot lon nomïkït thonthomat ana mïkït moꞌruttat ngngüccük angothikkieron thoporot nolon ilokat nomïkït lokithak, ana ona ka kimettat ngngꞌri ngoꞌrillir.
23 Ton oꞌrumo nothoꞌrïkot cik thonnon itharon thonu nomïkït akka okkwi iponekkethe lon cik pannoprtto lon cik.
24 Ton okorronno okorronno thaukko tothun ammakka ul wꞌrek iaik wakkot inenni, anaruk ton ittararot aron oꞌrungkat nan ittararot ammakka onon thimmat itti caꞌri cakko napuththut.
25 Ton okorronno ocoꞌro nti ithaꞌrntakot tothun ammakka opilingon okkettet, anaruk ton ittararot ammakka onon thina itti caꞌri cothao thung cakko napuththut.
26 Amma oron thaꞌrungkot nolon ilokithat nci nokkït, aron thina lon ilaik ïcat, papu pothokiot ngüccük cik polon ilokithak pella cik
27 anaruk oron thaik thaꞌrïkot caꞌri ennꞌre conꞌre cothonceꞌret lon cik coKapik ana thik thothongkꞌrikot kaik ithakꞌre ul ialikine lon loKapik cik.
28 Okkwi ipꞌrat lon lothonceꞌret lon cik loMucca kwakkuttat amma ul weꞌra ana manna wꞌrapuruk wiꞌret itti lon len laik tit ïcat.
29 Laka lokitheththak nopul iponu itti pakkmako ipocukkwarothe ukul woKapik cik ana okkwi ipokathat ngüccük ngothonekket lon cik iothikkierok poꞌrillir ere ngella lon cik ana okkwi ipocungkwot Kanang koKapik ikakeneron thiak.
30 Akka onïn thina okkwi ipiꞌret itti, “Oun akkakke ana akkma.” Ana Ili wiꞌret cakuruk itti, “Wakkma ul wung.”
31 Laka lokitheththak itti ngkwapot inyaun nyoKapik ikaik.
32 Nantokwarttikot akka nthokat maꞌrot, akka onon nthoccot kꞌran, ana onon thothïpathe cik kiththik ithokkiettat thiak.
33 Ana onon thocungkakothe tokït koul maꞌri mꞌrek ana occokiettat thiak ana onon thocoꞌrothe ul iokat cik accokiettat thiak.
34 Onon thonat thiak thoul iokat cik ikorrkkor ana onon thoccokothe thiak onaththungon, ana onon thokat thopirat noka akka ul wonnekothenon aꞌrupu, onon thongothe itti ul wanekot aꞌrupu wonocapu anthella thiak then, akka onon thina nan itti onon thonu aꞌrupu tothiꞌrot iakannomattat thupuththuput.
35 Ittina nokorronno opaꞌrine thonekket cïkït noKapik cik akka onon thathokketta llon iloporot cannan.
36 Onon thonu itti onon thaccokot mïkït ilon othakka itti amma onon akkokkothe ila Kapik kongothe itti onon thakkot ana onon thakkettat nthokkettat thoporot.
37 Akka nomaꞌri motte,
“Okkwi ipaik panthan, panthan ana kwakannoccoik.
38 Anaruk ul win ioporot tokït koKapik wikkoik nthoccokot lon nomïkït,
ana amma kwopakkothe thoceken nti ilon lin,
ana mpakannopira noka naak.”
39 Anaruk oron thakannoka okkwion ithapakkukkwot thoceken akin onguttakat, anaruk oron thoul ioccokothe lon nomïkït ana ithoꞌrettathe.