10
Ngwooꞌra ngwükäjäär je ꞌdï na rom
(Murkuj 3.13–19; Luka 6.12–16)
1 A Yicu urnidi ngwoꞌra ngwüngün ngwoo ꞌdï na rom (12) ꞌdünggüngün ngwuje ätädä yelenya aar ye ꞌtüyï ngwüꞌrïllänü aar ye uꞌriyi ngwüjü nono.
2 Ngwürïny ngwuru ngwee ngwudi ngwooꞌra ngwükäjäär je ngwuru ꞌdï na rom (12), Jamaan gwanni gwani Butruj na gwenggen gwani Andrawuj, na Yagubinga gwenggen gwe gwani Yuwana yïjï yidi gur gani Jäbädï,
3 a Bïlïpüj na Bartumawuj, Tumaj na gur gidi dulba gani Mätä, Yagub gïjï gidi gur gani Albayu na Tadiyuj,
4 Jamaan gwanni gwati ligor enyanu gwani gen na Yäwüdä gwani Äjïgärïyütï gwanni gwuma ji ngwugwurlanu Yicu gwe.
Aar ükäjï ngwoꞌra ngwoo ꞌdï na rom (12)
(Murkuj 6.7–13; Luka 9.1–6)
5 Ngwee ꞌdï na rom (12) ngwükäjä je Yicu ngwuje oladani ngwujaꞌri ngwe ngwee, “Aaꞌti ngaa la ele ngwüjï ngwuru Garany, aaꞌti ngaa la länï kündär gere gidi ngwüjï ngwudi Jamirang.
6 Ngaa be ele ngwangal ngwududu ngwuru ngwüjï ngwudi Yïjïräyïl.
7 Ma be ari ngaa lima ele, ondacar ngwüjü ngaa je ci, ‘Yeleny yidi gerala yima ila gito.’
8 Ngaa uꞌriyi ngwüjü nono ngwanni ngwümä, ngaa je ꞌdïꞌrïyälü ngwanni ngwayu, ngaa gaꞌru ngwüjü yaamu nono, ngaa ꞌtüyï ngwüꞌrïllä ngwüjänü. Yätädäärä je yïmïꞌrä aꞌtur, ätädär je ngwüjü ꞌto yïmïꞌrä aꞌtur!
9 Aaꞌti ngaa la apani dab, buta na bartad gwere ngwürädänü ngwalu.
10 Na aaꞌti ngaa la apani ngwony ngwudi eny ngwüräd ngwe ngaa gendani direda na ngwüdän na guura, ndi ari gwanni gwati ape yiiru gwädï gu ndi aar ätä guꞌru güngün.
11 Gündär na ngwuꞌdunanu ngwere ngwa gu änï, mïnär gu dïjälü dere danni dijaw ngaa gu üllälü ngaa gu jalu ꞌdi a gaji ila ngaa ꞌdïꞌrï ngaa ele.
12 Ma be ari ngaa lima änï ngwuꞌdun ngwere, agannar je
13 manari ngwuꞌdun ngwoo ngwädï gu, gäbïcär a gu adatalu gwalu ji. Ma be ari ngwuꞌdun ngwoo ngwaꞌti gu ädï ꞌdidanu, ara je adatalu gwalu oꞌraca.
14 Ma ara je ꞌti gwäꞌrü ara je ꞌti ꞌdengenaca ngwujaꞌri ngwalu, ngwuꞌdun na gündär ngeno, ꞌtüdär ngaa brotada dibuꞌralu mbüny giyora yalu.
15 Nggwa je ci ꞌdidanu, gomon gidi pï yelenya, ngwüjï ngwudi yündär yidi Jadumanga Gamura gwe, ngwa ïnädänï Ngwaalinga ngwüjï ngwudi gündär nggoo.”
Übïnälü gwanni gwüdünïcä ngwooꞌra ngwudi Yicu
(Murkuj 13.9–13; Luka 21.12–17)
16 Ngwuje ci, “Äny gwa je ükäjï nono ngwangala ngwuju ngwümüdänü, ngaa be arngani mama, ngaa ru nono ngwüüngäyü ndi bebere na ngaa jayi drü nono amaam gwudi ꞌdunung.
17 Arnganar ngwüjü ngwa ji ngwa je apada ngwämrä ngwudi ngweleny, la je pï ngwacal ngwe ngwämrä ngwegen.
18 Na gwani äny la je dünäjï ngwäyänü ngwudi ngwartan na ngweleny ngaa ru ladi inggidi ꞌdenggen na ngwüjï ngwuru Garany.
19 Ma be ari lima je ummi ara je ätädä ngwelenya, aaꞌti be yigor ya je pänü gwani ngwujaꞌri ngwanni ngwada je ondaji na ngwada ngwe ari. Kaji nggoo la je be ätädä ngwujaꞌri ngwanni ngwada ngwe ari.
20 Ndi ari ngaa laꞌti ba be rüdï lanni ladi ondaji, a be Lïgïꞌrïm ru lidi Papa gwalu lanni ladi ondaji ꞌdanggalanu.
21 Na diwengga da gwurlanu gwenggen gwe gwa aar ꞌrinye na papa gwa gwurlanu gïjï güngün, a yïjï ya nyürtïjï papanga janu legen la aar le gwurlanu la aar je ꞌrinye.
