BÚKÙ TÀ TƗ́DHƗ́//RU YÌZO DHƗ ÀDHYA GÀLÀTƗ́YÀBHÁ Ɨ 1

Wárágà Pólò dré tɨsɨ̀le Gàlàtɨ́yàbhá ɨ dré dhɨ

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Pólò dré tɨsɨ̀le móndyá kaꞌìbhá bvò Gàlàtɨ́yà àdhya na dhɨ ɨ dré dhɨ ꞌɨ. Pólò longó tá Rúbí Tanɨ gò, Èkèlézyà kɨ tobhàzo bvò nda na, dré tá adréràꞌa áyɨ atsí andre nɨ rì to, adrélé kpà na nɨ nɨ to dhɨ ꞌá (Tà ꞌòle dhɨ ɨ 16:6; 18:23). Àmvolásà dhɨ, móndɨ́ àruka ɨ̀ dré tsàzo adrélé tadhá dhɨ, lè móndyá kaꞌìbhá Yúdà ànzɨ ró ko dhɨ ɨ̀ kàdré Mósè nɨ tátrɨ́trɨ́ kúlí lɨkɨ́, lavúlé dhɨ, ɨ̀ kàdré àyɨ kɨ ꞌo lwàle. Ɨ̀ adré dɨ tá móndyá kaꞌìbhá nda kɨ drì kɨzá tà nda sè.

Dɨ Pólò adré wárágà kònɨ̀dhɨ nɨ tɨsɨ̀ kɨtswázó móndyá kaꞌìbhá nda kɨ lotó tà tadhálé kɨnzò sè nda nɨ tà sè. Drìdrì dhɨ, adré tadhá dhɨ, Gìká azí ɨ adrélé àpóstolò ro móndyá súrú twá ro dhɨ ɨ véna ngɨ́nɨ ya dhɨ. Adré kpà tadhá dhɨ, àpóstolò àruka títí dhɨ ɨ̀ kaꞌì ɨ áyɨ àzí be ngɨ́nɨ ya dhɨ. Bvóá dhɨ, adré tadhá dhɨ, Gìká adré móndɨ́ kɨ bha gyǎgya ɨ́ kandrá tátrɨ́trɨ́ kúlí ꞌòma sè ko, dɨ ngbà ꞌí Yésu Krísto nɨ kaꞌìma sè. Kùdù ro dhɨ, Pólò adré àyɨ kɨ kodzó, ɨ̀ kàdréró atsílé Tɨrɨ́ Lólo nɨ rìnyí sè. Tàko ko, Tɨrɨ́ nda nɨ lòꞌwa dóro ꞌa bǐ àyɨ léna. Lòꞌwa kàdrɨ̀ lavúlé dhɨ, lèle ꞌɨ.

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Pólò nɨ mòdo fèma, ɨ̀ndɨ̀ Rúbí Tanɨ nɨ tà (1:1-10)

2) Pólò nɨ azima adrélé àpóstolò ro dhɨ (1:11–2:21)

3) Móndɨ́ kɨ tɨdrɨma tátrɨ́trɨ́ kúlí ꞌòma sè ko, dɨ, Yésu Krísto nɨ kaꞌìma sè dhɨ (3:1–4:31)

4) Atsima Tɨrɨ́ Lólo nɨ rìnyí sè dhɨ (5:1–6:10)

5) Pólò nɨ kúlí kùdù (6:11-18)

Pólò nɨ mòdo fèma

1 Ma, Pólò, Yésu Krísto nɨ àpóstolò, má adré wárágà kònɨ̀dhɨ nɨ tɨsɨ̀ ma. À mù ma móndɨ́ ɨ vélésè ko. Móndɨ́ ɨ̀ mù kpà ma nɨ̀ ko. Be ró dhɨ, Yésu Krísto ɨ Gìká Atá akódhɨ nɨ tɨngálépi dràdrà lésè dhɨ be dhɨ, ɨ̀ mù ma adrélé àpóstolò ro dhɨ àyɨ. 2 Àma túmä́ní áma adrúpi títí mà dré adrézó àyɨ ɨ́be dhɨ ɨ, mà adré wárágà kònɨ̀dhɨ nɨ tɨsɨ̀ Èkèlézyà bvò Gàlàtɨ́yà àdhya na dhɨ ɨ dré.

