BÚKÙ TÀ TƗ́DHƗ́//RU YÌZO DHƗ ÀDHYA TÀ TADHÁLÉ DHƗ Ɨ 18

Bhàandre Bàbìlónà àdhya nɨ dhèma

1 Àmvolásà dhɨ, má dré ángéló àzya nòzo adréràꞌa asílé bhù lésè. Akódhɨ nda tá rìnyí ɨ́be kàdrɨ̀. Lagulagu nɨ adré tá ngá kazá bvò drǐsè títí. 2 Gò dré yòzoá kúlí ꞌuꞌù sè dhɨ:

«Dhe dre! Bàbìlónà kàdrɨ̀ dhe dre!

Bhàandre nda atsá vélé bhà tɨrɨ́ kònzɨ kya ró.

Atsá kpà àrà tɨrɨ́ kònzɨ ɨ̀ dré adrézó àyɨ kɨ zu lána dhɨ ró,

ɨ̀ndɨ̀ àrà àrɨ́ títí ɨ̀ndɨ̀ kàꞌwá títí ndǐ ró adrélé gàle gàgà dhɨ ɨ̀ dré adrézó àyɨ kɨ zu lána dhɨ ró.

3 Tàko ko, súrú títí bvò dri dhɨ ɨ̀ mvu tá vínò akódhɨ nɨ ndòtò tà àdhya gò, vínò nda dré àyɨ kɨ tsìzo.

Ópɨ́ kàdrɨ̀ bvò àdhya ɨ̀ fè tá àyɨ ndòtò tà ꞌo túmä́ní akódhɨ be.

Ngá lagɨ́bhá bvò àdhya ɨ̀ atsá tá ngábhá kàdrɨ̀ ɨ ró akódhɨ nɨ ngá làgɨ́ kyàkyà zyandre ró dhɨ ɨ sè.»

4 Gò má dré kúlí àzya apfòlepi bhù lésè dhɨ nɨ yìzo tàá dhɨ:

«Áma móndyá ɨ, mɨ̀ kàpfò bhàandre nda lésè,

mɨ̀ kòꞌoró tàkonzɨ̀ túmä́ní akódhɨ be ko,

mɨ̀ kònyaró kpà kɨzà kàdrɨ̀ dré dra nyàle dhɨ ɨ ko.*

5 Tàko ko, akódhɨ nɨ tàkonzɨ̀ ɨ̀ ga bvò na bǐ atsálé byá bhù ꞌa gò,

tà kònzɨ dré ꞌòle dhɨ ɨ̀ dré agázó Gìká léna.†

6 Dɨ mɨ̀ kòlogó tà akódhɨ dré tà dré ꞌòle dhɨ ɨ tí.

Mɨ̀ kòlogó drá tà dré ꞌòle dhɨ kɨ vúdrì vésè be rì.

Mɨ̀ kòdà akódhɨ nɨ kópò na ngá kònzɨ dré dàle móndɨ́ àruka ɨ dré dhɨ vésè be rì.‡

7 Mɨ̀ kòfè akódhɨ dré ngáaswa ɨ kɨzà be,

ngóró dré rúku fèle ngá làgɨ́ kyàkyà dhɨ be áyɨ tàndɨ dré dhɨ tɨ́nɨ.

Akódhɨ adré kisùá áyɨ togó na dhɨ: ‹Má adré lɨrɨ́lé kònwa ópɨ́ kàdrɨ̀ tòko ró.

Ma tàyɨ́tòkó ꞌɨ ko. Má kɨtswá mána àwó ngo tàdzí ko.›§

8 Dɨ ásà dhɨ, kɨzà kàdrɨ̀ kònɨ kɨ atsá akódhɨ dri kìtú àlo sè: dràdrà, tongotongo ɨ̀ndɨ̀ kàrábhò.

À nɨ akódhɨ nɨ za vèle àtsɨ́ sè,

àngyá ko, Mírì Gìká adrélépi akódhɨ nɨ tàbvó ta rìnyi ró.»

