24
Yicu gwondaja geradalu gwee gwudi gobo
(Murkuj 13.1–2; Luka 21.5–6)
1 A Yicu ꞌtü ngwugatani gobo ngwuji ndi ele a ngwooꞌra ngwüngün ele ꞌdünggüngün aar ondaci gwani ngwuꞌdun ngwudi gobo.
2 Ngwuje ci, “Ngaa länggädï ngwony ngwee ꞌdare? Nggwa je ci ꞌdidanu ndi ari goꞌrr gere ga ꞌti ga aar gatani kwenggenala ꞌdar ya ïꞌdï ya gätïnï gïdïyängälü.”
Yiꞌremna yanni yadi inggidi medading gwudi dïdlä
(Murkuj 13.3–13; Luka 21.7–19)
3 Anni ma Yicu ji ndi jalu Gidotrala gidi Ngwümïnïtï, a ngwooꞌra ngwüngün ïlïjä ngwere ngwere aar ci, “Enggaci nje yiꞌral giyee yadi ji jadu, na yiꞌremna yiru ange yanni yadi inggidi oꞌrang gwunga na gaji ganni gadi ge dïdlä medadi?”
4 A je Yicu ci, “Arnganar ndi ari aaꞌti dïjï dere da je ïꞌdäjänü.
5 Ndi ari lonyadu la ji lila ngwürïny ngwe ngwüny la ari, ‘Äny gwuru gwanni Gwubrutaar yelenya,’ na la aar je ïꞌdäjänü lonyadu.
6 Ngaa laji la ꞌdingini yäärä ye na yungun ye yani yäärä, aaꞌti be ya je iyiyi yedenyo. Yiꞌral yanni yiru gu no yadi ji a be medadi gwudi dïdlä gwaꞌtina gwa ji.
7 Ngwüjï ken ngwa ꞌdïꞌrä ngwüjü nono ken giꞌter, yelenya ken ya ꞌdïꞌrä yelenya nono ken giꞌter, ngwamu ngwa ji, dïyäng da lagadalu ngwaalu ꞌdar.
8 Yiꞌral giyee ꞌdar aalu gwuru gwudi yajima yidi yiꞌrendeny.
9 La je be ummi la je ätädä ngwelenya la je übïnälü la je ꞌrinye, ngaa la ke ngwüjï ngwäy ꞌdar giyen gwani äny.
10 Kaji nggoo, lonyadu la oꞌre kay ndi ämnï Ngwaalu na la gwurlajidanu la kajidi ngwäy.
11 Na kaji nggoo, ngwïjïr ngwonyadu ngwuru ngwuꞌduru ngwa ꞌtädälü ngwa ïꞌdäjï ngwüjänü ngwonyadu.
12 Ndi ari ke gwudi ngwüjï gwa gendadi, gwa gäbïcï, ämnïng gwudi ngwüjï ngwonyadu gwa jïlï.
13 A be gwanni gwa mätïnälü ꞌdi a gaji ila gidi mïꞌrä, gwuru gwanni gwa gïlängïdïnï.
14 Na ngwujaꞌri ngwee ngwanni ngwujaw ngwudi yeleny yidi gerala ngwa aar ngwe ondaji gïdïdlä ꞌdar ndi ari aar inggidi ngwüjï giyen ꞌdar, a be dïdlä ila ngwümïꞌrä.”
Dïrbä danni dipa
(Murkuj 13.14–23; Luka 21.20–24)
15 A je Yicu ci, “Ma ji ma aang engga ‘yütä yidi geradalu’ yanni yaru ye dïjïr dani Daniyal ma aar ji ngwaalu ngwanni Ngwujuꞌru, lanni lati uli aar be lenge ndi ari dïrbä diru be!
