Atham woMaththa
Lon iloporot loKapik ammakka oMaththa pokurrot
Lon lonothon
OMaththa pokat pul pothaꞌrntinthet nili akucci akka oIeccuo pakkarorok othakka itti akwomakothok. OIeccuo pakkarorok akwoka okkulukku nti iul wothothïlettat iattul ana ikken keꞌra. OMaththa pokurrot elli akwokene ul woIouth itti oIeccuo ook oMiccie ukul ia Kapik konekkethe lon cik itti kathïot. Ilen akka oMaththa pokuꞌrenet atham ncik nꞌran wothiki opakkinthet oThauth ana Aprein. Kwokenet itti oIeccuo pokkothe lon ila ul wothernte lon loKapik wiꞌret maꞌrot.
OIeccuo pocciettat ꞌran woppot iatham enni, ammakka itti 'ukul woThauth' ana 'oMiccie' ana 'pul ipaꞌrettot' ana 'Kapik kaik naron' ana 'Ili woul woIouth.' OMaththa piꞌret ton itti ngili ngoKapik ngarat ana ul iammakothok wikkoik tat. Kwiꞌret ton itti ngili ngoKapik ngoul appik iakkot lon ila Kapik kongothe.
Akka oIeccuo piot ana uroko nti ithio, kwiꞌrekathe ul iammakothok itti, “Ongappa pethin ngili ikkun appik ngolon lorothiꞌrot ana lonocapu.” Kwiꞌrethekin itti okin thaeo akin othongkene ul appik othakka itti athakka ul iammakothok cakuruk (Maththa 28.18–20).
Lon ilaik iatham
1. Thiki ana thokwonta thoIeccuo oMiccie (1.1–23)
2. Ngere ngoIuanna pomamuthie (3.1–12)
3. Mamuthie ana thennekketta thoIeccuo (3.13—4.11)
4. Ngre ngoIeccuo noththok poCelïl (4.12—18.35)
5. OIeccuo paeo noththok poCelïl akweo nokaꞌran koUruccelim (19.1—20.34)
6. Thokkutte makkma thoIeccuo ana thio thung (21.1—27.66)
7. Thuroko thoIeccuo ana thummot ncik thung (28.1–20)
1
Thiki thoIeccuo
1 ꞌRan enni wothiki thoIeccuo oMiccie ukul woThauth, ukul wAprein.
2 Aprein pokwonot oIccaak
ana oIccaak pokwonot oIakup
ana oIakup pokwonot oIoutha akin opangon,
3 ana oIoutha pokwonot oPparic ana oThara nti iaThthamar
ana oPparic pokwonot Accrun
ana Accrun pokwonot oRam,
4 ana aRam pokwonot Aminathap
ana Aminathap pokwonot oNaccun
ana oNaccun pokwonot oCalmon
5 ana oCalomon pokwonot oPuac nti iapari oRaap
ana oPuac pokwonot Opet nti iaRauth
ana Opet pokwonot oIecce
6 ana oIecce pokwonot ili oThauth.
Ana oThauth pokwonot oCiliman, nti ipari oUria,
7 ana oCiliman pokwonot oRapaam
ana oRapaam pokwonot Apia
ana Apia pokwonot Acca
8 ana Acca pokwonot oIuccappat
ana oIuccappat pokwonot oUram
ana oUram pokwonot oUthia
9 ana oUthia pokwonot oIutham
ana oIutham pokwonot Aac
ana Aac pokwonot Acikkia
10 ana Acikkia pokwonot oManacce
ana oManacce pokwonot Amun
ana Amun pokwonot oIuccia
11 ana oIuccia pokwonot oIakkunia ana opangon nocaꞌri ica ul wonekittat noththok pen akin onekittat noththok poPapil.
12 Anakka ul wonekittathe noththok poPapil
oIakkunia pokwonathe oCcaliththil
ana oCcaliththil pokwonot oCerupapil
13 ana oCerupapil pokwonathe Apiuth
ana Apiuth pokwonot Aliakkim
ana Aliakkim pokwonot Acur
14 ana Acur pokwonot oCcathuk
ana oCcathuk pokwonot Akim
ana Akim pokwonot Aliuth
15 ana Aliuth pokwonot Aliacir
ana Aliacir pokwonot oMaththan
ana oMaththan pokwonot oIakup
16 ana oIakup pokwonot oIuccip olle poMeriom ipokwonot oIeccuo ipakkarako itti oMiccie.
17 Ittina thiki ithanthan appik thokat attul ana ikken kocoꞌrin nci nAprein oingkanthet oThauth (14). Ana nci naThauth caꞌri ica ul waik ikwat noththok poPapil, thiki thokat attul ana ikken kocoꞌrin (14). Ana nci nocaꞌri ica ul waik ikwat noththok poPapil oingkanthet oMiccie thiki thokat attul ana ikken kocoꞌrin (14).
Thokwonta thoIeccuo oMiccie
(Lukka 2.1–7)
18 Lon elli ileret kathar kothokwonta thoIeccuo oMiccie. Onnan pung oMeriom pokat pokkaccakinet oIuccip anaruk akka okin thaththarthuk ikkoik tothun kwincakathe itti kwoppethe mpuꞌran poKanang ikupupure.
19 Ana oIuccip olle pung pappokat pul poporot tokït koKapik ana kwꞌrakathe itti kwakinnitto lon lopari oMeriom, akka ul occirok ngngin ana kwiꞌrekathe itti kwathïok nthuꞌran.
20 Anaruk akka kwokat akweret noucce itti kwathïok, auꞌrupa wothothïlettat woIli akkakanthok inthe athintiekathok aiꞌrekathok itti, “Iuccip ukul woThauth, kirrnni ipo nꞌre itti ngkwaneko oMeriom akwothakka pari pang, akka kwoppethe mpuꞌran poKanang ikupupure.
21 Ana kwakwono ukul ana ngkwaccie kꞌran itti oIeccuo, akka waꞌret ul wung nti ilon ilokithak.”
22 Elli lokat cik appik othakka itti alomartto lon ila Ili wiꞌret nthon thopul pothernte lon loKapik oka ïcat itti,
23 “Iꞌre wꞌrek iakannaꞌrutta ngngin aththik wappet
ana wakwono ukul
ana waccietta itti Amanauil”
ilonu itti 'Kapik kaik naron.'
24 Anakka oIuccip purttat nti inthe, akwokkat ammakka uꞌrupa wothothïlettat woIli wiꞌrethok. Akwonakat pari pung tuan thanung.
25 Anaruk kwakannaꞌrat ngngin puccuk mono apokwonat ukul, akwocciekat kꞌran itti oIeccuo.