3
Ngwangida
1 Ngwujaꞌri ngwee ngene ngwädï gu, ma dïjï dere ligor le lüngün mïnï ndi ru dangida didi giꞌdoonga gidi Ngwaalu, yiꞌral giyee yijaw.
2 Yïbüpïnä nding ru dangida dijaw nono, didi daw deꞌte pu, ngwubebere, ngwümäätä ligoꞌro lüngün, ngwuru dïjï dïnyädäär, ngwuru dïjï didi yïrnü, ngwätï yiima ndi enggaci ngwüjü.
3 Aaꞌti da ïyï diꞌrica ngwürlälï, aaꞌti da ru däärä, aaꞌti da kadi jadanu, ngwube manni ru dïjï dïjïlänü, dadataralu ngwüjï ngwe, aaꞌti dübïjï ngwüꞌrïnyänü.
4 Ngwulenge ruying ngwüjü ngwüngün gïdrü mama, ngwengga ndi ari gwuꞌdengenaca yïjü yüngün aar denya denyang gwanni gwïndï kayalu.
5 Ndi ari manari dïjï dima ꞌti lïngïdï ruying ngwüjü ngwüngün gïdrü, awa ngwube burni ndi ombaji giꞌdonga gidi Ngwaalu?
6 Aaꞌti da ru dïjï dämnä Ngwaalu girem nunnu aaꞌti da piyi ligoꞌro lüngün da aar de obalu obalu gwe gwanni gwübïdäär gwe dijegoꞌralu.
7 Aaꞌti ngwürïny ngwüngün ngwa ke ngwüjü ngwäy poor kiꞌdoonga ngwïkïrïjïn nunnu aaꞌti gwa ïꞌdï giyiꞌralanu yidi yaaru ngwïꞌdätï ngwüꞌdïbänü ngwudi dijegoꞌrr.
Lanni lati gendaji guy giyiiru
8 Yiru gu yeꞌte yeꞌte ꞌto ndi ari lanni lati gendaji guy giyiiru, aar ru ngwüjï ngwädï gu nda je ngwüjï denya, aaꞌti ngwa ru yigoranu rom, aaꞌti ngwa ïyï diꞌrica aar rlälï, aar ru ngwüjï ngwübïjä ngwüꞌrïnyänü gwudi yuꞌram.
9 Aar ru ngwüjï ngwürïmïtï ngwujaꞌri ngwanni ngwuru ꞌdidanu ngwudi ämnï Ngwaalu ligor le lijaw nono.
10 Aar je ïdäjï gwerre gwerre aar je be geꞌte ndi gendaji guy giyiiru manari laꞌti ke nono gwere giyiꞌral yere.
11 Yiru gu yeꞌte yeꞌte ngwaw aar ru ngwaw ngwädï gu nda je ngwüjï denya, aaꞌti ngwa ru ngwaw ngwänïjü ngwüjü nono, aar be bebera aar ru yigor yeꞌte pu giyiꞌral ꞌdar.
12 Gwanni gwati gendaji guy giyiiru, ngwuru dur didi daw deꞌte pu ngwururriyi yïjü na ngwuꞌduna ngwüngün mama.
13 Lanni lima gendaji guy giyiiru mama, aar je ätä guꞌru gipa na ndi ämnïcï gwanni gwubinga ndi ämnï ndi Yicu Kirictu gwegen.
Yujimid yidi ämnï Ngwaalu gwege
14 Anni geꞌtajiny ndi ila ꞌdanggalu gomon gaꞌti olanu, nggwüllïjängä ngwujaꞌri ngwee nunnu,
15 manari nggwuma jana, nga lenge awa ndi enggaci ngwüjü aar rurriyi yigoꞌro yegen ngwuꞌdun ngwudi Ngwaalu ngwanni ngwuru giꞌdoonga gidi Ngwaalu ngwumidu, ngwuru ngwobo aar ru yidingo yidi ꞌdidanung.
16 Yanni yolanu ndi utalu, yujimid yidi drü didi Ngwaalu yojema ndi ari,
Kirictu gwuru dïjï dümnä,
a gwe Lïgïꞌrïm inggidi,
a yïꞌrr engga,
aar gwe ondaji ngwüjänü ngwuru Garany,
a gwe ngwüjï ämnï gïdïdlä,
aar ꞌdïꞌrïyï ngwallu kerala gwünäjïnä.