16 Yäy gu no, lanni gilo Yäwüdïyä, aar abrada giyenala.
17 Gäbïcär be gwanni gwujalu ngwuꞌdunala aaꞌti gwüllädälü ndi ꞌtüyä gony gere gïdrü.
18 Gwanni gwa ji ndi gwürï giliburanu, aaꞌti gwa kwoyalu ndi ape direda düngün!
19 Dïrbä da ji dipa kaji nggoo ngwaw ngwanni ngwuju ngwari ngwe na ndi nanninga lanni liꞌriya!
20 Otacar Ngwaalingalu ndi ari aaꞌti abri gwalu ngwa ji digo de na gomon ganni giru Kwoꞌra täꞌrïl (7).
21 Ndi ari dïrbä da ji dipa komon nggoo daꞌti gu ju diru gu no ꞌtuꞌtu anaku geꞌtaar gu dïdläyü, a daꞌti da ji diru gu no mana aꞌtur.
22 Adinari aar ꞌti üꞌrïdï yomonanu giyoo, dïjï daꞌti dadi midi. A be gwani ngwüjï ngwanni ngwäbräär je, yomon giyoo ya aar je üꞌränü.
23 Komon nggoo, manari dïjï dere dima je ci, ‘Gwanni Gwubrutaar yelenya nggwo ngene,’ na ‘Nggwo ngenone,’ aaꞌti la je ämnäcï.
24 Ndi ari ngwuꞌduru ngwonyadu ngwani lanni librutaar je yelenya na ngwïjïr ngwonyadu ngwuru ngwuꞌduru ngwa ji ngwa ꞌtädälü ngwa geꞌte yiꞌremna yipa na yiima ndi ïꞌdäjï ngwüjänü ꞌdi ngwüjï ngwanni ngwäbräär je ma gay ji.
25 Arnganar be ndi ari äny gwuma madinana nggwuma je ondacani gwerre gwerre gaji gaꞌtina ïndï.”
26 Ngwuje ci, “Yäy gu no, manari dïjï dere dima je ci, ‘Nginde nggwo poor gïtäny,’ aaꞌti nga la ele. Na ma aar ari, ‘Nggwee ngene gïdüläng,’ aaꞌti ya je ämnï.
27 Ndi ari anaku ati gu gere eny ngïꞌräm gïtäny ngwenggani giꞌra ge, yäy ya gu ru ꞌto no ndi oꞌra gwudi Gïjï gidi Dïjï dümnä.
28 Ngwaalu ngwanni ngwati gu gong ayalu, ngwubiirta ngwati gu oꞌradi!”
Oꞌra gwudi Yicu mana
(Murkuj 13.24–27; Luka 21.25–28)
29 Ngwuje ci, “Puprang kaji nggoo ma dïrbä ji,
‘Lingen la ru dïrïm
na düüwä daꞌti da enyalu
na yuurrum ya miꞌriꞌta kerala,
na ngwong kerala ngwa lagadalu.’ ”
30 Ngwuje ci, “Komon nggoo, giꞌremna gidi Gïjï gidi Dïjï dümnä ga be ꞌtädïnälü kerala na ngwüjï giyen ꞌdar gïdïyängälü ngwa runi, ngwa engga Gïjü gidi Dïjï dümnä güllü gïyïbäꞌrälä yiima ye na näjï gwe gwupa.
31 Na ga ükäjä yïꞌrrä yüngün ya mïꞌrï giil yal yipa ya gwäꞌräjä ngwüjälü ngwüngün ngwanni ngwäbrüng je giyumil ꞌdar kwoꞌrongo ꞌtuꞌtu ngwaalu ngwurmitu gu geralu gïtäny ꞌdi aar obani ngwaalu ngwurmitu gu geralu giꞌra ge, aar je gwäꞌräjälü ngwaalu ngweꞌte pu.”
Lïngïdär dimnigor de yiꞌral
(Murkuj 13.28–30; Luka 21.29–33)
32 Ngwuje ci, “Lïngïdär dimnigor de yorto ye ngwaalinga. Ma ji ma engga yiꞌrina yüngün ma aar ïgïlï aar ꞌtüdïnä ngwänï, ngaa lenge ndi ari yirram yima ji gito.