9 Ópɨ́ kàdrɨ̀ bvò àdhya àyɨ kɨ febhá ndòtò tà ꞌo akódhɨ be ɨ̀ndɨ̀ ngá làgɨ́ kyàkyà kɨ kisú akódhɨ be dhɨ ɨ̀ kònò akódhɨ nɨ vevè nɨ àtsɨ́kà dre dhɨ, ɨ̀ nɨ àwó ngo, adrézó tongólé akódhɨ nɨ tà sè. 10 Ɨ̀ nɨ àyɨ kɨ totó lárá ro tirì dré, ɨ̀ndɨ̀ akódhɨ nɨ ngáaswa dré, adrélé tàá dhɨ:

«Kɨzà! Kɨzà ámɨ ngá ꞌɨ, mɨ Bàbìlónà, bhàandre kàdrɨ̀ ɨ̀ndɨ̀ rìnyi ró nɨ!

Tàko ko, à ŋò tà mɨ́ dri, àkò sáà àlo akɨ́ rè ko dhɨ ꞌá!»

11 Ngá lagɨ́bhá bvò àdhya kɨ kpà àwó ngo, adrézó tongólé akódhɨ nɨ tà sè. Tàko ko, dhya kɨtswálépi gòle àyɨ kɨ ngá gɨ dhɨ vélé yókódhó. 12 À gɨ tá àyɨ nda ɨ drɨ́gásè: órò, àrezá, kɨ́rà làgɨ́ kyàkyà dhɨ ɨ, màyɨ̀kà rú be pérelè dhɨ ɨ, kɨ́tá ledélé lénè sè ɨ̀ndɨ̀ sòwá sè dhɨ ɨ, kɨ́tá làgɨ́ kyàkyà kɨka ɨ̀ndɨ̀ kɨka ryarya dhɨ ɨ, fa twátwa tàdzí be dóro dhɨ ɨ, ngá twátwa ledélé lɨ̀wá sí sè dhɨ ɨ, fa làgɨ́ kyàkyà dhɨ ɨ, ngá ledélé bòrónzè sè, aya sè, ɨ̀ndɨ̀ kɨ́rà rú be máreberè dhɨ sè dhɨ ɨ, 13 kànélè, màlásɨ̀ twátwa tàdzí be dóro dhɨ ɨ, màlásɨ̀ ledélé mírè sè dhɨ, béndélé, vínò, òlívè dò, ngánò fóndro, ngánò lòꞌwa, tí ɨ, kábilígyà ɨ, dòngɨ́ ɨ, tàmàmbírì dòngɨ́ ɨ̀ dré adrélé sèle dhɨ ɨ, tsàle ndɨ̀ndɨ̀ màrábà ɨ, àyɨ kɨ lɨ́drɨ̀ ɨ́be.

14 Àyɨ nda kɨ tàá dhɨ: «Ngá títí mɨ́ dré tá lovó nɨ kɨ bhàzo dhɨ ɨ̀ lapá mɨ́ drɨ́gásè dre. Ámɨ ngá títí làgɨ́ kyàkyà avébhá tò dhɨ ɨ̀ akɨ́ mɨ́ rúsè dre. Mɨ́ kɨtswá tàdzí gòle àyɨ kɨ kisú ko.»

15 Ngá lagɨ́bhá atsábhá ngábhá kàdrɨ̀ ɨ ró bhàandre nda sè dhɨ kɨ àyɨ kɨ totó lárá ro tirì dré, ɨ̀ndɨ̀ akódhɨ nɨ ngáaswa dré. Ɨ̀ nɨ àwó ngo, adrézó tongólé akódhɨ nɨ tà sè, 16 adrézó tàá dhɨ:

«Kɨzà! Kɨzà bhàandre kàdrɨ̀ nɨ ngá ꞌɨ!

Akódhɨ tosó tá ɨ́ rú kɨ́tá lénè sè dhɨ ɨ kɨ́tá làgɨ́ kyàkyà kɨka ɨ̀ndɨ̀ kɨka ryarya dhɨ ɨ́be, áyɨ ꞌòzo avélé órò sè, kɨ́rà làgɨ́ kyàkyà dhɨ ɨ sè, ɨ̀ndɨ̀ pérelè ɨ sè.

