6
Ngwïnäd
1 Ngwïnäd ngwanni ngwuru ngwïkïrïjïn, aar engga ngworta ngwegen ndi ari ngwädï gu ndi aar je denya nunnu aaꞌti ngwürïny ngwudi Ngwaalu na inggidi gwege gwa aar lo.
2 Ngwïnäd ngwudi ngwoorta ngwuru ngwïkïrïjïn, aaꞌti ngwa aar ngwe anidanu ndi ari liru yengga. Aar je be manni äpïjänï yiiru, ndi ari lanni lärrïjäär je yiiru, liru ngwïkïrïjïn aar je jayi ngwäy.
Enggaci gwanni gwïndï kayalu
Yiꞌral yiru giyee yanni ya je enggaci ngwüjü nga je ye päcälü.
3 Gwere gwanni gwati inggidi ngwujaꞌri ngwaꞌti aar ïndï ngwujaꞌri ngwe ngwudi Deleny dege dani Yicu Kirictu ngwanni ngwuru ꞌdidanu, aar ru yobo yidi drü didi Ngwaalu,
4 dïrïngïnä ligoꞌro lüngün ꞌdogo daꞌti lïngïdï yiꞌral yere. Dümädï ligor ndi garnati, a kajidi danu ngwujaꞌri ngwanni ngwati apa yïꞌdünyü aar apa yajidinganu, luding na üpïnäjïdï ngwujaꞌri ngwanni gwuki,
5 na kajidi ngwäy gwanni gwati ꞌti medadu. Yiꞌral yiru giyee yidi yaꞌrany yegen yiki, ngwuma je ngwujaꞌri doda ngwanni ngwuru ꞌdidanu a ngwati engga ndi ari drü didi Ngwaalu, gay giru gidi bile.
6 ꞌDidanu ndi ari drü didi Ngwaalu mung aw dïjü ngwäy, dati gäbïcï dïjü ngwünänü gwulleny.
7 A laꞌti apana gony gere gïndär ge gïdïdlä ndee, na gaꞌti ga ar apani gere gïdïdlä ga ar ge ele.
8 Ma be ari a limbuju enying ar ätï ngwureda, aar nje be aw ngwäy.
9 A be ngwüjü ngwanni ngwümïnä ndi nänü, ngwati aar je ïdäjï aar ïꞌdätï giyiꞌralanu yonyadu yidi yeꞌrr na amiꞌra gwanni gwuki gwati dudiyi ngwüjü aar geradalu.
10 Ndi ari ämnï gwudi ngwüꞌrïny gwuru gay gati ge yiꞌral yanni yiki badalu ꞌdar. Na ngwüjï ngwoko, ndi ari ngwati ämnï ngwüꞌrïnyä, ngwuma je gay doda gidi ämnï Ngwaalu, ngwuma dügïnï yigoꞌro yegen yiꞌrendeny ye yonyadu.
Bulij gwülädï Timijawujing
11 A be nga gwani Timijawuj, anni rang gwudi Ngwaalu, ꞌtüdä giyiꞌralanu giyee ꞌdar, gwuja dünïngälü, nga gwuji drü didi Ngwaalu, nga ätï ämnïng Ngwaalu nga gwuji ämnïng, nga ätï orꞌtemajing nga jïlänü.
12 Apa yiiru yongra yijaw yidi ämnï Ngwaalu. Mätïnälü ndi midi gwudi gwurꞌtaling gwanni gwornacaranga gwanni gwuma gwe inggidi ngwujaꞌri ngwunga ngwanni ngwujaw ngwäyänü ngwüjï ngwonyadu ngwanni ngwänggädängä.
13 Ngwäyänü Ngwaalu, ngwanni ngwati midiyi yiꞌral ꞌdar na ndi Yicu Kirictu, gwanni gwüdünü ngwäyänü gideleny dani Bilatij Bündï ngwinggidi inggiding gwanni gwujaw, nggwa ang geꞌte ndi ari
14 nga rime ngwujaꞌri ngwee gwujaw nono ꞌdi a Deleny dege dani Yicu Kirictu ꞌtädälü.
15 Ngwaalu gwadi ꞌtäjä Yicungalu kaji güngün. A Ngwaalu ürtädïnï ngwanni ngwuru Deleny jücü, Deleny didi ngwelenyinga na Doorta didi ngwoortanga,
16 Nginde jücü gwanni gwumidu gwati ji giburi gwati aar ꞌti ꞌdonggaca, gwaꞌti dïjï änggädï na gwaꞌti gwa aar engga. A denya gwüngün ru na yiima yüngün ru yidi gwurꞌtaling. Yiru gu.
17 Ülädï ngwüjü ngwünänü ngene gïdïdlä ndee ndi ari aaꞌti ngwa piyi yigoꞌro yegen aar gatada lingina ndi nänü gwegen gwuru ꞌtur, aar be manni gatada lingina Ngwaalu ngwanni ngwünänü ngwati nje monaci yiꞌral ye ꞌdar ar ye jayanu.
18 Ülädï je ndi ari aar ärrï yiꞌral yanni yijaw, aar nänü yiꞌral ye yanni yijaw aar jayi yïrnü yanni yätäär je aar je geꞌte ngwüjü ngwuꞌter.
19 Gay ge nggee, la be aa yuꞌrina yidi yigoꞌro yegen ya ru nono yidingo yojema yidi oda gwani ngwüdlä ngwäꞌdï ngwudi gwodaning, nunnu aji aar midi miding gwanni gwuru ꞌdidanu.
20 Gwani Timijawuj, arngana yiiru yanni yima ara je ätädä. Abru ngwujaꞌri ngwanni ngwäꞌtüdï drü didi Ngwaalu nga abri garnating gwudi yeꞌrr gwanni gwucaar bebere gwuru yiꞌduru.
21 Loko gilo lanni laru lätï bebereng nggwee gwuru yiꞌduru, lima je gay doda gidi ämnï Ngwaalu. Ara je gu yïmïꞌrü ji.