8
A Yicu uꞌriyi daamu nono
(Murkuj 1.40–45; Luka 5.12–16)
1 Anni ma Yicu üllädälü milli, a ngwüjï ngwonyadu gwujani.
2 A gur geꞌte gümä gïmätï yaamu ïlïjä ngwüjürbäcälü ngwuci, “Gwani Deleny, manari nga gwämnä, a gwuny uꞌriyi nono.”
3 A Yicu dinga guy ngwakani nono ngwuci, “Äny gwämnä uꞌru nono.” Kaji geꞌte geꞌte a gur uꞌri yaamu nono.
4 A Yicu ci, “ꞌDingina! Aaꞌti a gwa gu ondaci dïjü dere, ïndï gidirꞌdal ang enggaci ngwangina ngwunga, nga gätïjï Ngwaalingalu anaku ondaja gu yobo yidi Müjä, nunnu aar ru yanni yadi inggidi ngwujaꞌri ngwani nga.”
A Yicu uꞌriyi dïnädä nono didi kumndan
(Luka 7.1–10)
5 Anni ma Yicu änï kündär gani Kaprnawum, a gur giru giꞌra gidi gwuꞌtulunga küüꞌrï tudini (100) päcälü ngwuci gatajiny düwä.
6 Ngwuci, “Gwani Deleny, dïnäd düny dayu ngwangina dindru ngwümbür dïtï ngwanginu nono gwulleny.”
7 A Yicu ci, “Äny gwa ele nyi uꞌriya nono!”
8 A gur giru giꞌra gidi gwuꞌtulu ci, “Gwani Deleny, äny gwaꞌti ädï ngwäyänü ngwunga ndi ang änï ngwuꞌdun ngwüny, ꞌdogo ondaja ngwujaꞌri dïnäd düny da be uꞌri nono.
9 Äny ꞌto gwuru deleny dätï yelenya ndi nyi ci dïjü ndee, ‘Ïndï,’ ngwele, na ndone, ‘Ila,’ ngwila. Nyi ci dïnädä düny, ‘Ärrü yiꞌral giyee,’ ngwuje ärrï.”
10 Anni ma Yicu ꞌdingini ngwujaꞌri ngwee, ngwudibi ngwuci ngwüjü ngwanni ngwuju ngwugwujana, “Nggwa je ci ꞌdidanu, nggwaꞌti mbuja ämnïng Ngwaalu gwere gwupa gu no ngene Gïyïjïräyïl.
11 Nggwa je ci lonyadu la ji lila gïtäny gwe na lila giꞌra gwe la jalu ngwaalu ngwegen Äbräyïmïngä le na Ijaag na Yagub gïyïꞌrïnyïnänü yidi yeleny yidi Ngwaalu.
12 A be yïjï yidi yeleny ya be gätïnï poor gïdïrïmänü ngenone ari gwa ji na ïyïnï ngwad gwa ji.”
13 A be Yicu ci guru gidi gwuꞌtulu, “Ïndï! Ya gu ru anaku ma gu ämnï ndi ari aar gu ru.” Kaji geꞌte geꞌte nggoo, a dïnäd düngün uꞌri nono.
A Yicu uꞌriyi dünä nono didi Butruj
(Murkuj 1.29–34; Luka 4.38–41)
14 Anni ma Yicu ila ngwuꞌdun ngwudi Butruj, ngwumbuji nanning gwüngün gwuru düünä gwundru ngwümbür gwümä ngwübüdï nono.
15 Ngwakani nono guy ge güngün ngwüjïlädï ngwüꞌdïꞌrälü ngwuje äpïjï yiiru.
16 Anni ma ngwaalu ru digera, aar äpïjä ngwüjü ngwonyadu ngwümä ngwätïnä ngwüꞌrïllä nono a Yicu girinya ngwüꞌrïllä ngwujaꞌri ngwe ngwuje ꞌtüyï ngwuꞌriyi ngwüjü nono ꞌdar ngwanni ngwümä.
17 Ndi ari a ngwujaꞌri ätï ngwäyänü ngwanni ngwaru ngwe dïjïr dani Ajaya ndi ari,
“Nginde gwuma ape yiꞌrendenya yege
a gwuma üpïnï dümdï dege.”
