8
Yesu, nganga ya Ŋwaphongo oomunɛnɛ wa ɓanga
1 Nzuka, lowɔ laa ntina o maphɔɔ maawɔ ɓanga lango lolo, toli na nganga ya Ŋwaphongo oomunɛnɛ, oozasi o ɓoloo pha mumbanga ŋwa ɓokonzi ŋwaa ɓonɛnɛ o ikolo.
2 Kakyele etoma ya maphɔɔ maa ɓosantu na o ŋwakolo molaku ŋwaatongama na Nkolo kasi na moto phe.
3 Phɔ, nganga ya Ŋwaphongo oomunɛnɛ munsɔ ɓamoɔlɔ phɔ ya iambya bilambo na itumba mambeka. Yango mɛna asengyesi oɓokye nɛ azwe ŋwana ekpele wa ilambela.
4 Ɓo aɓaka o mokyisi, nde taɓaka na nganga ya Ŋwaphongo, phɔ wali ɓato ɓawaa ɓa ambya bilambo kokokana na moɓeko.
5 Kasi etoma ya ɓɛ, eli eyaulana, na elala ya maphɔɔ ma ikolo, nde ɓo wawɔkɔ Ŋwaphongo na Mose waalukaka yo na iyunva itonga molaku oɓokye:
Kyeka, amba wɔ nɛ,
wamokyela isɔ koɓenga ndakyisa ya ɓo wateyaka ɓɛ́ɛ o ikolo sa ngomba.
6 Kasi uŋwaŋwa eye, azwe etoma ya ɓonganga eelekyi na ɓolaa koleka. Phɔ ali moɓɔngyɛ ŋwa sangola elaa, eli o ikolo sa mambunu maala koleka.
7 Phɔ ɓo sangola eya eɓandele teyaɓaka na maphɔɔ maaɓe, nde teɓaeyendinyakyi na sangola eya iɓale.
8 Phɔ, ɓaezwa na mooya, yango mɛna Ŋwaphongo awɔ yo kye:
Kyeka: Kyewɔ Nkolo, nkɔlɔ kyiye
namokyela sangola eenyakune na iɓota sa Isalayɛlɛ
na ná iɓota sa Yuda
9 eteɓe ndokolo sangola eyakyelaka nga na ɓaango ɓa ɓɛ̀ɛ
mokɔlɔ ŋwa ɓakpaka nga mieɓɔkɔ
phɔ ya iɓatɔkɔlɔ o mokyisi ŋwa Ezipito.
Phɔ ɓɛ́ɛ mampenza te ɓaika maambya mi sangola ya nga,
na nga sikulaka ɓakyeka na miyo, kyewɔ Nkolo.
10 Phɔ kyeka sangola eyamoɓa na nga na iɓota sa Isalayɛlɛ
o nsima ya nkɔlɔ miina, kyewɔ Nkolo:
Waamoambya nga miɓeko ma nga,
naamikoma o maumunya ma ɓɛ́ɛ na o mandondo ma ɓɛ.
Na moɓaa Ŋwaphongo wa ɓɛ,
ɓa moɓaa iɓota sa nga.
11 Mɔnɔmɔ na mɔnɔmɔ onte ya ɓɛ́ɛ etakule teya nwɛbi nɛ
naa ŋwana nyango na iwɔ oɓokye: Eɓa Nkolo!
phɔ ɓasɔ ɓamunzeɓa,
tata o ɓaakyikyi nɔnɔ o ɓaphomba.
12 Phɔ ya oɓokye namoɓaa na ngɔngɔ phɔ ya ɓoɓe pha ɓɛ
na masumu ma ɓɛ, esikule maumunya na mbala.
13 Waawɔ yo na sangola eenyakune, kakotole sangola eekasi. Nzuka ekpele eekotosi ɓɛ, eli phɛnɛphɛ na ilɛmɔ.