BÚKÙ TÀ TƗ́DHƗ́//RU YÌZO DHƗ ÀDHYA 1 YÒWÁNƗ̀ 5

Gìká nɨ Mváagó nɨ kaꞌìma

1 Dhya ángùdhi adrélépi kaꞌìá dhɨ Yésu Mèsɨ́yà ꞌɨ káyà dhɨ, akódhɨ nda Gìká nɨ mvá ꞌɨ. Dhya ángùdhi adrélépi ànzɨ kɨ atá nɨ le dhɨ, adré kókpà akódhɨ nɨ ànzɨ kɨ le. 2 Mà nɨ kɨtswá nìá dhɨ, mà adré Gìká nɨ ànzɨ kɨ le dhɨ, tà kònɨ̀dhɨ sè: Mà dré adrélé Gìká nɨ le dhɨ sè, ɨ̀ndɨ̀ mà dré adrélé akódhɨ nɨ tòlɨ́ kɨ ꞌo dhɨ sè. 3 Tàko ko, mà kàdré Gìká nɨ le bàti dhɨ, mà nɨ akódhɨ nɨ tòlɨ́ kɨ kaꞌì ꞌòle. Akódhɨ nɨ tòlɨ́ nda kɨ ꞌòma kòkóròko àma dré ko. 4 Àngyá ko, dhya adrélépi Gìká nɨ mvá ro dhɨ lavú bvò kònɨ̀dhɨ dre. Tà mà dré adrézó bvò kònɨ̀dhɨ nɨ lavú ásà dhɨ, àma kɨ tà kaꞌìkaꞌì ꞌɨ. 5 Dɨ àdhi nɨ kɨtswá bvò kònɨ̀dhɨ nɨ lavú dhɨ nɨ̀? Ngbà ꞌí dhya adrélépi kaꞌìá tàle dhɨ, Yésu Gìká nɨ Mváagó ꞌɨ dhɨ ꞌɨ.

Tà longólé Yésu Krísto nɨ tà dri dhɨ

6 Yésu Krísto, dhya atsálépi bvò kònɨ̀dhɨ ꞌá kɨtswálé bàtísimò do, ɨ̀ndɨ̀ kɨtswálé kàrɨ́ kutú dhɨ ꞌɨ. Akódhɨ atsá tá ngbà ꞌɨ bàtísimò do ko. Be ró dhɨ, atsá ɨ́na kɨtswálé bàtísimò do yǐ sè, ɨ̀ndɨ̀ kɨtswálé áyɨ kàrɨ́ kutú. Dɨ Tɨrɨ́ Lólo adré tadhá àma dré dhɨ, tà nda tà bàti ꞌɨ dhɨ nɨ̀. Tàko ko, Tɨrɨ́ nda tà bàti ꞌɨ. 7 Tà adrébhá tadhá dhɨ, tà nda tà bàti ꞌɨ dhɨ na: 8 Tɨrɨ́ Lólo, yǐ ɨ̀ndɨ̀ kàrɨ́. Dɨ tà na nda ɨ̀ adré ru kisú adrézó tà àlo ta kòdhya. 9 Mà adré gà tà móndɨ́ ɨ̀ dré adrélé longólé dhɨ kɨ kaꞌì. Dɨ, tà Gìká dré longólé dhɨ ɨ́na kàdrɨ̀ tà nda kɨ lavú. Àngyá ko, Gìká longó tà nda áyɨ tàndɨ nɨ Mváagó nɨ tà dri. 10 Dhya ángùdhi adrélépi Gìká nɨ Mváagó nɨ kaꞌì dhɨ, dhya nda tà Gìká dré longólé nda ɨ́be ɨ́ léna. Dɨ, dhya adrélépi Gìká nɨ kaꞌì ko dhɨ adré ɨ́na akódhɨ nɨ bha kɨnzò líyí ro, dré tà Gìká dré longólé áyɨ Mváagó nɨ tà dri dhɨ nɨ kaꞌìle ko dhɨ sè. 11 Dɨ tà longólé nda, tà kònɨ̀dhɨ ꞌɨ: Gìká afè àma dré lɨ́drɨ̀ kóná vésè kólyá dhɨ, ɨ̀ndɨ̀ mà adré lɨ́drɨ̀ nda nɨ kisú akódhɨ nɨ Mváagó na. 12 Dhya ángùdhi adrélépi Gìká nɨ Mváagó nda ɨ́be dhɨ kókpà lɨ́drɨ̀ nda ɨ́be ɨ́ léna. Dɨ, dhya adrélépi Gìká nɨ Mváagó nda àko ɨ́ léna dhɨ kókpà lɨ́drɨ̀ nda àko.