3 Gìká àma kɨ Atá ɨ Mírì Yésu Krísto be dhɨ ɨ̀ kòbhà àyɨ kɨ togó tanɨ àmɨ rú, ɨ̀ndɨ̀ ɨ̀ kòfè tà kɨ̀drɨ́kɨ̀drɨ àmɨ dré! 4 Krísto nda fè ɨ dràle àma kɨ tàkonzɨ̀ kɨ tà sè, kɨtswálé àma kɨ apá bvò kònzɨ ándrò kònɨ̀dhɨ lésè, ngóró Gìká àma kɨ Atá dré tá lèle dhɨ tɨ́nɨ. 5 Mìlanzìlanzì kàdré Gìká dré kóná vésè kólyá! Kàdré kònɨ̀nɨ.

Rúbí Tanɨ ngbà ꞌí àlo kwákwá

6 Áma lɨ́ndrɨ́ adré gàle àmɨ kɨ tà sè. Tàko ko, mɨ̀ adré àmɨkya Gìká àmɨ kɨ azílépi Krísto nɨ togó tanɨ sè dhɨ nɨ tayɨ́ mbèlè gò, adrézó àmɨ kɨ adzá rúbí tanɨ twá dhɨ véna. 7 Tà bàti ró dhɨ, rúbí tanɨ twá Rúbí Tanɨ bàti dhɨ rúsè dhɨ yókódhó. Dɨ, móndɨ́ àruka ɨ̀ adré àyɨkya àmɨ kɨ drì kɨzá, adrézó Rúbí Tanɨ Krísto àdhya nɨ le ladzálé atsálé tà gòdhógòdho ró. 8 Dɨ, dhya àlo kàdré rúbí tanɨ twá dhɨ nɨ longó Rúbí Tanɨ mà dré longólé àmɨ dré dhɨ rúsè dhɨ, Gìká nɨ tátrɨ́trɨ́ kàdré akódhɨ nda dri, gba kàdré àma ꞌɨ yà, kó ngalè ángéló apfòlepi bhù lésè dhɨ ꞌɨ yà dhɨ! 9 Ngóró mà dré tàle dre dhɨ tɨ́nɨ dhɨ, má adré gòle tàá dhɨ: Dhya àlo kàdré rúbí tanɨ twá dhɨ nɨ longó àmɨ dré Rúbí Tanɨ mɨ̀ dré kaꞌìle dhɨ rúsè dhɨ, Gìká nɨ tátrɨ́trɨ́ kàdré akódhɨ dri!

10 Kòdhɨ má adré tsì móndɨ́ kɨ togó tabhì asélé, ɨ̀ kòkaꞌìró áma tà be dhɨ bvó? Kóko! Má adré mána lèá dhɨ, Gìká kòkaꞌì áma tà nɨ̀. Kó ngalè, má adré tà ꞌo kɨtswázó móndɨ́ kɨ togó ꞌo kɨnɨ́lé dhɨ bvó? Kóko! Kònò má kàdré tá ꞌòá kònɨ̀nɨ dhɨ, má nɨ tá adré Krísto nɨ màrábà ꞌɨ ko.

Pólò nɨ azima adrélé àpóstolò ro dhɨ

11 Áma adrúpi ɨ, má lè mɨ̀ kònì tàle dhɨ, Rúbí Tanɨ má dré adrélé longólé dhɨ angá móndɨ́ ɨ drìlésè ko. 12 Má kisú Rúbí Tanɨ nda móndɨ́ ɨ vélésè ko. Móndɨ́ ɨ̀ tadhá kpà Rúbí nda má dré nɨ̀ ko. Be ró dhɨ, Yésu Krísto nɨ tàndɨ tadhá Rúbí nda má dré nɨ̀.