33 Manari ngaa lima enggada yiꞌral giyee ꞌdar, ngaa be lenge ndi ari yima ji gito gïlängïr.
34 Nggwa je ondaci ꞌdidanu ndi ari ngwüjï ngwudi gimaad nggee ngwaꞌti ngwa medadi ꞌdi a yiꞌral giyee ꞌdar ji.
35 Gere na dïyäng la dudi a be ngwujaꞌri ngwüny ngwaꞌti ngwa dudi aꞌtur.”
Gomon na gaji yaꞌti linginna
(Murkuj 13.32–37; Luka 17.26–30,34–36)
36 Ngwuje ci, “Dïjï dere daꞌti dïlïngïdï gomon ge na gaji ge nggäꞌdï yorto ye ngwaalinga ꞌdi ꞌto yïꞌrr kerala na Gïjï, a be Papa ru jücü.
37 Nono raar gu gwerre ngwüjï gaji gidi Nuuwa, yadi gu ru ꞌto komon ganni gadi ge Gïjï gidi Dïjï dümnä oꞌra.
38 Ndi ari kaji gidi Nuuwa gwerre gwerre däärü daꞌtina apu ngwüjü, ngwüjï ngwuju ndi eny aar ïyï aar agidi aar ägïnï ꞌdi a je gu gomon obananu ganni gima ge Nuuwa änï gïbälükänü.
39 Aar ꞌti lïngïdädï yiꞌral ye yorto ye ngwaalinga ndi ari yiru ange yadi ele ndi ji ꞌdi a je gu däärü ändänü ngwuje ape ꞌdar. Yadi gu aalu no komon gadi ge Gïjï Dïjï dümnä oꞌra.
40 Ngwur rom ngwa ji gïtäny, da aar ape deꞌte da aar gatani deꞌte.
41 Ngwaw rom ngwa ji ndi ro gilille, da aar ape deꞌte da aar gatani deꞌte.”
42 Ngwuje ci, “Jar balu ngwäy ngwe, ndi ari ngaa laꞌti lïngïdï gomon gïndï ne ganni gadi ge Deleny dalu oꞌra.
43 A be lïngïdär ngwujaꞌri ngwee yorto ye ngwaalinga ndi ari adinari ati dïjï didi ngwuꞌdun lenge ndi ari duꞌram dadi ila jadu, dadi jalu ngwäy ngwe ngwetadi ngwuꞌdun ngwüngün nding gäbïcï duꞌramu ngwuje kiyi ngwänï.
44 Yäy gu no, nga nga ꞌto jar mama ndi ari Gïjï gidi Dïjï dümnä ga ji ga oꞌra gaji ge ganni gaꞌti ga gu gïꞌtïjï ngindeng ngwäy.”
Dïnäd danni diru ligor leꞌte pu
(Luka 12.35–48)
45 Ngwuje ci, “Dïnäd dïndï ne danni diru ligor leꞌte pu dibebera digeꞌtana doorta düngün giyiiru ndi ätädä ngwïnädä ngwüngün ꞌdunu ngwony ngwudi eny kaji gicung ge.
46 Dïnäd ndoo da aar onjaci gwulleny manari doorta düngün dima oꞌra ngwumbuji därrü yiꞌral yanni yicung ye.
47 Nggwa je ci ꞌdidanu, ding ruji giꞌra gidi ngwong ngwüngün ꞌdar.
48 A be manari dïnäd ndoo diki mung ci ligor lüngün, ‘Doorta düny dadi jana ndi oꞌra.’
49 Ngwube ꞌdïꞌrï ndi pï ngwenggen ngweny aar ïyï aar rlälï ngwüjï ngwe.
50 Doorta didi dïnäd ndoo da oꞌra komon ganni gaꞌti ge dïnäd gïꞌtïjä ngindeng ngwäy na gaji ganni gaꞌti ngge arngana.
51 Da ape dïnädä ndoo ding pï ling je äcïdänü ngwumurꞌtuny ngwe ngwaalu ngwudi yal na ïyïnï ngwad!”