8
Dirꞌdal danni diru giꞌra gidi gekajidi gwanni gwuyang
1 Ngwujaꞌri ngwanni ngwadi ar ngwe ari ngene ngwuru ngwee, ndi ari alanga lätï dirꞌdala danni diru giꞌra diru gu no, danni dijalu kaama ngwuduꞌri ngwudi Ngwaalu ngwuru Deleny kerala.
2 A nginde gwuru dïnäd dani Yicu gwanni gwäpïjä Ngwaalinga yirꞌdala ngwaalu ngwanni ngwuru gäꞌtä ꞌdidanu a Deleny ru digegeꞌta, gaꞌti gïꞌtïnä dïjï de dümnä.
3 Dirꞌdal danni diru giꞌra dere dati aar alliji ngwügïꞌtïjï Ngwaalinga angidajing na mïꞌrïnï nono gwudi ngwüjï na gu no yiru gu yeꞌte yeꞌte gidirꞌdal ndee ndi ätï yiꞌral yani ligoꞌro lüngün ꞌto ndi gätïjï Ngwaalingalu.
4 Adinari gwuru gwudi dïyängälü, gwaꞌti gwadi ru dirꞌdal, ndi ari ngwüjï ngwuju ngwanni ngwati gatu angidajingalu anaku ondaja gu yobo yidi Müjä.
5 Ngwati ape yiiru giyee yanni yiru ngwüꞌrïmbïl aar ru diil didi gäꞌtä ganni giru ꞌdidanu nggo kerala. Yiru gu yeꞌte yeꞌte anaku gaji gidi Müjä. Anni mung ru gwadi pä gäꞌtä ganni gijuꞌru, gwuca Ngwaalu, “Diwayina gu ndi ari nga geꞌte yiꞌral ꞌdar aar oꞌrani yiꞌral anaku enggacara je gu Ngwaalu kenala.”
6 A be yiiru yanni yätädï je Ngwaalu Yicung, yipana giyiiru yegen anaku pana gu gekajidi gwanni gwurung gu dartan ndi gekajidi gwanni gwuꞌrin, na yïgïꞌtïnä ngwujaꞌri ngwe ngwujayana ngwaru ngwe Ngwaalu.
7 Ndi ari adinari yere yaꞌti yiju yiki ndi gekajidi gwudi gwerreng, gay gaꞌti ba be gadi ji gani gekajidi nggwee gwuyang.
8 A be Ngwaalu ngwänggädï keng gwudi ngwüjï ngwube ari,
“Gaji nggo gïndï
äny gwa geꞌte gekajiding gwuyang ngwüjï
ngwe ngwudi Yïjïräyïl
na ngwüjï ngwe ngwudi Yäwüdä.
9 Gwaꞌti gwa ru nono gwanni gwugeꞌteny gwerre ngwügüürnängä ngwe ngwegen
kaji ganni giminje ge määtä guy ge
nje okta nje ꞌtüyä ken gani Mijir,
ndi ari ngindenga laꞌti rucu gekajiding gwüny ligor leꞌte pu,
a liminje gwürläcï luꞌra.
10 Gekajidi gwuru nggwee gwanni gwadi nyi geꞌte ngwüjï ngwe ngwudi Yïjïräyïl
ma gaji ele nggone, a gu Deleny ari.
Äny gwa geꞌte yobo yüny giyiꞌranyanu yegen
na nje ulli giyigoranu yegen.
Äny gwa ru Ngwaalu ngwegen,
na ngindenga la ru ngwüjï ngwüny.
11 Gwere gwaꞌti ba be ngwenggaci dïjü dijacidaar de,
na gwere gwaꞌti ba be gwa enggaci gwenggen ngwuci, ‘Lïngïdï Delenya,’
ndi ari ngindenga ꞌdar liny lenge,
lanni lokana ꞌdenggenanu na lanni lipana ꞌdenggegenanu.
12 Ndi ari linje düdänïjänü gwani ke gwegen
na la ꞌti ba be linje düwäyïnïjï keng gwegen.”
13 Ngwaalu ngwuma ari gekajiding nggwee gwuru gwanni “gwuyang,” nginde gwuming ape nggwoo gwuju gwerre gwuming ruji gwuꞌrin. Na gwanni gwuru gwuꞌrin ngwuru yïmäyïn, nggwo gito gwadi ele ndi dudi.