12
Angidaji gwudi Lïgïꞌrïm lidi Ngwaalu
1 A be gwani yiꞌral yanni yulla je yani angidaji gwudi Lïgïꞌrïm lidi Ngwaalu lani ngweengga, äny gwubupa je ngaa je lenge.
2 Ngaa lïlïngïdï ndi ari gwele gwerre nga nga liru ngwüjï ngwaꞌti lïngïdï Ngwaalinga ngwuruya je dïdülä dati ꞌti ondaju ara je dudiyi.
3 Yäy gu no nggwa je ondaci ndi ari, dïjï dere daꞌti dati ondaju Lïgïꞌrïm le lidi Ngwaalu dati ari, “Yicu gwüꞌtäjäär gu ngwünyü,” na dïjï dere daꞌti da ari, “Yicu gwuru Deleny,” ꞌdogo Lïgïꞌrïm le lanni Lijuꞌru.
4 Angidaji gwudi lïgïꞌrïm nggwo onyadu yiꞌranu, a be Lïgïꞌrïm ru leꞌte leꞌte.
5 Yiiru giyo yonyadu yiꞌranu a be Deleny ru deꞌte deꞌte.
6 Apepe nggwo gwonyadu yiꞌranu a be Ngwaalu ru ngweꞌte ngweꞌte ngwanni ngwati ape yiꞌral ꞌdar ꞌdengge.
7 Dïjï deꞌte deꞌte dati gu Ngwaalu inggidi Lïgïꞌrïmä lani jayi gwudi ngwüjï ꞌdar.
8 Gïdïjï deꞌte, dati Ngwaalu ätädä ngwujaꞌri ngwudi bebere Lïgïꞌrïm le na mana diꞌter ngwätädä ngwujaꞌri ngwudi lenge Lïgïꞌrïm le leꞌte leꞌte,
9 na diꞌter ngwätädä ämnïng Ngwaalu Lïgïꞌrïm le leꞌte leꞌte a diꞌter ngwätädä angidajing gwudi uꞌriyi nono Lïgïꞌrïm le giloo leꞌte leꞌte,
10 na diꞌter ngwätädä ndi ape yiima, na diꞌter aar ätädä ndi alliji yïjïrä, na diꞌter aar ätädä ndi lenge ngwügïꞌrïmä, na diꞌter ndi ondaji ngwungla ngwe ngwuꞌter, na diꞌter aar ätädä ndi gwürlï ngwungla.
11 Giyee ꞌdar apepe gwuru gwudi Lïgïꞌrïm leꞌte leꞌte na yating je gegenaci ngwüjü anaku mïnïng gu.
Ngwanginu ngwuru ngweꞌte pu aar be onyadi yerelanu
12 Ngwanginu ngwuru ngweꞌte pu aar be ätï yerel yonyadanu, na yerel giyee yonyadanu, yati geꞌte ngwangina ngweꞌte pu. Yäy yiru gu ꞌto no ndi Kirictu.
13 Ndi ari alanga ꞌdar lïnyïnyïnä Gïlïgïꞌrïm leꞌte pu ngwanginu ngweꞌte pu manari a liru Ngwüyäwüd na manari a liru ngwüjï ngwanni ngwuru Garany na manari a liru ngwïnäd na manari a laꞌti gu rüdï. Alanga ꞌdar lätädï nje Lïgïꞌrïmä leꞌte pu ar ïyï.
14 Gwenene ngwanginu ngwäꞌtüdï gerel geꞌte pu aar be onyadi yerelanu.
15 Manari gora gaadi ari, “Nunnu äny gwäꞌtüdï guy, äny gwäꞌtüdï gwudi ngwanginu,” gay gaꞌti gaading ge abri ndi ru gidi ngwanginu.
16 A manari länï laadi ari, “Nunnu äny gwäꞌtüdï läy, nggwäꞌtüdï gwudi ngwanginu,” gay gaꞌti gaading ge abri ndi ru lidi ngwanginu.
17 Adinari ngwanginu ꞌdar ru läy, a laadi be ꞌdingini ange gwe? Na adinari ꞌdar ru länï, a laadi be üꞌtï ange gwe?
18 A be ꞌdidanu ru ndi ari Ngwaalu ngwuma gegeꞌte yerel ngwanginu ꞌdar anaku mïnïng gu ndi aar gu ru.
19 Adinari aar ru gerel geꞌte pu ꞌdar, ngwanginu ngwaadi be gïꞌtïnä awa?
20 Yiru ndi ari yerel yidi ngwanginu onyadi a be ngwanginu ru ngweꞌte pu.
21 No läy laꞌti la ci guy nu, “Äny gwaꞌti ang mïnü.” Na giꞌra gaꞌti ga ci yora, “Äny gwaꞌta je mïnü!”
22 Yiru manni ndi ari yerel yidi ngwanginu yanni yati enggani yamiꞌratu, yiru yanni yojemana yiꞌral.
23 Na yerel ngwanginu yanni yati enggani yooko guꞌru ndi aar je denya, yati ar je denya denyang gwanni gwuru ꞌter. Na yerel ngwanginu yanni yati ꞌti engganalu, yiru ya ärrïnï yiꞌral yijaw,
24 a be yerel ngwanginu ngwege yanni yenggana yaꞌti mïnü ndi aar je ärrï yiꞌral yijaw. A be Ngwaalu ngwuru ngwügäꞌräjä yerel ngwanginu gwüpäng ngwuje ätädänï yerel guꞌru yanni yamiꞌratu.
25 Nunnu aaꞌti üꞌrïꞌtïdänü gwa ji ngwanginu aar be ubidanu ndi arngajidi.
26 Manari ngwanginu gerel geꞌte ngwumbuju dïrbä, yerel ꞌdar ngwanginu ngwa aar ngwe mbuji dïrbä, ma gerel geꞌte näjïnï a yerel ꞌdar aar le jayanu.
27 Gwenene nga nga liru ngwanginu ngwudi Kirictu, na dïjï deꞌte deꞌte ꞌdanggalanu diru gerel gidi ngwanginu.
28 Na kiꞌdoonga gidi Ngwaalu, Ngwaalu ngwuma geꞌte gwerre gwerre ngwoꞌra ngwükäjäär je, ngwoꞌre ngwugeꞌte ngwïjïrä, a mana ngwugeꞌte ngworta, a be lanni lati ape yiima, na lanni langidacaar je ndi uꞌriyi ngwüjü nono, lanni lati gataji ngwüjü düwä ngwuꞌter, lanni langidacaar je ndi rurriyi yiiru, na lanni lati ondaji ngwungla ngwe ngwuꞌter.
29 Ngindenga ꞌdar liru ngwooꞌra ngwükäjäär je? Ngindenga ꞌdar liru ngwïjïre? Ngindenga ꞌdar liru ngwoorta? Ngindenga ꞌdar lati ape yiima?
30 Ngindenga ꞌdar langidacaar je yiima ndi uꞌriyi ngwüjü nono? Ngindenga ꞌdar lati ondaji ngwungla ngwe ngwuꞌtere? Ngindenga ꞌdar lätï yiima ndi gwürlï ngwungla?
31 Ara je yigor enyanu gwani angidaji gwanni gwupana.
A gwenene nggwa je enggaci gay ganni girana guꞌru.