21
OIeccuo piꞌriko nokaꞌran koUruccelim
(Markkoc 11.1–11; Lukka 19.28–40; Iuanna 12.12–19)
1 Anakka oIeccuo ana ul iammakothok okko ciki iccik koUruccelim okin thakkakathe nokaꞌran koPeththppaci nocoꞌrong coCeththun, aIeccuo othïat ul weꞌra nti iul iammakothok,
2 akwiꞌrekat kin itti, “Ngkonon nokaꞌran engkrïk tokït kon ana amma onon thiꞌrikot tit, onon thathiot ngeꞌringka iopari ngïꞌrïkakotheik mpei. Nokꞌro annonanin.
3 Ana amma pul pꞌrek piꞌrethenon lon lꞌrek, anniꞌrethok itti Ili akkiꞌret itti onïn thathokꞌro ana kwathïot ntan accokkot.”
4 Elli lokkattathe othakka itti alon oka ïcat ila pul pothernte lon loKapik piꞌret ngngin itti,
5 “Iꞌrethe ul woIccereil itti,
‘Onokatha ili won waik wainenon,
woporot cïkït ana warrothe teꞌringka,
warrothe teꞌringka iotte.’ ”
6 Aul iammakothok oingkat akin okkat ammakka oIeccuo piꞌrethekin.
7 Okin thonakathe ngeꞌringka mpei ana ul wokuꞌrupathe eret nan ana oIeccuo parrathe tan akwikkat cik noret neꞌringka iotte.
8 Ul woppot wokuꞌrupathe eret cik ikathar ana opilingon ongatho uꞌri wokira akin ipot cik ikathar.
9 Amungkut moul imeot tokït kung ana okkwion ithomakothekin miꞌrekathe mpoꞌre cittan itti,
“Athopira noka oka nokkul woThauth.”
“Athethïetta oka nakkwi ipanthan ngkꞌran koIli.”
“Athopira noka oka noKapik tothiꞌrot.”
10 Anakka oIeccuo piꞌrikot nokaꞌran koUruccelim, aul appik wonokaꞌran oprttakat tit ana wipittathe itti, “Oththa empi?”
11 Aul iokat cik cungkut othïat tit itti, “Ook oIeccuo pul pothernte lon loKapik ponokaꞌran koNaccir noththok poCelïl.”
OIeccuo paik noppan toKapik
(Markkoc 11.15–19; Lukka 19.45–48; Iuanna 2.13–22)
12 Menik oIeccuo piꞌrikathe noppan toKapik ana kwokïccekathe ul thapat appik iokat cik akette aꞌrupu ana ionat aꞌrupu icekerek. Kwongkuꞌrupathe uppuꞌrung cik ana orrok woul iokat akucitto akucci ana ionat mülükkür icekerek.
13 Ana kwiꞌrekathekin itti, “Lokurrakot itti, ‘Man min makkarako itti man maꞌrama anaruk onon thothikkiet thukkie thoul wothuꞌran.’”
14 Aul iꞌrimathe ana ul iaimico akkakanthet oIeccuo noppan toKapik akwittiekat kin.
15 Anaruk akka ul ittïttïk woul wonoppan toKapik ana ul iangkene lon lothonceꞌret lon cik wimmat lon ilokkattathe iloporot ila oIeccuo pokkothe ilaprttakiettot tit ana okin occïkot poꞌre ponyukul inyokat cik noppan toKapik anyiꞌre itti, “Athopira noka oka thokkul woThauth,” menik okin thuakathe ka nolon loIeccuo.
16 Okin thipittathe oIeccuo itti, “Ngkwoccïkothe lon ila nyukul nyaik nyerei?”
AIeccuo othïanthet kin tit itti, “Ïï mpoccïkothe. Onon thannakkakkaro lon ilaik iatham? Iliꞌre itti,
‘Oung Kapik akkongkenet nyukul inyako ana inyarran
lon ilakin thopiranet Kapik noka ngngin.’”
