Mokanda ŋwa Polo ŋwa ntuɓo oka
Timote
Maphɔɔ ma etatele
Ango wa Timote aɓaka Moela, nyango aɓaka Moyuda owa butwa moklisto. Polo avanaka na Timote phɔ ya mbala eya ntuɓo o mokyisi na nkombo Listrɛ (Bitoma 16.1-4), mɛna yaɓaka o imbanga sa Polo sa iɓale. Koɓanda wawana, Timote abutwaka mɔnɔmɔ ɓaaɓaka ɓakyɛ mitambula na Polo o mambanga mɛ maikye ma iimola simo elaa.
Mokanda mumu mowɔlɛ maphɔɔ manɛnɛ maato:
- 1 Timote 1.1-20; 4.1-5: Polo kakyebisa Timote phɔ ya mateya ma ɓɔlɛ, na maphɔɔ makyekyi miɓeko ma Ɓayuda na ɓato ɓateɓali ɓayuda
- 1 Timote 2-3: Polo kaphɛ Timote molɔngɔ ŋwa iɓɔngya losambo, na moɓesi mosengyesi iɓa na ɓakambi ɓa Ingomba
- 1 Timote 4.6–6.21: Polo kateya Timote ndengye esengyesi yo ikyela etoma yɛ onte ya ɓaanosi, phɔ aɓe awaakolo moto wa etoma wa Yesu Klisto
O mokanda nwɛ, Polo kaongye na ɓanga oɓokye ɓanga satosaka nde miɓeko ma Ingomba na ɓakambi ɓa sango, kasi toɓe na sakolo ianola phɔ yaikumola Yesu Klisto, mobikye wa ɓanga (2.3-6).
1
Polo kaɓeya Timote
1 Nga Polo, toma wa Yesu Klisto, phɔ ya ndingyisa ya Ŋwaphongo Mobikye wa ɓanga na Yesu Klisto molemo ŋwa ɓanga,
2 oka wɛ Timote, owakolo ŋwana wa nga o ianola, naekomele oɓokye: Ngɔlu, ngɔngɔ, ɓose pha Tata Ŋwaphongo na pha Yesu Klisto Nkolo wa ɓanga iɓe na wɛ.
Ɓateye ɓa ɓɔlɛ
3 Ɓo wawɔkɔ nga na wɛ imbɛlɛ sa kyɛkyɛ nga o Makedoniya, ɓa o Efese phɔ ya ikatela ɓato ɓaayɔkɔ ɓɛ́ɛ sateya mateya maa ɓɔlɛ.
4 Oɓakatele ɓɛ́ɛ samiambya o bikoo ɓa pha na itɔndɔlɔkɔ maɓota saunva. Maphɔɔ mamana maɓote nde miko kasi ŋwango ŋwa Ŋwaphongo phe, mookokyisame onte ya ianola.
5 Ntina ya motindo mɛ eli lozingo looute o ndondo elaa, na maumunya malaa na ianola sa phɛlɛ.
6 Phɔ ya iɓa saɓenga nzela eye, ɓato ɓayɔkɔ ɓabungyi nzela, ɓaɓengi ɓowɔlɛ ɓowɔlɛ phaazanga ntina.
7 Ɓamitate iɓa ɓateye ɓa miɓeko, nzuka teɓaeɓe naa maphɔɔ mawɔ ɓɛ́ɛ naa maphɔɔ mateya ɓɛ.
Eyaakolo ntina ya moɓeko
8 Phɔ toeɓe oɓokye moɓeko ali molaa ɓo moto kamokyelele ndokolo moɓeko.
9 Phɔ, toeɓe na ɓolaa ɓoɓo: Moɓeko temoli phɔ ya moto o molaa, kasi phɔ ya ɓato ɓaateɓatosa na ɓatɔmbi, ɓato ɓaɓe na ɓato ɓa masumu, ɓaateɓakumole Ŋwaphongo eɓe na mbolo iisantu, ɓaɓomi ɓa ɓato, eɓe ɓa ango eɓe ɓa nyango,
10 ɓaakyele ɓondumba, ɓaalale na ɓɛbi na ɓɛ́ɛ ɓampele, ɓaaungye ɓa ɓaombo, ɓakati ɓa ɓɔlɛ, ɓaakate seleka ya ɓɔlɛ, na maphɔɔ masɔ maatɛmɛlɛ mateya ma phɛlɛ.
11 Mateya mɛ eli Simo Elaa ya nkyɛmɔ ya Ŋwaphongo owa ngambo eya mpɛ ɓɛ́ɛ phɔ naeɓanza.
Polo aphɛ mɛlɛsi phɔ ya ngɔngɔ ya Klisto
12 Naphɛ mɛlɛsi na owampɛ ɓokusi, Yesu Klisto Nkolo wa ɓanga: Eli yo moto owa wɛnɛ oɓokye nakokyi amba nkpa o etoma yɛ,
13 nga owaɓaka phanza motiyosi, munyɔkɔsi na moto wa nkamba. Kasi anzokyela ngɔngɔ phɔ nakyelaka saeɓa ntina, na izanga ianola.
14 Phɛlɛ, ngɔlu ya Nkolo wa ɓanga, eɓe na ianola, na lozingo looli onte ya Yesu Klisto yatonda mi nga.
15 Iloɓa sisi sili sa phɛlɛ, sikokyi ianolama na ɓato ɓasɔ oɓokye Yesu Klisto aya o mokyisi phɔ ya ibikya ɓato ɓa masumu ɓoli nga, inga moto owa o ɓoo.
16 Kasi ɓo anzokyelaka ngɔngɔ, eli phɔ ya oɓokye oka nga, moto owa o ɓoo, Yesu Klisto ateya ndondo yɛ elaa, ndokolo ndakyisa phɔ ya ɓato ɓamoanolela, phɔ ya ɓomɔɔ pha ɓoɓɛlɛ.
17 Oka mokonzi owa ɓoɓɛlɛ,
Ŋwaphongo ooli nde yo mɔnɔmɔ, ootowe, ootowɛnɛnɛ,
ngambo na nkyɛmɔ
phɔ ya ɓoɓɛlɛ na ɓoɓɛlɛ. Amɛ.
Iŋwana eɓasi elaa
18 Timote, ŋwana wa nga, kyeka moɓeko moephɛ nga, ikokana na nɔkɔ ya ɓaimosi ɓaakalakala phɔ ya wɛ. Nɔkɔ mɛ iɓe ɓokusi pha wɛ o eɓasi elaa ekye ŋwane wɛ;
19 na ianola na maumunya malaa. Ɓato ɓaayɔkɔ ɓalɛkyɛ ikyela ɓaɓona, emba ɓamba zinza ianola sa ɓɛ.
20 Onte ya ɓɛ́ɛ wamozwa Imene na Alegizandre, na ɓaambya oka Zabulu, phɔ ɓaekole iɓa sakula tiyola Ŋwaphongo.