2
Klisto ali avoka wa ɓanga
1 Ɓana ɓanga,
naekomele ɓaɓona phɔ ɓɛ̀ɛ sakyela masumu.
Kasi ɓo mɔnɔmɔ na ɓɛ̀ɛ anikyela isumu,
toli na avoka mɔnɔmɔ oka Tata,
eli Yesu Klisto, oli moto wa ɓosembo.
2 Phɔ yo ali mbeka phɔ ya masumu ma ɓanga.
Teembi ɓa phɔ ya masumu maka ɓanga na ɓanga,
kasi na phɔ ya ma mokyisi mobimba.
Kumola moɓeko ŋwa lozingo
3 Emba na ɓomɔ, toanole oɓokye tomoeɓe:
Ɓo tokumole miɓeko mɛ.
4 Moto okowɔ oɓokye: «Namoeɓe»,
kasi takumole miɓeko mɛ,
ali moto wa ɓɔɔlɛ,
na maphɔɔ maphɛlɛ temali onte yɛ.
5 Kasi moto okoɓanza Iloɓa sɛ,
nde phɛlɛ, onte yɛ, lozingo la Ŋwaphongo lowɛnɛɛ.
Na ɓomɔ, toeɓe oɓokye toangana nɛ.
6 Moto okomitate oɓokye aangana na Ŋwaphongo,
esengyesi oɓokye atambule yo mampenza o manzela matambulaka Klisto.
7 Ɓɛbi na nga ɓa lozingo,
moɓeko moekomele nga temoli munyakune,
kasi moɓeko ŋwa kalakala,
ŋwazwa ɓɛ̀ɛ uta o etatele.
Moɓeko mɛ ŋwa kalakala, eli Iloɓa saoka ɓɛ̀ɛ.
8 Naɓo ɓaɓona, eli moɓeko munyakune moekomele nga
— yango eli phɛlɛ onte yɛ na onte ya ɓɛ̀ɛ —
phɔ enzɔmbi kyemane
na ŋwakolo moo moombo ngala.
9 Moto okomitate oɓokye ali o moo,
bibi kaine nwɛbi nɛ,
ali o enzɔmbi.
10 Okozingye nwɛbi nɛ
ali o moo,
tali na ná ekpele yɔnɔyɔ onte yɛ phɔ ya imoɓakyitinya.
11 Kasi moto okoine nwɛbi nɛ
ali o enzɔmbi,
katambule onte ya enzɔmbi
tambe naeɓa biikyɛ yo,
phɔ enzɔmbi emozibi miyo.
Moanosi o ɓoo pha mokyisi na ɓaatɛmɛlɛ Klisto
12 Ɓana ɓa nga, naekomele lango phɔ:
«Masumu ma ɓɛ̀ɛ malimbisami phɔ ya nkombo yɛ, yo Yesu.»
13 Ɓatata, naekomele lango phɔ:
«Koeɓe oli uta o etatele.»
Ɓanzenga, naekomele lango phɔ:
«Olongyi moto moɓe.»
14 Ɓana ɓa nga, naekomele lango phɔ:
«Koeɓe Tata.»
Ɓatata, naekomele lango phɔ:
«Koeɓe oli uta o etatele.»
Ɓanzenga, naekomele lango phɔ:
«Oli ɓakamba,
na Iloɓa sa Ŋwaphongo sili na ɓɛ̀ɛ,
oli na ɓalongyi ɓa moto moɓe.»
15 Sazinga mokyisi naa ili o mokyisi.
Ɓo moto kazingye mokyisi,
lozingo la Tata teloli nɛ,
16 phɔ isɔ ili o mokyisi
— phowa ya nzoto,
phowa ya miyo,
na lolɛndɔ la imiambya o mbolo ya mokyisi —
teyute na Tata,
kasi kyiute na mokyisi.
17 Nzuka mokyisi ŋwamolekana, iyo na maphowa mɛ.
Kasi moto okokyele ɓoozingyi Ŋwaphongo amoɓa phɔ ya ɓoɓɛlɛ.
18 Ɓana ɓa nga,
eli imbɛlɛ sa mbomela.
Waoka ɓaimole
oɓokye motɛmɛsi wa Klisto kaye.
Nzuka tata uŋwaŋwa eye, ɓatɛmɛsi ɓa Klisto ɓali.
Na ɓɛ̀ɛ toeɓe oɓokye eli imbɛlɛ sa mbomela.
19 Ɓatɔkɔlɔ nde oka ɓanga,
kasi teɓaɓaka ɓa ɓanga.
Ɓo ɓaɓaka ɓa ɓanga,
nde ɓaikalaka na ɓanga.
Kasi esengyelakyi oɓokye amiwɛninya
oɓokye ɓato ɓasɔ, na ɓo ɓali,
teɓali ɓa ɓanga.
20 Kasi phɔ ya ɓɛ̀ɛ, wazwa mauta maeyinga Ɓolɔɓɔ,
na ɓɛ̀ɛ ɓasɔ koeɓe.
21 Sikyi ekomela
oɓokye toeɓe maphɔɔ ma phɛlɛ,
kasi oɓokye komaeɓe,
na oɓokye lowɔ losɔ loli la ɓɔɔlɛ
teloute na maphɔɔ ma phɛlɛ.
22 Moto wa ɓɔɔlɛ eli nza,
ɓo teɓe moto okoangane
oɓokye Yesu tali Klisto?
Kyeka motɛmɛsi wa Klisto,
moto akoangane Tata na Ŋwana.
23 Moto munsɔ okoangane Ŋwana
aanga na Tata.
Ka okoanole Ŋwana
aanosi na Tata mɛ.
24 Phɔ ya ɓɛ̀ɛ, simo eyaoka ɓɛ̀ɛ uta o etatele
eɓe na ɓɛ̀ɛ.
Ɓo eɓe na ɓɛ̀ɛ,
simo eyaoka ɓɛ̀ɛ uta o etatele,
na ɓɛ̀ɛ, wamoɓa na Ŋwana na ná Tata.
25 Mɛna eli mbunu eya elakyela yo mampenza:
Ɓomɔɔ pha ɓoɓɛlɛ na ɓoɓɛlɛ.
26 Kyeka lolukakyi nga ekomela
phɔ ya ɓato ɓalukye iyekatela.
27 Phɔ ya ɓɛ̀ɛ, mauta maeyinga yo
mali na ɓɛ̀ɛ
emba tosengyesi oɓokye ɓaeteya.
Kasi phɔ mauta mɛ maeteya o maphɔɔ masɔ,
— emba mauta mɛ mali ma phɛlɛ
temambe na kata —,
phɔ maeteya,
oli nɛ.
28 Yango mɛna, ɓana ɓa nga, ɓa nɛ,
phɔ wamotɔkɔlɔ yo,
toɓe na sakolo ianola
emba ɓanga satonda na sɔɔ itakye nɛ,
imbɛlɛ saamoya yo.
Ɓa na ɓosembo, sakyela masumu
29 Phɔ ɓɛ̀ɛ koeɓe oɓokye ali moto wa ɓosembo,
eɓa oɓokye moto munsɔ oli nɛ na ɓosembo, aɓotama nɛ.