17 Menik kwoththekathe nakin akwoingkat nokaꞌran koPeththania na kwaꞌrot.
OIeccuo pattatta pira popïcït
(Markkoc 11.12–14, 20–24)
18 Ana ingïꞌrïmak akka oIeccuo pokat cik akwopakkot nokaꞌran koUruccelim, kwokat piamat.
19 Kwimmakathe pira popïcït nokuthut kokathar akwoingkat iccik ken itti kwathiththo nyukul nyen akwoꞌrko anaruk kwakanniat papꞌrek nopira ponat natha nulluk. Kwiꞌrekathe pira itti, “Ngkwakorronno appokwono pꞌrïn.” Ncïnang apira onthomakat.
20 Anakka ul iammakothok wimmat elli, akin ikkat cik akin oprttakot tit akin ipitto itti, “Pira popïcït ponthomat accokkot taththa ittina?”
21 AIeccuo othïanthet kin tit itti, “Mpiꞌret non lon ilaik ïcat, amma onon thonu thoccokot lon loKapik nomïkït nthella mïkït meꞌrarit, onon thakkot lon ammakka lokkattanthet pira. Ana manna amma onon thiꞌrethe coꞌrong itti, ‘Ngko arret ka irok irapangka’ ana lakkattat ammakka onon thiꞌret.
22 Ana amma onon thoccokothe lon loKapik nomïkït, onon thacco ilanon ipitto ngngaꞌrama.”
Ul ittïttïk wonoppan toKapik wipitto ngili ngoIeccuo
(Markkoc 11.27–33; Lukka 20.1–8)
23 OIeccuo piꞌrikathe noppan toKapik, anakka kwokat cik akwongkene ul ittïttïk woul wonoppan toKapik ana ul ittïttïk woul wakkakanthok, akin ipittathok itti, “Ngkwaik pakkot lon elli ngngili ngiatha? Ana oththa akkethung ngili ngen?”
24 AIeccuo iꞌrekat kin itti, “Mpipittot non lon lulukku. Amma onon thothïnthin tit ana mpiꞌret non ngngili ngiatha inga mpaik pakkot llon elli.
25 Mamuthie moIuanna maat ngkartha? Maat ntothiꞌrori ana amma okorronno oka ntothiꞌrot noul ionyi?”
Okin thikkatheik akin erettarne akin iꞌre itti, “Amma oron thiꞌret itti, ‘Ntothiꞌrot’ ana kwipittot ton itti, ‘Ngintha akka onon thꞌrat occïkïnthok?’
26 Anaruk amma oron thiꞌret itti, ‘Noul ionyi’ oron thonu nꞌre akka ul okkot ton lon lꞌrek lokithak, akka ul appik wokat aiꞌre itti oIuanna pul pothernte lon loKapik.”
27 Ittina akin othïanthet oIeccuo tit itti, “Onïn thomma.”
AIeccuo iꞌrekat kin itti, “Mpakinniꞌret non itti ngngili ngiatha inga mpaik pakkot llon elli cakuruk.”
Thokkwie lon kuru ncik thonyukul inyeꞌra
28 Ana oIeccuo poꞌrungkwathe nan akwere itti, “Onon thame taththa? Pul pꞌrek pokat cik ponu nyukul nyeꞌra inyomura, akwiꞌrekat ukul irïk itti, ‘Ukul win, ngko athoreko ikkwon kin komaa inenni.’
29 Aukul othïanthok tit itti, ‘Mpꞌrat,’ anaruk papotte aukul apperekat nocïkït aprttat lon cik aingkat topon.
30 Aththan oingkanthet ukul wung wꞌrek akwiꞌrekat ammakka kwiꞌrethe worokït, aukul othïat tit itti, ‘Pït pin, mpaeo’ anaruk wakannoingkat.
