16
ꞌDïꞌrï gwudi Yicu
(Mätä 28.1–8; Luka 24.1–12; Yuwana 20.1–10)
1 Anni ma gomon medadi ganni giru Kwoꞌra täꞌrïl, a Märïyäm gwani Mäjïdälïyä na Märïyäm nanni gwudi Yagub, na Jälümä, aar ella gwuduꞌrula nunnu aadi aar ele ndi änïjä ngwangina nono ngwudi Yicu.
2 A ꞌtuꞌtu dilu danu komon ganni giru giꞌra giyomon Kwoꞌra täꞌrïl, gwele ma lingen ürrädä aar ji kay ladi ele gidimomalu.
3 Aar otajidalu kay aar ari, “Yärü gwanni gwadi nje dätïꞌrïyïjï goꞌrra kïyï gidi dimomo?”
4 A be anni ma aar ombajidalu aar mbuji goꞌrra ganni gipa giju gwele, gima äbrnï gïlängïr.
5 Anni ma aar änï gidimomanu, aar engga damal dïjädälü kaama digenna direda dibidu, aar allalu ndïr.
6 Ngwuje ci, “Ngaa ꞌti ändälü ndïr ngaa libupa Yicung gwudi Najrang gwanni gwüpädäär küꞌrï. Nginde gwuma ꞌdïꞌrï! Nginde gwaꞌti ngene. Änggädär ngwaalinga ngwanni ngwugeꞌtaar gu.
7 A be ïndär aang ondaci ngwoꞌra ngwüngün na Butrujing ndi ari, ‘Nginde gwa je dalmacani gwele Jälïl. Ngenone, gwa aang engga anaku cara je gu.’ ”
8 Aar ꞌtü puprang no lididiꞌru lïndï le ngwaalalu, aar abra gidimomo. A je yedeny eny aar ꞌti ondaca dïjü dere.
A Yicu ꞌtäcä Märïyämïngälü gwani Mäjïdälïyä
[
9 Anni ma Yicu ꞌdïꞌrï ꞌtuꞌtu dilu danu gomon ganni giru giꞌra yidi yomon Kwoꞌra täꞌrïl, ngwüꞌtäcä Märïyämïngälü gwani Mäjïdälïyä gwerre gwerre gwanni gwüꞌtüyüng gu ngwüꞌrïllänü kwoꞌra täꞌrïl.
10 A Märïyäm ꞌdïꞌrï ngwele ngwondaci ngwüjü ngwanni ngwujaar le gaji ganni gijaar ge ndi rünïjï Yicung.
11 Anni ma gu ngwüjï ngwoo ꞌdingini ndi ari Yicu nggwo gwumidu gwänggädï Märïyäm ngwäy ngwe ngwüngün, aar ꞌti ämnäcä ngwujaꞌri.
A Yicu ꞌtäcä ngwoꞌralu rom ngwüngün
(Luka 24.13–35)
12 Aji a Yicu ꞌtädälü yiꞌremna ye yiꞌter, ngwäꞌtäcä ngwoꞌralu ngweꞌte rom ngwuju ndi ele ngwadi elada poor kündär.
13 Ngwee rom oꞌre aar je ondaci liꞌter aar je ꞌti ämnäcä ngwujaꞌri ngwegen ꞌto.
A Yicu ꞌtäcä ngwoꞌralu ꞌdar ngwüngün
(Mätä 28.16–20; Luka 24.36–49; Yuwana 20.19–23; Yiiru 1.6–8)
14 Aji a Yicu ꞌtäcä ngwoꞌralu ngwükäjäär je ngwüngün ngwuru ꞌdï na gweꞌte (11) ngwuju ndi eny. Ngwuje girinya gwani ämnï Ngwaalu gwegen gwanni gwamiꞌratu na gwani undi yigor yegen ndi ämnäcï ngwüjü ngwanni ngwänggädï anni mung ꞌdïꞌrä giyiꞌranyanu.
15 Ngwuje ci, “Ïndär gïdïdlä ꞌdar ngaa ondaci ngwüjü ꞌdar ngwujaꞌri ngwe ngwanni ngwujaw.
16 Gwanni gwa ämnï Ngwaalu ma aar nyïnyï, gwa gïlängïdïnï a be gwanni gwaꞌti gwa ämnï Ngwaalu, gwa aar gwe obalu.
17 A yiꞌremna yiru giyee yanni ya ji ꞌdenggen lanni la ämnï Ngwaalu ndi ari, la ꞌtüyï ngwüꞌrïllänü ngwürïny ngwe ngwüny, la ondaji ngwungla le ngwuyang,
18 la uti ngwüüngäyälü ngwuy ngwe, na ma aar ïyï yiiya yati ꞌrinyidi, laꞌti la ru yiꞌral yere aꞌtur. La alliji ngwüjü ngwuy nono ngwanni ngwümä ngwa uꞌri nono.”
A Yicu ꞌdïꞌrï ngwallu kerala
(Luka 24.50–53; Yiiru 1.9–11)
19 Anni ma je Deleny dani Yicu ondaci, ngwäpïnï ngwallu kerala ngwujalu kaama gidi Ngwaalu.
20 A be ngwoꞌra ngwüngün ꞌtü aar ele ndi ondaci ngwüjü ngwaalu ꞌdar ngwujaꞌri ngwanni ngwujaw a Deleny ji ꞌdenggen aar ape yiiru ngwätïyï ngwujaꞌri ngwüngün ngwäyänü yiꞌremna ye yati gwujana ngwujaꞌralu.]