BÚKÙ TÀ TƗ́DHƗ́//RU YÌZO DHƗ ÀDHYA 1 TÈSÀLÒNÍKÈBHÁ Ɨ 1

Wárágà Pólò dré tɨsɨ̀le Tèsàlòníkèbhá ɨ dré dhɨ nɨ àlo

Wárágà kònɨ̀dhɨ nɨ tà àndu ngɨ̀le drìdrì dhɨ

Kònɨ̀dhɨ wárágà Pólò dré tɨsɨ̀le móndyá kaꞌìbhá Tèsàlòníkè na dhɨ ɨ dré dhɨ nɨ àlo ꞌɨ. Tèsàlòníkè nda tá bhàandre kàdrɨ̀ Rómà kɨ òpɨ̀ nɨ bvò Màkèdònɨ́yà àdhya drìle dhɨ ꞌɨ. Pólò tsa tá Rúbí Tanɨ longó gò Èkèlézyà bhàzo kònàle, dré tá adréràꞌa áyɨ atsí andre nɨ rì to dhɨ ꞌá, akódhɨ nɨ pfòma Fìlìpóyì lésè dhɨ àmvolésè. Dɨ, gí tá rè ko, Yúdà ànzɨ ɨ̀ dré togó kònzɨ bhàzo Pólò rú, adrézó lɨgɨ́lé ába. Dɨ adré tá lèá dhɨ, Pólò kòpfò Tèsàlòníkè lésè lɨ̀le Bèróyà na (Tà ꞌòle dhɨ ɨ 17:1-10). Àmvolásà, akódhɨ kòtsa Kòrítò na dre dhɨ, dré móndyá kaꞌìbhá Tèsàlòníkè na dhɨ kɨ rúbí yìzo áyɨ àzíàmu Tìmòtéyò tí gò, dré wárágà kònɨ̀dhɨ nɨ tɨsɨ̀zo àyɨ dré.

Pólò adré wárágà kònɨ̀dhɨ nɨ tɨsɨ̀ kɨtswázó móndyá nda kɨ tɨmbà àyɨ kɨ tà kaꞌìkaꞌì na dhɨ bvó. Adré àwoyà ta Gìká dré àyɨ kɨ tà kaꞌìkaꞌì nɨ tà sè, ɨ̀ndɨ̀ àyɨ kɨ lèle sè. Adré ɨ́ ꞌo tá tà àyɨ kòfalé ngɨ́nɨ ya dhɨ nɨ tà ꞌo agálé àyɨ léna, adrézó àyɨ kɨ kodzó, ɨ̀ kàdréró atsílé ngóró dré kɨtswálé Gìká mìlésè dhɨ tɨ́nɨ. Adré kpà kúlí logó tà Tèsàlòníkèbhá ɨ̀ dré tá lizílé Mírì Yésu nɨ agòma nɨ tà dri, ɨ̀ndɨ̀ móndyá kaꞌìbhá dhɨ kɨ ngàma dràdrà ꞌásè dhɨ nɨ tà dri dhɨ ɨ sè. Kùdù ro dhɨ, adré Èkèlézyà nɨ drì ta, adrézó tà kɨtswábhá ɨ̀ kàdré ꞌòá àyɨ kòfalésè dhɨ kɨ tadhá àyɨ dré.

Tà kàdrɨ̀kàdrɨ̀ wárágà kònɨ̀dhɨ léna dhɨ kɨ atìma

1) Mòdo fèma (1:1)

2) Tèsàlòníkèbhá kɨ tà kaꞌìkaꞌì (1:2–3:13)

3) Atsima ngóró dré kɨtswálé Gìká mìlésè dhɨ tɨ́nɨ dhɨ (4:1-12)

4) Yésu nɨ agòma, ɨ̀ndɨ̀ móndyá kaꞌìbhá dhɨ kɨ ngàma dràdrà ꞌásè dhɨ (4:13–5:11)

5) Móndyá kaꞌìbhá dhɨ kɨ drì tàma (5:12-28)

Mòdo fèma

1 Ma, Pólò, túmä́ní Sílà ɨ́be ɨ̀ndɨ̀ Tìmòtéyò be dhɨ ɨ, mà adré wárágà kònɨ̀dhɨ nɨ tɨsɨ̀ Èkèlézyà Tèsàlòníkè na dhɨ dré, àmɨ adrébhá Gìká Atá àdhya ró ɨ̀ndɨ̀ Mírì Yésu Krísto àdhya ró dhɨ ɨ dré.* Gìká kòbhà áyɨ togó tanɨ àmɨ rú, ɨ̀ndɨ̀ kòfè tà kɨ̀drɨ́kɨ̀drɨ àmɨ dré!