31 Oththa ntiakin aththuththeꞌra ipokkothe lon ila aththan pipittothekin itti okin thakkot?”
Akin othïat tit itti, “Okkworokït akkokkothe.”
AIeccuo iꞌrekat kin itti, “Mpiꞌret non ilaik ïcat itti ul iaꞌrntinthet nili akucci ana iari iallelle nul nakucci, okin thiꞌriko ingili ngoKapik tokït nanon.
32 Akka oIuanna pomamuthie painet non akwathokenenon kathar ikocoꞌrotheik ana onon thakannoccïkothok anaruk ul iaꞌrntinthet nili akucci ana ul iari iallelle nul nakucci akkoccïkothok. Ana manna onon thimmat lon len, onon thakannopaꞌrine lon cik itti annoccokot lon lung nomïkït.”
Thokkwie lon kuru ncik thoul iara
(Markkoc 12.1–12; Lukka 20.9–19)
33 “Noccïkot lon lꞌrek lothokkwie lon kuru ncik lꞌrek, pul pꞌrek pokat cik pocïkkarot kira komaa ikkwon kung ana puꞌrakathe nan ana kwokkathe kaꞌran na akwathuꞌrukot ngiꞌri ngen ana kunathe cüꞌrük na pul ikkoik apangwot cik. Akwekat ul wꞌrek ara tit aikkethok maa nnan imakin thorat amma okin thokiot. Ana kwoingkathe nokurtti.
34 Anakka caꞌri cakko napuththut cothokio, kwothïathe ul iarekinok aine ul iokat cik ara ikkwon athaꞌrntinthok maa ima kwonu itti kwacco.
35 Ul ia kwappethet kopon itti wara tit woꞌrumathe ul iarekinok ana wokkwekathe opilin ana okkwot opilin ana okincot opilin cik mmothok.
36 Ittina akwappothïanthet kin ul iarekinok wꞌrek woppot ana ul iokat cik ara ikkwon wokkathekin lon ammakka okin thokkinthet pꞌrak porokït.
37 Ana menik pꞌrin, kwothïathe ukul wung akwiꞌre itti, ‘Okin thathiane ukul win cik.’
38 Manakka akka ul iokat ara ikkon wimmat ukul, okin thikkatheik akin erettarne itti, ‘Opei empi ipapakkot nothaꞌrthan thoththan, nanthan urokkwothok aron opakkat nothaꞌrthan thoththan.’
39 Okin thoccokathok ana okin thonekathok akin orrekathok nti ikkwon komaa akin okkwathok.
40 Amma pul iponu kopon paat, pakkot ul wen ngintha?”
41 Ana ul ittïttïk wonoppan toKapik ana ittïttïk woul othïanthok tit itti, “Kwangwo ul iokithak wen ana kwethet ul wꞌrek kopon komaa ara tit iethok maa nocaꞌri cothiththo.”
42 AIeccuo iꞌrekat kin itti, “Onon thakannakkakkaro lon ilaik iatham woKapik? Iliꞌre itti,
‘Pothok ipa ul iuno wꞌrat nti ipangken
pothakkakathe cillang icaceꞌret kunthong tan,
Ili Kapik akkokkothe elli ana loprttakietheron tit.’
43 Ittina mpiꞌret non itti ngili ngoKapik nganekittat non ana ngettat ul iaccïkot lon lung ana okkot lon ila Kapik kongothe itti okin thakkot.
44 Okkwi ipꞌrat lon lin kwikkoik ere ul iapukkot nopothok apocottakat, ana okkwi ipa pothok papothe nan kwakakꞌrakot cik.”
45 Anakka ul ittïttïk woul wonoppan toKapik ana ul woPriccin woccïkothe lon lothokkwie lon kuru ncik loIeccuo, okin thinakathe itti kwaik peret kin.
46 Okin thaththongothe itti okin thaccokothok anaruk okin thonat nꞌre nocungkut coul akka ul wonat lon nomïkït itti oIeccuo pul pothernte lon loKapik.