17 Dɨ akódhɨ nɨ ngá títí zyandre ró nda ɨ̀ akɨ́ drɨ́gásà, àkò sáà àlo akɨ́ rè ko dhɨ ꞌá!»

Bwátù todóbhá ɨ, àyɨ kɨ kàdrɨ̀ títí dhɨ ɨ, móndyá títí bwátù ɨ̀ dré adrélé dòle yǐandre mǐsè dhɨ ɨ, ɨ̀ndɨ̀ móndyá títí adrébhá ngá kisú yǐandre nɨ tà sè dhɨ ɨ́be dhɨ kɨ àyɨ kɨ totó lárá ro bhàandre nda rúsè. 18 Ɨ̀ kònò akódhɨ nɨ vevè nɨ àtsɨ́kà dre dhɨ, ɨ̀ nɨ yòá dhɨ: «Bhàandre àzya kàdrɨ̀ akódhɨ tɨ́nɨ dhɨ tàdzí yókódhó!» 19 Ɨ̀ nɨ tàpfulɨ́ndrɨ́ lomvó todàle àyɨ drìna, adrézó àwó ngo, adrézó tongólé, adrézó yòá dhɨ:

«Kɨzà! Kɨzà bhàandre kàdrɨ̀ nɨ ngá ꞌɨ!

Móndyá títí bwátù todóbhá yǐandre mǐsè dhɨ ɨ̀ atsá tá ngábhá kàdrɨ̀ ɨ ró akódhɨ nɨ ngá zyandre ró dhɨ ɨ sè.

Dɨ akódhɨ nɨ ngá akɨ́ títí, àkò sáà àlo akɨ́ rè ko dhɨ ꞌá!

20 Àmɨ bhù na nɨ ɨ, mɨ̀ kòlenzé tà atsálépi akódhɨ rú dhɨ sè wà!

Àmɨ, móndyá lólo Gìká àdhya ɨ, àpóstolò ɨ pròfétà ɨ́be nɨ ɨ, mɨ̀ kòlenzé wà!

Tàko ko, Gìká tà akódhɨ nɨ tàbvó, tà kònzɨ dré ꞌòle àmɨ rú dhɨ kɨ tà sè dre!»

21 Gò ángéló àlo rìnyi ró dhɨ dré kɨ́rà gú lanzìlepi kɨ́rà kàdrɨ̀ adrézó ngá ꞌi dhɨ pɨ́ dhɨ nɨ dòzo bhèle yǐandre na gò, tàzoá dhɨ:

«Gìká nɨ kókpà Bàbìlónà, bhàandre kàdrɨ̀ nɨ bhe rìnyí sè kònɨ̀nɨ gò,

gòzo vélé akódhɨ nɨ kisú tàdzí ko.

22 À kɨtswá gòle vélé longó yi mɨ́ léna tàdzí ko,

gba kàdré kùdhí sè yà, kúlí sè yà, fɨ́rɨ́lɨ́ sè yà, kó ngalè gòká sè yà dhɨ.

À kɨtswá gòle vélé àzí ꞌobhá twátwa dhɨ kɨ àlo kisú mɨ́ léna tàdzí ko.

À kɨtswá gòle vélé kɨ́rà adrézó ngá ꞌi dhɨ nɨ kpòrò yi mɨ́ léna tàdzí ko.

23 Tálà nɨ ngádra kɨtswá gòle vélé ngá kazá mɨ́ léna tàdzí ko.

À kɨtswá gòle vélé tòkó líyí nɨ kúlí yi tòkó àdhya be mɨ́ léna tàdzí ko.

Móndyá adrébhá tá ngá lagɨ́ mɨ́ léna dhɨ ɨ tá móndyá kàdrɨ̀kàdrɨ̀ bvò àdhya ꞌɨ.

Ámɨ kólé tà sè dhɨ, mɨ́ lɨtɨ́ tá mɨ́na súrú títí bvò dri dhɨ ɨ.

24 À kisú tá kpà mɨ́ léna pròfétà kɨ kàrɨ́ móndyá lólo kya be,

ɨ̀ndɨ̀ móndyá títí tupfúlé todràle bvò dri dhɨ kya be.»

* 18:4 À kònò Èsáyà 48:20; Yèrèmɨ́yà 50:8; 51:6, 45. † 18:5 Kɨdhoma 18:20-21; Yèrèmɨ́yà 51:9. ‡ 18:6 Longó ɨ 137:8; Yèrèmɨ́yà 50:29. § 18:7 Èsáyà 47:7-9.