Pólò fè àwoyà Tèsàlòníkèbhá kɨ tà kaꞌìkaꞌì nɨ tà sè

2 Lókyá mà dré adréràꞌa tà zi Gìká tí dhɨ ꞌá dhɨ, mà adré ngbú adrélé àwoyà ta akódhɨ dré àmɨ títí dhɨ kɨ tà sè, adrézó tà zi akódhɨ tí àmɨ dré. 3 Vésè wä́yi, mà adré àmɨ kɨ tà kònɨ kɨ kisù Gìká àma kɨ Atá kandrá kòdhya: Mɨ̀ adré àzí ꞌo àmɨ kɨ tà kaꞌìkaꞌì sè, adrézó tà ꞌo àmɨ kɨ lèle sè, adrézó mì bha àma kɨ Mírì Yésu Krísto véna landè àko ró.

4 Àma kɨ adrúpi Gìká dré lèle tò nɨ ɨ, mà nì tàle dhɨ, akódhɨ zɨ̀ àmɨ adrélé móndyá ɨ́na ɨ ró dhɨ be. 5 Tàko ko, lókyá mà dré Rúbí Tanɨ longózó àmɨ dré dhɨ sè dhɨ, mà longó tá Rúbí Tanɨ nda ngbà ꞌí kúlí sè ko. Be ró dhɨ, mà longó àmakya Rúbí nda rìnyí sè, Tɨrɨ́ Lólo sè, ɨ̀ndɨ̀ mà dré tá nìle, tà mà dré tá adrélé longólé nda ɨ tà bàti ꞌɨ dhɨ be dhɨ sè. Mà dré tá adréràꞌa àmɨ kòfalé dhɨ ꞌá dhɨ, mɨ̀ nì mà ꞌo tá tà àmɨ kɨ tà sè ngɨ́nɨ ya dhɨ be. 6 Àmɨ ró dhɨ, mɨ̀ lebè tá àma, adrézó tà ꞌo àmakya tɨ́nɨ ɨ̀ndɨ̀ Mírì Yésu àdhya tɨ́nɨ. Tágba mɨ̀ dré tá adrézó kɨzà nya lavúlé dhɨ, mɨ̀ kaꞌì tá kúlí mà dré longólé nda arɨ́ Tɨrɨ́ Lólo dré fèle gàle àmɨ léna dhɨ sè. 7 Ásà dhɨ, móndyá kaꞌìbhá títí bvò Màkèdònɨ́yà àdhya na ɨ̀ndɨ̀ Àkáyà àdhya na dhɨ ɨ̀ nò Mírì nɨ tà àmɨ rú gò, ɨ̀ dré kpà adrézó tà ꞌo àmɨkya tɨ́nɨ. 8 Tàko ko, àmɨ kɨ tà sè dhɨ, Mírì ꞌo áyɨ kúlí laꞌúlé ngbà ꞌí Màkèdònɨ́yà ꞌásè, ɨ̀ndɨ̀ Àkáyà ꞌásè ko. Móndyá àrà títí ɨ ꞌásè dhɨ ɨ̀ yi tàle dhɨ, mɨ̀ kaꞌì Gìká ngɨ́nɨ ya dhɨ ꞌí. Ásà dhɨ, lè mà kògò adrélé àmɨ kɨ tà tɨtɨ́ àyɨ dré ko. 9 Àngyá ko, àyɨ kɨ tàndɨ ɨ̀ adré mɨ̀ kaꞌì tá àma dòle àmɨ véna togó dóro sè ngɨ́nɨ ya dhɨ nɨ tà tɨtɨ́ àyɨ. Ɨ̀ adré kpà mɨ̀ tayɨ́ gìká tàko ɨ, àmɨ kɨ togó adzázó Gìká bàti lɨ́drɨ̀ ro dhɨ vélé, adrézó akódhɨ nɨ tà ꞌo màrábà nɨ ɨ tɨ́nɨ ngɨ́nɨ ya dhɨ nɨ tà tɨtɨ́. 10 Nyànomvá dhɨ, mɨ̀ adré akódhɨ nɨ Mváagó Yésu, dré tɨngálé dràdrà lésè dhɨ nɨ agòma bhù lésè dhɨ nɨ letè. Yésu nda apá àma Gìká nɨ kombà adrélépi alɨ̀le dhɨ lésè nɨ̀.

* 1:1 1:1 Gìká nɨ Kúlí tɨsɨ̀le Gìríkì ti sè dhɨ léna dhɨ, à adré rú «Sìlùwánò» kisú kònwa. Rú nda tá rú àzya Sílà dré dhɨ ꞌɨ.