13 Tàko ko, mɨ̀ yi tàle dhɨ, wáláká dhɨ, má adré tá Yúdà ànzɨ kɨ Gìká nɨ tà lebè ngɨ́nɨ ya dhɨ ꞌí. Mɨ̀ yi kpà má adré tá móndyá Èkèlézyà Gìká àdhya lé dhɨ kɨ mì pfo lavúlé, adrézó àyɨ kɨ tà tabhì pfùle ngɨ́nɨ ya dhɨ ꞌí. 14 Má adré tá mána Yúdà ànzɨ kɨ Gìká nɨ tà ꞌo, adrézó lɨ̀le ába drìdrì áma mbǎàmu bǐ Yúdà ànzɨ ró dhɨ kya kɨ lavú. Áma togó tá àtsɨ ró lavúlé àma kɨ tábhí kɨ labhɨ kɨ tà sè.

15-16 Dɨ, Gìká zɨ̀ tá ɨ́na ma áma tirà ko dhɨ ꞌá gò, áma azízó áyɨ togó tanɨ sè. Dɨ kisù tá dóro nɨ, ɨ́ dré áyɨ Mvá nɨ tadhálé má dré dhɨ, má kàdréró akódhɨ nɨ Rúbí Tanɨ longó móndyá súrú twá ro dhɨ ɨ véna. Dɨ dré áyɨ Mvá nda nɨ tadházó má dré dhɨ, má zi tá móndɨ́ àlo kɨtswálé áma drì ta dhɨ ko. 17 Má lɨ̀ tá kpà Yèrúsalémà na dhya bhàle adrélé àpóstolò ɨ ró drìdrì má kandrá dhɨ kɨ no ko. Dɨ, gbǎ lókyá nda sè dhɨ, má lɨ̀ tá mána bvò Àràbɨ́yà àdhya na gò, má dré gòzo lɨ̀le Dàmàsékè na.

18 Kóná na àmvolésè dhɨ, má dré lɨ̀zo Yèrúsalémà na, mà kòkɨtswáró ru ni Pétèró be be dhɨ bvó.* Gò mà dré adrézó akódhɨ be kìtú mudrí-drì-nzi. 19 Má nò tá àpóstolò kɨ àruka ɨ ko, ngbà ꞌí Yàkóbhò, Mírì nɨ adrúpi ꞌɨ kalóma. 20 Má adré tàá Gìká kandrá dhɨ, tà má dré adrélé tɨsɨ̀le kòdhɨ ɨ tà bàti ꞌɨ, kɨnzò ꞌɨ ko.

21 Àmvolásà dhɨ, má dré lɨ̀zo bvò Sìríyà àdhya na ɨ̀ndɨ̀ Kìlìkíyà àdhya na. 22 Lókyá nda sè dhɨ, móndyá Krísto nɨ kaꞌìbhá Èkèlézyà Yùdáyà na dhɨ ɨ ꞌásè dhɨ ɨ̀ nì tá rè dhu ma ko. 23 Ɨ̀ yi tá ngbà ꞌí tà adrélé tàle áma tà sè dhɨ kòdhya: «Dhya atú adrélépi àma kɨ mì pfo dhɨ, adré nyànomvá tà adrézó Krísto nɨ kaꞌì dhɨ nɨ longó, tágba dré tá adrézó tà nda nɨ tabhì pfùle dhɨ.» 24 Dɨ ɨ̀ adré tá Gìká nɨ rú bha kùle áma tà sè.

* 1:18 Gìká nɨ Kúlí tɨsɨ̀le Gìríkì ti sè dhɨ léna dhɨ, à adré «Kéfà» kisú kònwa. Rú nda rú àzya Pétèró àdhya ꞌɨ.