22 Ngaa la ke ngwüjü ngwäy ꞌdar gwani ngwürïny ngwüny. A be gwanni gwa mätïnälü ꞌdi aar medadi, gwa gïlängïdïnï.
23 Manari lima je übïnälü kündär gere, gatanar ngaa gu abra giꞌter. Nggwa je ci ꞌdidanu, ngaa laꞌti la medaji yündärä ꞌdar yidi Yïjïräyïl ꞌdi a Gïjï gidi Dïjï dümnä oꞌra.”
24 Ngwuje ci, “Dooꞌra dati ꞌti pana gidoorta düngün na dïnäd dati ꞌti pana gideleny düngün.
25 Yimbutu gu ꞌdogo ndi dooꞌra ru nono dorta düngün na dïnäd ru nono delenya düngün. Manari gwucaar gwanni gwuru giꞌra gidi ngwuꞌdun Bäljäbül, a be ngwüjï ngwüngün gïdrü ngwa aar je be ca!”
Aaꞌti yedeny ya je eny
(Luka 12.2–7)
26 “No aaꞌti la je iyiyi yedenyo ndi ari yere yaꞌti yanni yändälü yaꞌti ya ꞌtädïnälü, na yere yaꞌti yanni yändälü yaꞌti ya aar je inggidi.
27 Yanni yada je enggaci nyïm, ondajar yalu kebeny gilingenalu na yanni yada je ꞌdingini giilang ge, urnidar yalu korrala gidi ngwuꞌdun.
28 Aaꞌti yedeny ya je eny ngwüjï ngwanni ngwati ꞌrinye lingina aar ꞌti be burna ndi ꞌrinye lïgïꞌrïmä. Ara je be yedeny eny gwani nginde gwanni gwätï yiima ndi dudiyi lïgïꞌrïmä na lingeno gïlïgänü lidi yiꞌrendeny.
29 Yïꞌrä rom (2) yati aar je ellang bartad gweꞌte pu na gere gati ꞌti ïꞌdü gïdïyängälü a gu ꞌti be Papa gwalu lïngïdï.
30 A be ꞌdanggalu ngwäꞌrü ngwalu ꞌdar giyiꞌra ngwülïngïdï je Ngwaalu ꞌdar ndi ari ngwuru ümïn.
31 Aaꞌti be yedeny ya je eny, ndi ari ngaa lipana guꞌru gïyïꞌrä yonyadu.”
Ndi ämnï na ndi ꞌdonya Yicung
(Luka 12.8–9)
32 Ngwuje ci, “Gwanni gwuny ꞌtäjälü ngwäyänü ngwüjï, äny ꞌto gwunyi ꞌtäjälü ngwäyänü ngwudi Papa gwüny kerala.
33 Gwere gwanni gwunyi nyïꞌrïnï ngwäyänü ngwüjï, gwunyi nyïꞌrïnï ꞌto ngwäyänü ndi Papa gwüny kerala.”
Yicu na ngwüjï ngwudi dïdlä
(Luka 12.51–53; 14.26–27)
34 Ngwuje ci, “Aaꞌti ngaa la geꞌtaji ndi ari äny gwïndädï ndi geꞌte adatingalu ngene gïdïyängälü. Nyi be ilada ndi geꞌte giiri.
35 Ndi ari äny gwïndädï ndi gäbïcï dïjü aar üꞌränü papa gwe gwüngün, na gïjï ganni giru gera aar üꞌränü nanni gwe gwüngün, na gera giru düünä aar üꞌränü nanni gwe gwuru düünä.
36 A güwän gidi dïjï ga ru ngwüjï ngwüngün gïdrü.”
37 Ngwuje ci, “Gwanni gwämnänï papang na nanning gwüngün ꞌdünggüny, gwaꞌtiny ädï ngwäy. Na gwanni gwämnänï gïjü güngün ganni giru dur na ganni giru gera ꞌdünggüny, gwaꞌtiny ädï ngwäy.
38 Na gwanni gwati ꞌti apu güüꞌrï güngün aar nyi gwujana, gwaꞌtiny ädï ngwäy.
39 Gwanni gwati mbuji miding gwüngün, gwung dudiyi na gwanni gwa dudiyi miding gwüngün gwani äny, gwung mbuji.”
40 Ngwuje ci, “Gwanni gwa je ämnï, gwuny ämnï, na gwanni gwuny ämnï, gwämnï ngindeng gwanni gwükäjïïny.
41 Gwanni gwämnï dïjïrä dükäjäär ndi ari diru dïjïr, nginde gwa mbuji guꞌru gidi dïjïr. Na gwanni gwämnï ngindeng gwanni gwüdünälü ndi ari gwüdünälü, gwa mbuji guꞌru gidi nginde gwanni gwüdünälü.
42 Na gwanni gwa ïcï ꞌdogo dïjü deꞌte yaw ngwüjänü ngwee ngwokeya yigoꞌro yegen ndi ari nginde gwuru dooꞌra düny, nggwa je ci ꞌdidanu ndi ari guꞌru güngün gaꞌti ga dudi aꞌtur.”