Guꞌru giru ange ndi gwuji Yicung
(Luka 9.57–62)
18 Anni ma Yicu engga ngwüjü ngwonyadu ngwänänü, ngwuci ngwoꞌra ngwüngün, ar ele ar üꞌrü yaanu ar dambu dambal.
19 A doorta deꞌte didi yobo ïlïjä ngwuci, “Gwani doorta, nggwa ang gwujani ngwaalu ngwada gu ele.”
20 A Yicu ci, “Yarꞌtum yätï ngwubangu, a yïꞌrä yidi gere yätï ngwüꞌrüꞌtïlä, a be Gïjï gidi Dïjï dümnä gaꞌti ätï ngwaalinga ngwere nding gu änïjï giꞌra güngün.”
21 Oꞌre a dooꞌra diꞌter ci, “Gwani Deleny, gäbïcïny nyi ele gwerre gwerre nyi gata papang gwüny.”
22 A Yicu ci, “Gatana ngwüjü ngwanni ngwayu aar ele ndi gatu ngwüjü ngwegen ngwanni ngwayu gwujaniny.”
A Yicu dünïyï diruna
(Murkuj 4.35–41; Luka 8.22–25)
23 A Yicu ele ngwallu gïbälükänü a ngwooꞌra ngwüngün dïꞌrï aar gwujani.
24 A Yicu ji ndi ndri a dirun aralu gwulleny giyaanu ngwärï bälükälü ꞌdi ngwuru gwadi ïꞌdätï.
25 A ngwooꞌra ngwüngün ele aar ꞌritiya aar ci, “Gwani Deleny, gätäjï nje diruna nyii la ïꞌdätï.”
26 A je Yicu ci, “Nga nga gilee looko ämnïng Ngwaalu, nga larra ara je be yedeny eny.” Ngwüdïꞌrälü ngwugirinya diruna na dudu a dirun adatalu jicom.
27 Aar dibi aar utalu aar ari, “Gur giru ange nggee? ꞌDi ati dirun na dudu ꞌdengenaci!”
A Yicu uꞌriyi ngwüjü nono ngwümätï je ngwüꞌrïllä
(Murkuj 5.1–20; Luka 8.26–39)
28 Anni ma Yicu ele giyaanu bälükä gwe ꞌdi ngwobani dambal ngwaalu ngwani Jädïrïn aar mbudi ngwüjï ngwe rom (2) ngwuru ngwur ngwätïnä ngwüꞌrïllä nono ngwüꞌtüdï ngwumomanu. Ngwuki yärä gwulleny ati ꞌti ngwüjï ïndï kayalu nggoo.
29 Aar ürrï dula aar ci Yicu nu, “A gwätï ange ngene ꞌdänggärï, gwuru Gïjï gidi Ngwaalu? Nga gwïndädï be ndi nje ängïꞌrïyï ngwäy gaji gärï gona gaꞌti ïnde?”
30 Ngwaalu ngwolanu gwoko ngwaalu ngwoo, ngwüdr giꞌdu ngwuju gu ngwujaar je ndi iye.
31 A ngwüꞌrïllä päcï Yicungalu aar ci nu, “Manari nga gwadi nje linynyi, gäbïcï nje be nyii änï ngwüdränü.”
32 A je Yicu ci, “Ïndär.” Aar ꞌtü aar ele aar änï ngwüdränü, a ngwüdr üllä milli aar miꞌriꞌti aar bälädï giyaw aar gu ayi.
33 A ngwooꞌra ngwanni ngwuju je ndi iye aar abri aar ele ꞌdunu aar gu ca ngwüjü aar je ondaci ngwujaꞌri ngwudi ngwüjü ngwanni ngwätïnä ngwüꞌrïllä nono ngwuma uꞌri nono.
34 A ngwüjï ꞌtüdälü ꞌdar ngwuꞌdunanu aar ila ndi Yicu. Anni ma aar engga, aar päcälü nu ngwüꞌtü ngwuje gätïjänïjï ngwaalinga ngwegen.