2
Nokorronno ocottako nti ilon loKapik
1 Oron thonu itti oron thaccot kït cik papenang nolon ilaron thoccïkothe othakka itti aron okorronno urat cik.
2 Akka amma oron thina lon lothonceꞌret lon cik ila uꞌrupa wothothïlettat woKapik weret laik ïcat ana laꞌrungkot cik, ana pul ipaurrot lon cik ꞌra lon lon pakkmako thakkmako ithekkot nolon ila kwokkothe, oron thina eret lon lothonceꞌret lon cik itti oron thaꞌrettat tat ana manna itti oron thikkoik tat
3 oron thalukkwot thakkmako taththa amma oron thorakket thoꞌrettat enthi ithrïk? Thoꞌrettat itha Ili wiꞌret cittokït, thaul ioccïkothe wokenet ton itti thaik ïcat.
4 Kapik cakuruk kokenet lon len itti laik ïcat llon prek ana nthokkot lon ilaprttakiettot tit ana nthokkot lon ilommaththik ana kwikkekathe ul aꞌrupu wothethet nuthuk woKanang ikupure ammakka kongothe.
OIeccuo pul ammakka opangon
5 Kapik kannonekket capu ncik appik ikkun wouꞌrupa wothothïlettat woKapik ana ilen akka oron thaik theret.
6 Anaruk ammakka opilin piꞌrettat imakkren itti,
“Pul iponyi piatha ipa akwarttikot,
ana ukul wopul wointha ia ngkwaik paꞌrumo nolon len?
7 Ngkwothikkierok potteik papotte nouꞌrupa wothothïlettat woKapik
ngkwethok lon appik ikkun wung ana thothiakinet cik.
8 ana ethok lon ikkun laꞌrupu appik.”
Ana amma Kapik kethok lon ikkun laꞌrupu appik, lella ila Kapik kokwentot ilella ikkun wung. Ana icci inenni oron thakinnimma itti lon appik laik ikkun wung.
9 Anaruk oron thei thimmat oIeccuo ipa pothikkiettat potteik papotte nouꞌrupa wothothïlettat woKapik pakiettat cupul cothrïk inenni ana cothothiakineik akka kwoccokothe thiak akwiat, othakka itti nthoporot thoKapik kwianthet ul ncik appik.
10 Locoꞌrotheik tulluk itti Kapik ikokuꞌret aꞌrupu ncik appik konu itti kathikkie oIeccuo poporot kirrkkir nthoccokot thiak othakka itti akona nyukul nyoppot ithrïk thung. Akka oIeccuo akkaꞌret kin.
11 Okkwi ipathikkie ul wupupure ana okkwion ithothakkat thupupure thakuꞌri. Ittina oIeccuo pakannothiaik itti kwakkarokin itti opangon.
12 Kwiꞌret itti,
“Mpakene opangkingon kꞌran kang,
mpamerekethung ngkunye kaꞌrama tokït koul.”
13 Ana kwiꞌrekathe attang itti,
“Mpanekket cïkït naak.”
Ana kwiꞌrekathe attang itti,
“Mpei, ana nyukul inya Kapik kethin.”
14 Ana inakka nyukul nyaul ionyi ngka ana ngüccük, oIeccuo pothakkat cakuruk karkken ngka ana ngngüccük othakka itti nthio thung akwokïtto puꞌran popul pothopulut iponu puꞌran ikkun pothio
15 othakka itti akwelikko okkwion ithokakkat iak wonꞌre nothio.
16 Akka linako nan itti kwaik pakinnittarot uꞌrupa wothothïlettat woKapik anaruk kwaat itti kwathittarot nyukul nyAprein.
17 Ittina kwonu itti kwaka ammakka opangon llon appik othakka itti akwona thiak ana oka pul iprïk ponoppan toKapik iparekine Kapik. Ana oꞌrumo nolon ana ina akka akwethet Kapik aꞌrupu wothokiot ngüccük cik iapaꞌre thua ka thoKapik cik.
18 Akka kwoccokothe thiak ngka kung caꞌri ica kwennekkettat, ittina kwina ittarot okkwion ithaik thennekketta.