Yòwánɨ̀ nɨ kúlí kùdù

13 Má adré tà kòdhɨ kɨ tɨsɨ̀ àmɨ adrébhá Gìká nɨ Mváagó nɨ kaꞌì dhɨ ɨ dré, mɨ̀ kòkɨtswáró nìá dhɨ, àmɨ lɨ́drɨ̀ kóná vésè kólyá dhɨ ɨ́be dhɨ be. 14 Tà mà dré adrélé kaꞌìle bàti Gìká kandrá dhɨ, tà kònɨ̀dhɨ ꞌɨ: Mà kàdré tà zi akódhɨ tí ngóró dré adrélé lèle dhɨ tɨ́nɨ dhɨ, akódhɨ adré àma kɨ yi. 15 Dɨ mà dré nìle, akódhɨ adré àma kɨ yi dhɨ sè dhɨ, mà nì kpà tàle dhɨ, mà adré tà ángùdhi mà dré adrélé zìle akódhɨ tí dhɨ nɨ kisú dhɨ be.

16 Dhya àlo kàdré áyɨ adrúpi nɨ no adréràꞌa tàkonzɨ̀ ꞌo gò, tàkonzɨ̀ nda dré adrézó dhyá kɨ dri lɨ̀le dràdrà kisú ko dhɨ, lè dhya nda kòzi tà Gìká tí akódhɨ nda dré gò, Gìká kòfèró lɨ́drɨ̀ akódhɨ dré. Má adré ngbà ꞌí móndyá àyɨ kɨ tàkonzɨ̀ dré adrézó àyɨ kɨ dri lɨ̀le dràdrà kisú ko dhɨ kɨ tà ta kòdhya. Tàkonzɨ̀ adrélépi dhyá kɨ dri lɨ̀le dràdrà kisú dhɨ be. Má adré tàá dhɨ, à kàdré tà zi Gìká tí móndyá tàkonzɨ̀ làsú be kònɨ̀nɨ dhɨ kɨ ꞌobhá dhɨ ɨ dré dhɨ ko. 17 Tà kònzɨ títí adrélé ꞌòle dhɨ ɨ, tàkonzɨ̀ ꞌɨ. Dɨ, tàkonzɨ̀ adrélépi dhyá kɨ dri lɨ̀le dràdrà kisú ko dhɨ be.

18 Mà nì tàle dhɨ, dhya adrélépi Gìká nɨ mvá ro dhɨ kɨtswá gòle adrélé tàkonzɨ̀ ꞌo ko dhɨ be. Tàko ko, Gìká nɨ Mváagó adré akódhɨ nda nɨ lɨkɨ́ gò, Dhya kònzɨ dré kɨtswázó akódhɨ nɨ ꞌo kònzɨ ko. 19 Mà nì tàle dhɨ, àma móndɨ́ Gìká àdhya ꞌɨ dhɨ be. Mà nì kpà, móndyá títí bvò kòndɨ àdhya ɨ Dhya kònzɨ nɨ rìnyí zàle dhɨ be. 20 Mà nì kpà tàle dhɨ, Gìká nɨ Mváagó atsá bvò kònɨ̀dhɨ ꞌá gò, dré tògyá afèzo àma dré, mà kòkɨtswáró Gìká adrélépi bàti dhɨ nɨ ni be dhɨ bvó. Dɨ mà adré adrélé Gìká bàti nda léna, adrélé kókpà akódhɨ nɨ Mvá, Yésu Krísto léna. Akódhɨ nda Gìká bàti dhɨ ꞌɨ, ɨ̀ndɨ̀ lɨ́drɨ̀ kóná vésè kólyá dhɨ ꞌɨ.

21 Áma ànzɨ ɨ, mɨ̀ kàdré àmɨ kɨ lɨkɨ́ gìká tàko kɨ tà sè.