28
ꞌDïꞌrï gwudi Yicu
(Murkuj 16.1–8; Luka 24.1–12; Yuwana 20.1–10)
1 Anni ma gomon giru Kwoꞌra täꞌrïl ele, dilu danu komon ganni giru giꞌra giyomon Kwoꞌra täꞌrïl, a Märïyäm gwani Mäjïdälïyä na Märïyäm gwuꞌter ꞌdïꞌrï aar ele ndi ombaja dimomo.
2 A ngwaalu lagadalu gwulleny, ndi ari gïꞌrr gidi Deleny güllü kerala ngwele ngwäbrï goꞌrra gïlängïr gidimomo nggu jala.
3 Giru ngwäyänü nono gwele ma gere enyanu, a ngwured ngwüngün bidi pupuꞌrul nono guurrumu.
4 Anni ma ngwangida engga, a je yedeny eny aar didiꞌri aar ru nono ngwüjü ngwayu.
5 A gïꞌrr ci ngwayu ngwoo rom (2), “Ara je ꞌti yedeny ïtï, nggwülïngïdï ndi ari ngaa lïmïnä Yicung gwanni gwüpädäär küꞌrï.
6 Nginde gwaꞌti ngene. Nginde gwuma ꞌdïꞌrï anaku arung gu. Ilar kuni ngaa ombaji ngwaalinga ngwanni ngwugeꞌtaar gu.
7 Ïndädär puprang ngaa ondaci ngwoꞌra ngwüngün ndi ari, ‘Gwuma ꞌdïꞌrï a nginde gwa je dalmacani gwele Jälïl, a gwa aang engga ngenone.’ Äny nggwee gwuma je ondaci gwenene.”
8 A ngwaw ꞌdïꞌrä gidimomalu aar gu iladanu, lïtï je yedeny aar be jayanu gwulleny aar abrada ndi ondaci ngwoꞌra ngwüngün.
9 Aar dïrbänï Yicungalu ngwuje ci, “Nggwaganna je.” Aar ila ꞌdünggüngün aar mätädä yoralu yüngün aar kwucalu yirku ye.
10 A je Yicu ci, “A je ꞌti yedeny ïtï ïndär ngaa ondaci ngwänggärï aar ele Jälïl liny engga ngenone.”
A ngwangida ape ngwujaꞌri
11 Anni ma ngwaw ji ndi ele kayalu, a ngwangida ngwoko abri aar änï kündär aar ondaci ngwurꞌdala ngwanni ngwuru ngweleny yiꞌral ye ꞌdar yanni yima ji.
12 Anni ma ngwurꞌdal ngwanni ngwuru ngweleny oꞌrajidalu mbumbunga le, aar ombaji yiꞌral ndi ari aar dinga ngwangida ngwüꞌrïnyä nono ngwonyadu
13 aar je ci, “Arar, ‘Ngwooꞌra ngwüngün ngwuma ila dilu de gwuma aar ape yuꞌrimi nyii lindru.’
14 Manari ngwujaꞌri ngwee ngwuma obani gideleny, diny gäbïcï da jayanu la je ꞌtüyï gïdïrbänü.”
15 No a ngwangida ape ngwüꞌrïnyä aar je ärrï anaku ma aar je gu ci. A ngwujaꞌri ngwee badalu ꞌdar Ngwüyäwüd ꞌdi gomon gidi gweneng.
Geꞌte giyiiru yanni yipa
(Murkuj 16.14–18; Luka 24.36–49; Yuwana 20.19–23; Yiiru 1.6–8)
16 A be ngwooꞌra ngwoo ꞌdï na gweꞌte (11), ꞌdïꞌrï aar ele Jälïl aar allu ken ganni genggaca je Yicu ndi aar gu ele.
17 Anni ma aar engga, aar kwucalu yirku ye a be loko ümïmänü.
18 A je be Yicu ïlïjä ngwuje ci, “Yelenya ꞌdar kerala na gïdïyängälü, yima aar nje ätädä.
19 Yäy gu no, ïndär ngaa ondaci ngwüjü giyen ꞌdar aar nyi gwuji ngaa je nyïnyï ngwürïny ngwe ngwudi Papa na gwudi Gïjï na gwudi Lïgïꞌrïm lanni Lijuꞌru.
20 Ngaa je enggaci aar ꞌdengenaci ngwujaꞌri ꞌdar ngwanni ngwenggaca je. A ꞌdidanu a la ji giyomonalu ꞌdar ꞌdi a dïdlä medadi.”